Read BORANA BIBLE – KITAABA WAAQA Isaya 17 Bible Online

Isaya 17 - BORANA BIBLE – KITAABA WAAQA bible

Isaya 17

¹AABBO Waaqi waan jed'e, Diri Damaski bade ona taha, deebie dira intahu.

²Dira lafa Shamu haga jiru jireenna nami keesa intau diri suni fulla loonifi reeni ooltu ta nami tokoleeni ka keesaa oofu injirre taha.

³Diri Efraimu ka jabeesani jaarani bade, diri Damaskileeni finna gosa d'ibi jalati bula. Worra Shamu ka iraa hafu akuma worra Israeli ch'eersani. Dubbi tana ana, AABBO Waaqa guddati, jed'e.

⁴AABBO Waaqi waan jed'e, guyyaani ind'ufa, ka guddinni Israeli hobae, duroomi bade, hiyyumti d'uftu.

⁵Israeliini oobru mid'aani murani iraa galchani fakaati, akuma oobru bale Refaimu ta golgolani jirti.

⁶Namuma diqa ch'allati iraa hafa; Israelileeni mukha ejersa ka mid'aani iraa guurani, mid'aani lamafi sadi ch'allaani fiit'e gubbati hafani fakaati, yokhaani ka tatakeeni toko dame jalati hafe fakaati. Dubbi tana ana, AABBO Waaqa Israeliti, jed'e.

⁷Guyya suni biyyiti Waaqa qulqullo Israeli ka worra uume d'at'e qarqaarsa kad'atti.

⁸Worri deebie waan sorio irati baasani, ka harka ufiitini mid'aasani, inabdatu, yokhaani waan ufiini mid'aasani inheregatani — akheekha waaqa Ashera jed'anitifi waan hit'aana irati aarsani.

⁹Hojja guyyaani sunini d'ufu, dira worra ka jabeesani jaarani keesaa baqatani ona tolchani, akuma dira worri Hiritifi ka Amori lakise kaani, gaafa worri worra Israeli duraa baqate.

¹⁰Worra Israeli, isani ya Waaqa isani baase aka d'akha jabaate isani qorqorate deetani, fulla oobru woyyuma fach'aaftani waaqa gosa d'ibi kad'atani.

¹¹Ammo ato oobruuni sunini guyyuma isani fach'aaftani biqilte baatele, waan tokole iraa inargattani. Gaargalaafi d'ukuba haguma jiru infayyine male waan d'ibi inargattani.

¹²Gochiti hedduuni chochoote akuma d'awa baariini dibbifte.

¹³Gochiti akuma d'awa bisaani dibbifte d'ufti, ammo Waaqi d'owinaani worri keesa deebie, akuma awaara gaara gubba orie bade, yokhaani aka buuyo bubbeeni fuute bada.

¹⁴Galgala worri nama mudamsiisa, ammo yo lafti baritu imbada. Nami lafa teenna saame wo boojiu akasuma taha.