Read BORANA BIBLE – KITAABA WAAQA Sira 34 Bible Online

Sira 34 - BORANA BIBLE – KITAABA WAAQA bible

Sira 34

¹ Nami woma imbeenne daalleeni waan injire d'aabate akasini sobame, ammalle oobjule gula woqa.

²Nami waan oobju ch'ufa gula deemu nama gaandidu harkaani qabu fed'u ka yokhaani bubbe reebu jiru.

³Wonti oobjuni argani seeruma waan daawiti keesani argani.

⁴Akuma wonti t'uri inqamne waan t'uri qaba keesa imbaane, wonti injirelleeni waan jira keesa imbaane.

⁵Oobjuufi tolchafi falfali waan daallumati, woma garaani si fed'u ch'alla keesati garta.

⁶Yo Waaqi d'ugaa si oobjachiise male oobju d'ibi odule inkaasini.

⁷Nami hedduuni oobju d'aabate, akasini isiini isa sobde balleesiti.

⁸Seeri Waaqatu ingaa wonti akasi suni d'ugaaniti woma iraa inqabani, akasuma qaroomi nami d'ugaa qajeelani dubbatu ingaa waan d'ibi biraani infed'ani. Deemma

⁹Nami guddo karaa deemu ka waan heddu arge d'agaye waan heddu barate, waan hubate dubbata.

¹⁰Yo atini arga d'ageeti womatu inqamne guddo wo imbeetu, ammo deemaani guddo wo si barsiifti.

¹¹Imaltu tiyya keesa anini waan heddu arge barad'e ka dandae afaani kiyyaani inhimne.

¹²Anini maro heddu lubbu keesa seene, ammo maruma argaa d'ageeti qabuufi jala bahe. AABBO Waaqa sodaad'a

¹³Worri Aabbo Waaqa sodaatu ka abdi isaani nama worra baasu ira keeyatu injiraata.

¹⁴Yo Aabbo Waaqa sodaatu waan d'ibi tokole insodatini. Yo isa d'aabate, waan tokole keesati indaafantu.

¹⁵Nami Aabbo Waaqa sodaatu ayyaana qaba, wonti akanatiifi inni fulla qarqaarsi jiru imbeekha.

¹⁶Aabbo Waaqi nama isa jaalatu aka dansa tisse jabeese qorqorata. Inni gaadisafi dao taefi adufi bubbe ira d'owe gufufi jigatille d'owa.

¹⁷Inni garaa jabeese fuula diriirse fayyafi jabeennafi eeba kennaafi. Sorio Waaqa baasani

¹⁸Yo atini hori kara dabatini argate sorio Waaqa baafte, sorioni sunini ya ajoofte Waaqi sira infud'atu.

¹⁹Aabbo Waaqi gubbaa sorio nami Waaqi imbeenne baasu ira ingammadu; ato haguma fed'anile sorio Waaqa baasani wonti sunini ch'ubbu worra ind'it'u.

²⁰Nami hori hiyyeesa dura hate hori suni Waaqa sorio baasu, seeruma nama ilma iluma abba durati ijeesuti.

²¹Hiyyeesa sagaleeni lubbu, nami sagale suni harka isaati fuud'e nama harka d'iigaati.

²²Nami waan nami buluni harka nama fuud'u, ka yokhaani nama isaa hojatu hori d'owartu seeruma nama nama ijeesuti.

²³Yo waan nami toko jaare toko d'ufe ch'absu, worri lachu hujini duu male maani keesa argate.

²⁴Yo waan nami toko eebisu, toko abaaru Aabbo Waaqi jara kana lamaani ineebisu.

²⁵Yo atini reefa tut'e bisaani d'iqatte ufi qulqulleesite, ammalle tut'e, bisaani atini d'aqate sunini maani sii baani?

²⁶Yo atini ch'ubbu tanteti jette ufi agabsite ammalle gargalte ch'ubbu tolchite ufi agabsitini sunini mal sii baati? Yo atini seetu eennuti kad'acha tante suni sii d'agaya.