Read BORANA BIBLE – KITAABA WAAQA Isaya 15 Bible Online

Isaya 15 - BORANA BIBLE – KITAABA WAAQA bible

Isaya 15

¹Kunini d'aamsa waan worra Moabu ka d'aamani. Diri Aritifi ka Kiri halkani toko balleesani badiini hamtuuni ya lafa Moabu qabate.

²Worri Diboni gaara kore fulla woyyuti boha. Worri Moabu laalefate nami ch'ufti matafi areeda haadate, dira Nebotifi ka Medeba iraa boha.

³Nami woya ch'arqi naqate kara dira keesa yae, ballinna diratifi mana gubbaleti laalefatani bohani.

⁴Worri Heshbonitiifi ka Eleale aka male lalabe bohe, boha worraa Yahasaleti d'agayani, Askartileeni garaa laafte holate.

⁵Garaani kiyya Moabu boha! Biyyiti yayu dira Soritifi ka Eglathi Shelishiati baqatte. Ta gari kara Luhithi boha yaate, ta garileeni laalefatte Horonainiti baqatte.

⁶Maddooni Nimrimu ya godde, buuyoleeni ya qanch'ooratte, wonti dotaata ch'ufti ya godde badde.

⁷Biyyiti bale gale taakite, waan ufi ch'ufa guuraate baqachu feeti.

⁸Fulla ch'ufa d'aatu seera Moabuti qonqo boha d'agayani; qonqo suni dira Egalimutifi Beerelimule keesati d'agayani.

⁹Galaani dira Diboni yayu d'iigaani diimate, Waaqileeni yayu waan hagasi ira hamtu biyya tolchu fed'e. Ee nama Moabu keesati hafu ch'ufa gogoraani d'iiga jissani.