Read BORANA BIBLE – KITAABA WAAQA Sira 32 Bible Online

Sira 32 - BORANA BIBLE – KITAABA WAAQA bible

Sira 32

¹Yo fulla gololati ulfinna sii kennani fulla guddinna si teesisani, kiyyibde ufi oli infuud'ini, akuma nama d'ibi ufi tolchi. Ato inteenne nama yaamani ch'ufa aka dansa qorqorad'i.

²Eegi huji tante hobaafate dandeete gateete biyya taani woliini gammada; duuba akanani gurra baafata.

³Yo atini nama yaamani ira jaarsa taate, yo dubbachu feetu dubbad'i hameenna inqabdu, ammo lafuma kaate woma gartu dubbate sirbale imballeesini.

⁴Yo sirbaafi tabi jiraate haasa d'eerate sirbaafi taba suni iyaakini, tunini fulla atini qarooma kanke iti garsiiftuniti.

⁵Jilti sirbaafi daad'i qabdu akuma d'akhaa diima ch'uluqa worqini makhani jirti.

⁶Sirbi dansaafi daad'ini dansaani d'akha doti ch'uluqa worqini makhani fakaati.

⁷Yo atini kaima taate haga dubbini si geetuti indubbatini; yo dubbatule maro lama ira indubbatini, ammalle yo nami dubbad'i siini jed'e male woma indubbatini.

⁸Dubbi gabaabsi waan jechu feetu qajeelchi dubbad'i. Aka nama wo beekhu tai dubbi keesa indabrini.

⁹Nama gugurda sira jiru hariyya intolfatini, yokhaani worra gaargalchite waan heddu ingaafatini.

¹⁰Akuma angaasuni mandiisu dura d'uftu, nama kiyyiba inqamnele gurri dura d'ufa.

¹¹Hojja sagalee si yaamani yo galti geete, artini imarini kai qajeeli gali.

¹²Duuba achiti waan feetu ch'ufa tai, ammo kiyyibde waan heddu dubbate ufi insaadini.

¹³Ammalle nama si uume, waan dansa inni sii kenne kana jed'i, galata galchiifi. Aka Seera Waaqa hubatani

¹⁴Yo atini Aabbo Waaqa sodaatu gorsa isaa fud'ata. Inni nama diirama kae isa kad'atu ineebisaafi.

¹⁵Seera isaa aka dansa qalbeefad'i, aka dansa waan inni jed'u ch'ufa barad'i. Ammo seera isaa suni kiyyibaani iti gugufata.

¹⁶Yo atini Aabbo Waaqa beete, d'uga barate dansoomani gurra baafata.

¹⁷Ch'ubbichi gorsa infed'u, ammalle inni Seera fed'uma ufi gula hirkisa.

¹⁸Nami wo beekhu dubbi nama ch'ufa inch'aqasa, ammo kiyyibaani ufi saadu, dubbi nama tokoleti gadi injed'u, matuma ufitini deema.

¹⁹Heredu male woma intolchini. Ammalle eegi tolchitele gargalte badaa anini waan kana ma tae jette ufii ingabini.

²⁰Waan gaargala keesa si buusa intolchini, wollaala akasi suni maro lama iti deebite intolchini.

²¹Yo wonti ch'ufti sii toltule iti ufi d'ugefate gula ufi inded'ini,

²²yo ch'ufa ejata ufi eegad'i.

²³Waan tolchitu ch'ufa keesa ufi eegad'i; yo akasi taate ya seera Waaqa guute.

²⁴Nami Seera Aabbo Waaqa d'ugefatu seera suni ch'ufa inguuta, yo atini Aabbo Waaqa d'ugefatu woma ind'abdu.