Read BORANA BIBLE – KITAABA WAAQA Sira 17 Bible Online

Sira 17 - BORANA BIBLE – KITAABA WAAQA bible

Sira 17

¹ Duuba eege Aabbo Waaqi biyye ira nama uume, ammalle gargalche biyyuma suniti deebise.

²Ammalle inni jireenna isaa gabaabse, ammo aka inni waan lafa keesa jira ch'ufa mohatu tolche.

³Inni fakeenna ufi gula isa uume ammalle irre ufile kenneefi.

⁴Waan lafa keesa jiraale ch'ufa isa sodaachise, bineensafi simpirre ch'ufa mohachiise.

⁵Inni harkafi ilaafi gurraafi funnanifi araba kenneefi ka wonti kunini ch'ufti kamu huji ufi qabdu, waan shanani kana male inni qalbiifi hubacha kenneefi aka nami waan kana lamaanini huji waan shanani kaani hubatu.

⁶Inni arabafi ilaafi gurraafi qalbi wo heredu kenneefi.

⁷Ammalle beekhaafi hubachaani worra guute, waan hamtufi dansaa gargari baseefi.

⁸Inni qalbi ufi worraa kenne akasini mid'aaguma waan inni uume ch'ufa worra garsiise.

⁹Ammalle huji isaa ta mamatini worra koorse.

¹⁰Worrileeni maqa isaa qulqullo faarse dansuma huji isaa odeese.

¹¹Beekhaafi seera worri jiraatuni worraa kenne.

¹²Inni wold'aqisa haga jiru jireenna worra woliini tolfate seera ufi worra garsiise.

¹³Worri mid'aaguma guddinna ufi arge dansuma qonqo isaa gurra ufiitini d'agaye.

¹⁴Inni isani ch'ufti nagayaani woliini taa ch'ubbu lagad'a jed'e, worra barsiise. Abbaani mura Waaqa

¹⁵Waaqi waan nami tolchu ch'ufa quba qaba nami tokoleeni dandae isa dura ind'okhatu.

¹⁶Haguma gaafa d'alateti asi nami ch'ubbuma tolcha. Garaani worra jajaba aka d'akhaati, worrileeni aka garaa ufi laafisu imbeekhu. Inni gosa lafa keesa jirtu ch'ufa gargari baase.

¹⁷Ammalle gosa ch'ufa hayyu isii iti tolche, ammo worra Israeli qooda ufi tolfate.

¹⁸Angafi isaa Israeli innileeni kara qajeela keesati guddisa. Inni ifsa jaalala isa garsiise guyya ch'ufa jabeese qorqorata.

¹⁹Waaqi guyya ch'ufa waan nami tolchu ilaala; wonti worri tolchu isaa diiduma teeti.

²⁰Ch'ubbuuni worraa tokoleeni ta isa jaalaa d'okhatu injirtu, inni ch'ufa qubuma qaba. [

²¹Ammo Aabbo Waaqi abbaani eeba waan uume imbeekha. Inni worra lakisu dide lubbu baase.]

²²Yo nami hiyyeesa wo kenne, Aabbo Waaqi waan suni aka qube worqi ta beesisati herega. Naasuni nami woliqabu isaa aka lubbu nama jabdu.

²³Eege inni worra ch'ubbu wollaala iti mure gaargalcha; worrileeni waan worra male argata.

²⁴Ammo Aabbo Waaqi nama ch'ubbu ira deebie gammadani fud'ata. Inni nama ufi jibbaatu kibe garaa jabeesa. Ch'ubbu ira deebia

²⁵ Ch'ubbu lagad'a Aabbo Waaqati deebia. Waaqa kad'ad'a aka inni isani qarqaare akasini aada isaa keesati bultani.

²⁶Ch'ubbu lagad'a, hameenna guddisaa jibbaa Waaqa gudda gubba jiruti deebia.

²⁷Nama jiruti Aabbo Waaqaa galata deebisa, ammo ka due fulla ekhera jiru dandae Waaqa gubbaa faarsa?

²⁸Nami jiru ka fayya qabu dandae Aabbo Waaqa faarsa, ammo ka due dabre kara galataani isaa deebisu inqabu.

²⁹Naasufi araarami Aabbo Waaqa ka inni nama isati deebiu qabu akami gudda!

³⁰Nu nami tokoleeni haga jiru jireenna inteennu, sunini uumama namaati.

³¹Wonti adu ira ifsa injirtu ammo yo aduuni dootu ifsaani isiileeni imbada. Me ilaali aki hameenni herega nama dukaneesu guddo laafa!

³²Urjini gubba jirtu ch'ufa harka Aabbo Waaqa keesa jirti, ammo nami d'ukumafi daara. Guddinna Waaqa