Read BORANA BIBLE – KITAABA WAAQA Isaya 40 Bible Online

Isaya 40 - BORANA BIBLE – KITAABA WAAQA bible

Isaya 40

¹Waaqi keesani waan jed'u, gumi tiyya garaa jabeesa, garaa jabeesa!

²Gumi Yerusalemu dubbi dansa iti dubbad'a. Waan jettaniini, gaargali keesani guddaani ya hobae, daba keesani amma la isanii araaramani. Anini maro daba keesanitifi yayu guddo isani gaargalche.

³ Qonqooni toko lalabde waan jettu, lafa aloo keesati daandi AABBO Waaqaa mid'aasa! Lafa gamooji keesa kara qajeela Waaqaa mid'aasa!

⁴Bale ch'ufa duucha, gaareeni ch'ufa diqeesa, lafaani woli fakeesa; duuba akanaani kubileeni ch'ufti diida taate, lafti gooro qaqabdu ch'ufti dirirte qajeelti.

⁵Duuba guddinni AABBO Waaqa mullate nami ch'ufti arga. Nami dubbi tana jed'e AABBO Waaqa.

⁶ Qonqooni toko waan jettu, Qonqo tana biyyati lalabi! Qonqooni anini biyyati lalabu tami? Qonqooni suni tana: Nami ch'ufti aka buuyo jira, mid'aagumti isaanileeni akuma daraara jirti.

⁷Buuyooni gogodde, daraaraani bada, hojja qilleensi AABBO Waaqa worra d'au. D'uguma bultiini namaa haguma buuyoti, yoosu hobaati!

⁸Ee, d'uguma buuyooni gogodde, daraaraleeni imbada, ammo dubbini AABBO Waaqa keenna haga jiru jireenna teeti.

⁹Ee Sioni, gaara gubbaa kori, odu dansa odeesi! Ee Yerusalemu, qonqo guddooni lalabi, odu dansa odeesi! Dubbi insodaatini lalabi waan dira Yudatini jettu, Waaqi keesani kunooti!

¹⁰Me ilaala, AABBO Waaqi guddaani irreeni d'ufu jira, aka lafa mohatu; inni gumi harka nyaapa keesaa baaseni d'ufuu jira.

¹¹ Inni aka tissituuni hori tissitu gumi ufi tissu jira; ammalle ilmoole wolti guure hampaare qomati qabata, hawani isiile laanuma bobaasa.

¹²Eenuti dandae bisaani baariini guddinna isaani haga beekha? Yokhaani eenuti dandae gubba harka ufitini d'und'uma d'aa? Eenuti dandae biyye lafaa ch'ufa muduunu tokoti deebisa? Yokhaani gaareenifi kubilele ch'ufa miisana taka irati biima?

¹³ Eenuti dandae AABBO Waaqa gorsa? Eenuti dandae isaa barsiise Yokhaani woi iti hima?

¹⁴Waaqi beekhaafi hubachaafi mala woini tolchani eenu ira fud'ata?

¹⁵AABBO Waaqa durati gochiti ch'ufti woma keesa injirtu, d'impu bisaani fakaati. Lafti fago ta bisaani jiddu jirtuleeni akuma awaara sablatti.

¹⁶Bineensi badda Lebanoni keesa jiruleeni ch'ufti sorio Waaqa keennaa baasani ingahu, mukhi isiileeni qoraani ibidaa ingahu.

¹⁷Gochitileeni isaa durati womaaniti, yokhaani woma keesa injirtu.

¹⁸ Waaqa eenuni woli bira qabani? Yokhaani eenuti dandae aka inni jiru namati hima?

¹⁹Inni waan hogeesi harkaani mid'aaseeniti. Yokhaani ka tumtuni Worqiini mid'aasite, waan qarsiini mid'aasani jala dad'abdeeniti.

²⁰Nami irre qarsifi worqiini horatu inqamne mukhu inhuroomne filate hogeesa dansati geese, akheekha inqaarine mid'aafata.

²¹Isani imbeetani? Isani ind'ageenne? Aka lafti duri uumamte ammalle imbaranne?

²²Nami uume nama barch'uma isaa ira gubba waan ch'ufaa tau; nami isa jalati didiqaate tut'i fakaata. Inni gubba aka golla ballise, aka waaro nami keesa tau tolche.

²³Inni nama irre qabu, ka lafa fidu, balleese, nama woma keesa injirre tolcha.

²⁴Worri mukha diqaya d'io oobrani, ka hidda imbaasini, fakaata. Yo AABBO Waaqi bubbe gadi ergu, gogoge aka bua buuyo bubbeeni fuuti.

²⁵Waaqa qulqullo, eenuni wolbira qabani? Nami aka isaa lafa keesa injira?

²⁶Me gubba ilaala, urji isani agartani tana eenuti uume? Nami uume isuma, ka isi tokotokooni gayaasu; inni haga isii imbeekha ammalle ch'ufa maquma isiitiini yaama! Irreeni isaa guddo jabdu, tanaafi urjini suni tokoleeni imbaddu!

²⁷Ee Yakobo, atini maanifi gungumte, AABBO Waaqi gaargala kiyya imbeekhu yokhaani yo na dabsanile, inni woma ira inqabu, jetta?

²⁸Isani imbeetani? Isani ind'ageenne? AABBO Waaqi Waaqa haga jiru jireenna jiru; lafa ch'ufa haguma geetuuni isumati uume. Inni dad'abe illaafu. Nami tokoleeni herega isaa inhubatu.

²⁹Inni laafafi dad'aba jabeesa.

³⁰Ijoolleeni lalaafte, kaimileeni gagagaba;

³¹ammo nami AABBO Waaqa d'ugeefate isa eegatu deebie irre argata. Worri akuma risa barisaa, orie indad'abu; yo miilaani yaule yae indad'abu.