Read BORANA BIBLE – KITAABA WAAQA Isaya 48 Bible Online

Isaya 48 - BORANA BIBLE – KITAABA WAAQA bible

Isaya 48

¹Worra Yakobo, ka Israeli jed'aniini, ka d'aloota Yuda, na ch'aqasa: Isani maqa AABBO Waaqatini kakhatani Waaqi Israeli Waaqa keenna jettani, ammo dubbini sunini d'ugaaniti, garaa inqabdani.

²Ammo ha taatu, isani kiyyibdani, Nu worra dira qulqullo keesa tau, ka AABBO Waaqa gudda Israeli d'aabbatu ufiini jettani.

³AABBO Waaqi waan worra Israelitini jed'u, Anini duriyu waan taha namati hime duuba waan suni yoosu tassa tolche guute.

⁴Anini aka isani mataa jabaatani aka sibiila taatani, additi teesani aka sibiila jabaatu imbeekha.

⁵Tanaafi anini duri waan isani takaa tana taatani isaniti hime, ato isiini intahini isani beesise, aka isani, waaqa nu harkaani boch'anne akheekha tolfanneti waan suni tolche injenne.

⁶Wonti anini qara hime taani ch'ufti yayu guutamte, amma dandeetani moromtani? Amma anini waan hareeti gad'ufa isaniti hima, dubbi d'ossani ta qara isani imbeenne.

⁷Wonti sunini waan anini amma tolchu ch'alla; wonti akana takaa duraani intaane. Ato sila taate isani, Nu waan isii qara ya beenne jettani.

⁸Anini imbeekha, aka nami dandae isani ind'ugeefanne yokhaani aka isani haguma duriti dubbi namaa diddani. Wonti isani waan kana ind'agayinifi tana, yokhaani wonti dubbini suni gurra keesa isani imbuinifi suni.

⁹Anini dallansu ufi d'owe dallanu dide isani balleesu lakisa aka akasiini nami na faarsu.

¹⁰Akuma qarsi ibida keesati bassani, anini ibida keesa isani buuse isani ilaalad'e. Ammo aka isani woma keesa injirre yayu arge.

¹¹Anini waan tolchu kana ufumaafi tolcha. Anini akami dandae aka maqa kiyya balleesani ee jed'a? Anini akami guddinna kiyya nama d'ibiti dabarsa?

¹² AABBO Waaqi waan jed'u, Ee Yakobo, na ch'aqasa, worra Israeli ka anini yaame! Anini Waaqa, ka qaraatifi ka eegeleni anuma!

¹³Anini harka kiyyaani lafa yayabe gubba dirirse. Lafafi gubbaleeni hojja anini yaamu maro tokotu d'ufte na dura ejiti.

¹⁴Isani ch'ufti wolti baha, na ch'aqasa! Waaqi tokoleeni, ka aka nami anini fohad'e kunini Babiloni had'u fage injiru; nami suni waan anini fed'u male waan d'ibi intolchu.

¹⁵Nami isaani dubbate isa yaame anuma; anumati isaani d'ufe waan ch'ufa isa dabsachiise.

¹⁶Ammatana nati d'iaad'a, dubbi tiyya d'agaya. Anini haguma duriti takaa d'ossaani indubbanne, dubbi tiyyale ch'ufa la guute. (Ammatana AABBO Waaqi guddaani yayu jabeenna ufi naa kenne na erge.)

¹⁷Waaqi qulqullooni Israeli, AABBOONI ka isani baasu, waan jed'u: Anini AABBO Waaqa keesani ka dansuma teesaniifi isani barsiise, kara isani yau maltani isani qajeelchu.

¹⁸Ato sila seera kiyya ch'aqaftani, nageenni aka galaana haguma jiru inch'inne isaniti yae, d'ugaani teesanileeni akuma d'awa galaana isaniti d'ufti.

¹⁹Ilmaani teesani heddatte, akuma maansa galaana taate, maqaani worrale haga jiru na duraa imbadu.

²⁰ Babiloni keesaa yaa, worra Babiloni duraa baqad'a! Odu tana gammadaani lalaba odeesa, muumme lafale geesa; AABBO Waaqi yayu hojatu isaa Israeli baase jed'a.

²¹Gaafa inni gumi isaa lafa aloo ta gamooji keesani deeme worri ind'eebonne. Inni siida d'akha keesaa bisaani baase, d'akha falaansinaani bisaani gabaafatani.

²² AABBO Waaqi waan jed'u, ch'ubbichi nagaya inqabu.