Read BORANA BIBLE – KITAABA WAAQA Isaya 49 Bible Online

Isaya 49 - BORANA BIBLE – KITAABA WAAQA bible

Isaya 49

¹ Na ch'aqasa, gosa lafa fago teetu ch'ufa! Ato anini ind'alatini AABBO Waaqi na fohate hojatu na tolfate.

² Inni dubbi tiyya aka goraade qara iti tolche, harka ufitini jabeese na qorqorate. Inni aka t'iya na tolche, katelati na galche, kurfeese oli na kaye.

³Duuba inni waan nani jed'e, Ee Israeli, atini hojatu tiyya, maro teetifi biyyiti na faarsiti.

⁴Anini waan jed'e, Anini ya wo hojad'e, ammo wonti sunini woma imbaane! Anini irre tiyyaani wo tolche, ammo isiini lafumati badde. Ammo hataatu, anini d'uga gara AABBO Waaqati qaba; inni maro woi anini isaa tolchufi galata naa kenna.

⁵Ato anini ind'alatini, AABBO Waaqi na fohate, hojatu ufi na tolche aka anini worra Yakobo galche, worra Israeli ch'ufa fuud'e isati deebisu. AABBO Waaqi guddinna naa kenne, irre naa tahe na jabeese.

⁶ AABBO Waaqi waan nani jed'e, Anini huji jabdu sii kennu qaba, hojatu tiyya. Atini worra Yakobo galchite, worra Israeli ka hafe guddinnati deebifte; ammo hagasi ch'allaniti, anini ifsa gosa ch'ufale si tolcha, aka akasiini lafti ch'ufti baafama kiyya argattu.

⁷Waaqi qulqullooni Israeli, ka worra baasu, waan nama tufatani, ka gochiti ch'ufti jibbite hayyooti hojattu tolfateeni jed'u: Hayyooti si agarte, si dura kaate, sii saalfati; ilmaani hayyootaleeni akasi agarte si durati gajejette si guddifti. Wonti woni kunini taatufi waan AABBO Waaqi hojatu ufi fohate Waaqi qulqullooni Israeli kakhu ufi guutufi.

⁸ AABBO Waaqi waan gumi ufitini jed'u, hojja guyyaani isani baasani gahu, anini isanii nahe, kad'acha teesani isanii d'agaye isani tisse isani qorqorad'e, kara keesanini gosa ch'ufa wold'aqisa woliini tolfad'a. Lafa teesani ta amma badde ona taate tana keesa deebise isani qubachiisa.

⁹Ammalle anini waan jara hid'aansa keesa jiruni jed'u, Ga baha! Worra dukana keesa jiruleeni waan jed'u, Ifsaati ga baha! Worri akuma hooliye gaareeni gubba oole, adaala kubii ch'ufa ira d'eeda.

¹⁰ Worri deebie beelae ind'eebootu. Aduufi owi lafa alooleeni worra woma intolchu. Wonti akanatiifi nama worraa nahuti worraani deeme madda bisaaniti geesa.

¹¹Anini gaareeni gubbati kara gudda tolche, kara gumiini tiyya gula yaatu mid'aasa.

¹²Gumiini tiyya fago d'ufti, mirgaafi gama ila adule, ammalle gara Aswani ta bitale d'ufti.

¹³Ee gubba, sirbi, ee lafa gammadi, lalabi! Gaareenileeni ha farqatte sirbitu! AABBO Waaqi gumi ufi jabeese, nama isaa ka gaargala qabu naha.

¹⁴Ammo worri Yerusalemu waan jed'e, AABBO Waaqi yayu lafa na buuse! Inni yayu nu ded'e.

¹⁵Duuba AABBO Waaqi waan jed'uuni, Niitiini daima ufi ka d'alte indeeti? Yokhaani ilmaani isiini d'alte nahu indiddi? Ato isiini deetele anini haga jiru isani inded'u.

¹⁶Ee Yerusalemu, anini haga jiru dandae si inded'u! Anini yayu maqa kanke gana harka kiyya irati t'aafad'e.

¹⁷Nami deebie si jaaru d'ufu jira, nami si balleesu si biraa deema.

¹⁸Ufi d'aatu millad'i, waan tahuti jira ilaali! Worri kanke ya wolti bahe, gara kanke d'ufuu jira! Anini maqa Waaqa jirutini kakhad'a, atini akuma intalti fuud'ani faaya isiitiini shoobdu worra keetiini shoobda.

¹⁹Lafti tante qara ya badde ona taate ammo amma diqaate nama d'ufe iti qubatu fuud'u dad'abdi. Ammalle worra si balleese ona si tolche kaani siraa fageesani balleesani.

²⁰Ilmaani tante ta gaafa worra kanke boojiani kaani d'alate, guyya toko waan siini jettu, lafti tunini ya nuti d'ipate, fulla ballo nu keesa teennu nuu kenni.

²¹Duuba atini waan ufiini jettu, Eenuti ilmaani tana ch'ufa naa d'ale? Anini ilmaani tiyya ya d'abe, ta d'ibile dandae ind'alu. Na boojiani, lafa d'ibi na geesani — ilmaani tana eenuti guddise? Kobuma na lakisani — ilmaani tunini eesa baate?

²²AABBO Waaqi guddaani waan gumi ufitini jed'u, Anini gosa ch'ufa akheekha agarsiise harkaani yaama, duuba worri ilmaani teesani ta dubraatifi ta d'iirale baate worraa keesani galcha.

²³Hayyooti abba isaanii taate, hayyitiini ch'ufti hawani isanii taati. Worri isani durati jilbifate isani guddise guddo isanii saalfata. Duuba isani akasiini aka anini AABBO Waaqa beetani; nami qarqaarsa kiyya eegatu ch'eera inargatu.

²⁴Dandaani waan askartini saamte iraa fuud'ani? Nama nami hamani hid'e dandaani harka isaa keesaa imbaasani?

²⁵AABBO Waaqi waan jed'uuni, wonti taha sunuma. Waan askartini saamte iraa fuud'ani nama nami hamani qabe harka isaa keesaa baasani. Anini nama isani had'u ch'ufa had'e ilmaani teesani baasa.

²⁶Anini nama isani dabsu ch'ufa woli ijeesise, worri d'iiga woli aka farso d'uga. Duuba akanaani nami ch'ufti, aka anini AABBO Waaqa ka isani baase isani balchoomsu, beekhu. Ammalle akanaani Waaqa Yakobo ka irre qabu hubatani.