Read BORANA BIBLE – KITAABA WAAQA Isaya 46 Bible Online

Isaya 46 - BORANA BIBLE – KITAABA WAAQA bible

Isaya 46

¹Muummeeni waaqoota Babiloni tana! Belifi Nebo ka duri kad'atani amma harreeti faani baa ulfa hori dad'absiiftu iti, tahani.

²Wonti harkaani boch'ani suni dandeete ufi imbaaftu; yayu guurani boojiani gara d'ibi geesani. Muummeeni waaqoota Babiloni tana!

³Isani d'alooti Yakobo, ka gumi tiyya iraa hafe, na ch'aqasa. Haga isani d'alattani asi anumati isani qorqorate.

⁴Anini Waaqa keesani, ka haga isani jaartani arri baaftaniti isani qorqoratu. Anumati isani uume, ammalle isani qorqorate isani qarqaare isani baasa.

⁵AABBO Waaqi waan jed'u, Isani anaafi eenu woli bira qabattani? Nami aka kiyya d'ibiini injira?

⁶Nami borsa ufi bane worqi ga jisse miisana irati qarsi biima. Tumtu worqitii hori baasani, waaqa nu mid'aasi jed'aniini; duuba durati gajed'ani kad'atani! Jennaani gurmu ira keeyatani baatani, fulla iti mid'aasani achi dad'abani, duuba inni ka inchochone artuma eja.

⁷Yo nami d'ufe kad'atele, inni indubbatu, yokhaani gaargala keesaa isa imbaasu.

⁸Isani worri ch'ubbu, waan kana qaabad'a, waan anini tolchele herega.

⁹Waan duri tahe qaabad'a, Waaqi anuma, ka d'ibiini injiru. Anini Waaqa, nami aka kiyya d'ibiini injiru.

¹⁰Anini duriyu waan takaa tana taha fage; haguma duriti waan lafti taatu hime. Anini waan jed'e, mali kiyya inhanqatu wonti anini herege guutamtu male inteetu.

¹¹Anini nama ilaboruuti gayaama, ka aka qoree wo bute waan anini herege ch'ufa guutu. Anini yayu jed'e, inuma guuta, yayu herege, inuma tolcha.

¹²Me na ch'aqasa, worra mata jajaba, ka waan dabsachaani fago jirtu sehu.

¹³Anini guyya dabsacha ya gad'ieese. Guyyaani sunini fago injiru. Baafami kiyya inturu. Anini Yerusalemu baase, achiti worra Israeli gurra iti tolcha.