Read BORANA BIBLE – KITAABA WAAQA Isaya 14 Bible Online

Isaya 14 - BORANA BIBLE – KITAABA WAAQA bible

Isaya 14

¹AABBO Waaqi ammalle gumi ufii ta Israeliti nahe, worra fohate, ka ufi tolfate, lafa isaani ta qara taaniti deebise, achiti worra qubsisa. Nami gosa d'ibileeni d'ufe worra woliini taa.

²Gochiti hedduuni worra Israeli qarqaarte, lafa AABBO Waaqi worraa kenneti deebifte, duuba achiti gochiti sunini tisse worra Israeliti taati. Worri duri worra Israeli boojie, amma worra Israeliti boojie, worra qara worra dabse mohata.

³AABBO Waaqi gaargalaafi d'ukubsachaafi huji jajabdu worra Israeli hojachiisani ira hafuura baasafi.

⁴Hojja inni akasi tolchu worri ha hayyu Babiloni goyeese waan jed'u: Hayyuuni nama dabsu ya bade, deebie nama indabsu!

⁵AABBO Waaqi irre worra ch'ubbu ka lafa mohatu ya iraa hobaase,

⁶worri sunini qara dallansuuni biyya dabse, gosa dabsate sunile taka gaargalchu illakimne.

⁷Ammo amma tana lafti ch'ufti yayu nagaya argatte, nami ch'ufti gammadaani sirbuti jira.

⁸Mukha d'ed'eeraafi hind'eesi Lebanonileeni hayyu balleesani suni iraa gammada, wonti akanatiifi inni ya bade, nami amma deebie worra ch'iru injiru!

⁹Booliti ekhera kurfefachu jirti, aka hayyu Babiloni liqimsitu. Ekheraani nama duri lafa irati irre qabu ya wolmarte, ekheraani hayyootaa barch'uma ufi iraa kau jirti.

¹⁰Ekheraani sunini isa yaamte waan jettu, Atinileeni amma akuma keenna laafa! Nu amma ya nama takaa taane!

¹¹Duri kiraari d'aaniti si faarsani, ammo amma tana atini yayu fulla ekhera tanaani baate. Atini sire raamo ira rafte woya hiifa uyifatta.

¹²Hayyu Babiloni, bakalcha ganama, atini yayu gubbaa gabuute! Atini duri gosa heddu dabsatte ammo amma tana yayu lafa si buusani.

¹³Atini garaa kanketi, Anini gubbati olgale, barch'uma kiyya, ka hayyuma, urji gubba ira taa jetta. Ammalle anini gaara mirga fulla iti wolwoldaani taa jetta.

¹⁴Anini fiit'e dumansa kore Waaqa gudda fakaad'a jetta.

¹⁵Ammo fulla boola Ekheraatini si d'ufani, hunda boola si buusani.

¹⁶Ekheraani si millate, si mamte waan jettu, Nami duri lafa chochoose hayyoota holachiise kana?

¹⁷Nami dira ch'ufa balleese lafa ch'ufa aloo tolche kanuma? Nami nama boojie, tokole baasu dide, d'uguma kana?

¹⁸Hayyooti lafaa ch'ufti irreesa ufi dadansa qabdi,

¹⁹ammo atini irreesa inqabdu, reefa kankele alaati gatani akanumati shama. Reefa askarti had'iisa keesati hobaate ya reefa kanke gubbaa naqani, woliini boola d'akhaati jissani, lafati d'id'iitani.

²⁰Waan atini lafa tante balleesite, nama kanke fit'eefi, aka hayyoota d'ibi awaala dansa inargattu. Nami worra keeti, ch'ubbichi tokoleeni, ka bahu injiru.

²¹Maro ababooti ilmaani hayyu kana ch'ubbu tolchiteefi ilmaani isa tana ha fit'ani, ilmaani tunini tokoleeni lafa mohatte dira heddu injaaratu.

²²AABBO Waaqi guddaani waan jed'u, Anini dira Babiloni had'e, balleese ona tolcha. Anini waan tokole inhambisu, namaafi ilmaani isanile. Dubbi tana ana AABBO Waaqati jed'e.

²³Anini Babiloni ch'affa lafa tolche, urunguni iti galti. Anini Babiloni haraa waan ch'ufa haruuni hare balleesa. Dubbi tana ana, AABBO Waaqa guddati jed'e.

²⁴AABBO Waaqi guddaani yayu kakhu kakhate waan jed'e: Wonti anini herege inuma taati, wonti anini malad'e inhanqatu.

²⁵Anini worra Ashuru lafa tiyya keesaa balleese, gaareeni tiyya gubbati ira ejaanjad'a. Anini worra kiyya qaampara worra Ashuru iraa baase ulfinna worri baatu iraa fuud'a.

²⁶Kunini mala kiyya, ka anini lafa ch'ufati malad'e, kunileeni harka kiyya, ka anini d'eerefad'e gosa ch'ufaani gaargalchu.

²⁷AABBO Waaqi guddaani ya waan kana herege; eenuti dandae isa d'owa? Inni harka ufi d'eerefate nama balleesu fed'a; eenuti dandae harka isaa keesa deebisa?

²⁸Ganna Ahazini due, Waaqi d'aamsa kana biyyati d'aame waan jed'e:

²⁹Isani worri Filisti, waan uleeni isani d'oofte ch'abt'eefi ingammadina. Hojja bofi toko duu, ka hagasi ira hammaati fulla suni d'alata. Wonti bofi sunini d'alu bofa barisu.

³⁰Nami nama ch'ufa ira hiyyeesa d'eeda argate, ka woma inqamne nagayaani taa. Ammo AABBO Waaqi beela hamtu isani worra Filistiti erge, nama tokole bahu d'owa.

³¹Laalefad'a, boha, dira Filisti ch'ufa! Isani ch'ufti mudama! Awaarti guddooni kaate mirgaa d'ufti. Awaarti sunini duula ka daafanani tokoleeni keesa injirre.

³²Nama Filisti ka nuti ergani, maani jennaani? Woni nu jennuuni, AABBO Waaqi yayu Sioni jabeese jaare; nami isaa ka gaargala qabu achiti baqata.