Read BORANA BIBLE – KITAABA WAAQA Isaya 44 Bible Online

Isaya 44 - BORANA BIBLE – KITAABA WAAQA bible

Isaya 44

¹AABBO Waaqa waan jed'u, Israeli hojatu tiyya, na ch'aqasa, gumi anini fohad'e ta d'aloota Yakobo.

²Anini AABBO Waaqa, ka isani uume; haguma gaafa isani d'alattaniti anini ya isani qarqaare. Insodaatina isani hojatu tiyya, gumi tiyya ta anini jaalad'e fohad'e.

³Anini lafa d'eebicha bisaani iti buuse lafa goddule laga yaasa. Anini lubbu tiyya ijoolle teesani ira buuse, d'aloota keesanile eebisa.

⁴Worri aka buuyo ch'affa keesati baatu bahe, akuma gale afaani laga bisaaniti baatu lata.

⁵Nami toko, Anini ka AABBO Waaqa ufiini jed'e, ka d'ibileeni, Anini ka Yakobo ufiini jed'a, Ka d'ibileeni harka ufi irati, Anini ka AABBO Waaqa jed'e t'aafe, maqa Israelitini ufi yaama.

⁶ AABBO Waaqi, ka worra Israeli fide qorqoratu, AABBO Waaqi guddaani waan jed'u, Anini ka qarati, ammalle ke eegeti, ana male waaqi d'ibiini tokoleeni injiru.

⁷Eenuti dandae waan anini tolche tolcha? Eenuti dandae aka kiyya waan qara tahefi waan takaa tana taha fage hima? Yo nami akasi jiraate ha himuti.

⁸Insodaatina, imudamina, gumi tiyya. Isani haga duritifi haga arrale aka anini waan taha hime imbeetani? Isanileeni amma d'uga tiyya. Na male Waaqi d'ibiini injira? Waaqi irre qabu d'ibiini, ka anini imbeenne, injira?

⁹Nami waan harkaani boch'ani waaqa tolfatu woma keesa injiru, wonti worri mid'aafate kad'atu sunileeni woma imbaatu. Nami waan akana kana kad'atuleeni balla, ammalle woma imbeekhu — worra inuma ch'eersani.

¹⁰Eenuti waaqa ufi mid'aafate akheekha isaa tolfata, ka wonti sunini ufiftu woma isaa imbaane? Nama waaqa suni kad'atu ch'ufa inch'eersani.

¹¹Worri akheekha suni tolfatu namuma, waan d'ibiniti. Worri ch'ufti ha d'ufuti aka dubbi isaani qorani. Worra mudamsiisaniti ch'eersani.

¹²Tumtuni sibiila fuute, ibida keesa keete tumti. Inni harka ufi jabaani burrisa fuud'e, sibiila suni tume mid'aasa; huji suni irati inni beelae d'eebote dad'aba.

¹³Hogeesi mukhaleeni mukha biime, waan boch'u fed'u gangeese, aka dansaa qotooni boch'e, hoot'oni qulqulleese, akheekha namaa mid'aaga, ka mana keesa keeyatu, mid'aasa.

¹⁴Inni hind'eesa badda keesaa ch'ire, yokhaani gaddafi harufa badda keesaa mura. Yokhaani hind'eesa bokayaani eege oobrafa.

¹⁵Duuba nami mukha taka ira gama toko qoraani tolfate gama toko boch'e waaqa tolfata, ammalle gama toko ibidaani bobeese nafaani owifate qit'aani d'aabata; gama kaani d'ibi waaqa tolfate kad'ata.

¹⁶Mukha suni haga toko qoraani tolfate ibidaani bobeesa; fooniini wot'alate nyaate quufa. Duuba ibida qanqamate waan jed'u, ahi badaa, owi ibida kunini akami dansa!

¹⁷Inni kuta mukha ta hafte taani fuud'e boch'e, waaqa tolfate, durati ga jed'e kad'ate, waan jed'u, Atini Waaqa kiyya, na baasi!

¹⁸Nami akana kunini ch'ufti raatu, waan tolchuu jiru imbeekhu, worri suni qalbiifi ila ch'ufate d'uga argu dida.

¹⁹Inni qalbi qaabate, yokhaani nama wobeekhu taate, Anini mukha suni gama toko qoraani tolfad'e, ch'ile ibida irati qit'a d'aabad'e, fooni wot'alad'e nyaad'e, kuta mukha ta hafte taani waaqa tolfad'e badaa anini jirma mukha durati gajed'e kad'ad'a injed'u.

²⁰Nami akana kunini namuma daara nyaatu fakaata. Daallumti isaa isa balleesite qarqaarsa isa d'owarti. Inni aka wonti inni harkaani mid'aafate kad'atu sunini waan d'ara, ka waaqa intahini, ee injed'u.

²¹AABBO Waaqi waan jed'u, ee worra Israeli, waan kama qaabad'a; isani hojatu tiyya, inded'ina. Anini isani uume hojatu tiyya isani tolche haga jiru jireenna deebie isani inded'u.

²²Anini ch'ubbu teesani yayu aka dumansa dabarse; nati deebia, nami isani baasu anuma.

²³Ee gubba gammadaani sirbi! Ee lafa, lalabi! Ee gaareeni, gammadaani sirba, mukeeni baddaleni ch'ufti ha sirbitu! Wonti akanatiifi AABBO Waaqi Yakobo baase, Israeli keesa guddinna ufi garsiise.

²⁴Anini AABBO Waaqa, ka isani baase; anumati isani uume. Anini AABBO Waaqa, ka waan ch'ufa mid'aase gubbale qofuma tiyya dirirse; gaafa anini lafa mid'aase namu na inqarqaare.

²⁵ Anini dubbi falfalticha d'aareese dubbi nama ayyaana hedule balleesa. Anini dubbi worra qaro lafa buuse, qarooma worrale daallesa.

²⁶Ammo hojja hojattuuni tiyya woi faddu, yokhaani hojja anini nama erge, beeni, herega kiyya biyyati himi jed'uuni, anini heregaafi fagisa suni inguuta. Anini waan Yerusalemuni jed'u, Nami deebie siti qubata; ammalle waan dira lafa Yudatini jed'u, Nami deebie isani jaara. Diri sunini ch'ufa ka qara bade ona tahe ammatana deebie dira dansaa taha.

²⁷Anini waan bisaani baariinitini jed'u, gogoga, anini galaana keesanile ingogossa.

²⁸ Anini waan Koreshini jed'u, Atini tissitu tiyya, waan anini fed'u ch'ufa naa tolchita; atini Yerusalemu jaara, Mana Waaqale yayaba jetta.