Read BORANA BIBLE – KITAABA WAAQA Sira 3 Bible Online

Sira 3 - BORANA BIBLE – KITAABA WAAQA bible

Sira 3

¹Ijoolle na ch'aqasa anini abba keesani, dubbi tiyya guuta gaargala inargatani;

²wonti akanatiifi Aabbo Waaqi ya ijoolleeni abbooti teesani jaalati bulaa haawani teesani saalfad'a jed'e.

³Yo abbeeti saalfate ya ch'ubbu jala baate,

⁴yo haateti saalfate ya waan guddo horate.

⁵Yo abbeeti saalfate taka tana ijoolleeni tante si gammachiifte Aabbo Waaqileeni kad'acha tante sii d'agaya.

⁶Yo atini dubbi Aabbo Waaqa guute abbeeti saalfate haate gammachiifte lubbuuni tante ind'eerati.

⁷Ijoolle akuma tisseeni abba ufiiti saalfatu worra keesani saalfad'a.

⁸ Waan tolchitufi ka dubbatule ch'ufa keesa abbeeti saalfad'i, aka akasini eeba isaa argatu.

⁹Yo haad'a abbaani ilmaani ufiiti eebiftu worri ilmaani suni injabaata, ammo hojja worri ilmaani suni abaaru hiddi ilmaani sunileeni inch'ita.

¹⁰Abbe ch'eersite akasini ufi ingudisini, yo isa ch'eersite wonti sunini gurra sii intaatu.

¹¹Nami yo abba ufiiti saalfatu gurra argata, ammalle ijoolleeni yo haawani ufiti insaalfanne ch'eerani ufiti d'ufti.

¹²Ilma kiyya abbe gaafa inni jaare qorqorad'i; haga inni jiru diqole isa inlaalefachisini.

¹³Yo inni jaare wo wollaalelle obsa qabad'ifi. Anini irre qaba jette isa intuffatini.

¹⁴Aabbo Waaqi jaalala atini abbe jaalatu inded'u, jaalalti sunini ch'ubbu jala si baafti.

¹⁵Yo gaargali si qabate Aabbo Waaqi jaalala tante suni qabate si qarqaara. Akuma aduuni d'aamocha balleesitu dabi kankeleeni bada.

¹⁶Nami abba ufi lakise nama Waaqa arabsu fakaata ka haad'a ufi dallansisu ya Aabbo Waaqi abaare. Ufi diqeesiti

¹⁷Ilma kiyya waan tolchitu ch'ufa keesa ufi diqeesi biyyiti waan kennanifi ch'ufa ira waan suni jaalati.

¹⁸ Akuma ulfinna argatuni akasumani guddisi ufi diqeesi. Yoosi Aabbo Waaqi sira gammada.

¹⁹Naasuni Waaqa guddo, ammalle inni nama ufi diqeesu waan ufi ka qara d'ossanile iti mullisa.

²⁰Humniti Waaqa guddo, nami ufi diqeesu ch'ufti isa guddisa.

²¹Waan jajabdu qalbini tante indandeenne hubachaa iti ingamini, yokhaani waan qalbini tante ind'aqamne keesa imbuini.

²² Seera Waaqa ka si kennani jabeesi. Waan Aabbo Waaqi namati imullisini atini waan beekhu feetufi inqabdu,

²³tanaafi keesa imbuini. Qarale wonti qara si garsiisani waan nami dandae hubatuniti.

²⁴Nama heddu hereguma worrati kara ira worra gorsa; hereguma worraa ka d'uga intahini suniti mala worra balleesa. [

²⁵Yo atini ila inqamne woma inargatu, yo atini beekha inqamne qaroomalle inqabdu.]

²⁶Mata jabeenni taka tana bale keesa si buusa. Nami woma inlaallanne ka ufi inqorqoranne ufi ijeesa.

²⁷Nami mata jaba ulfinna gaargalatini ufiti d'ufa. Ch'ubbichi halkani guyya ch'ubbu ufiti dara.

²⁸Nama kiyyiba ufi koorsu gaargali isaa qorsa inqabu, ch'ubbuuni ya hidda keesati baafte.

²⁹Nami qarooni mammaasa ira dubbi barate; inni waan wo barachu fed'ufi guddo mammaasa ch'aqasa. Aka hiyyeesaa wo kennani

³⁰Akuma bisaani ibida d'aanfani hiyyeesa wo kennitileeni ch'ubbu te d'aanfiti.

³¹Nami nama d'ibi nahe qarqaaru waan taka tana herega, wonti akanatiifi yo gaargali isa qabatu innileeni qarqaarsa nama ira ind'abu.