Read BORANA BIBLE – KITAABA WAAQA Isaya 5 Bible Online

Isaya 5 - BORANA BIBLE – KITAABA WAAQA bible

Isaya 5

¹ Haga anini sirba kana sirbe jaala kiyyaafi oobru isaa ta zabibu faarsu, na ch'aqasa: Jaali kiyya oobru zabibu qaba, ta gaara dansa gubba jirtu.

²Inni lafa qote, d'akha keesaa baase, mukha zabibu dadansa keesati oobre. Inni doofi eeganini iti jaare, fulla mid'aani zabibu iti ch'ach'arasani mid'aase. Inni mid'aani zabibu miyao eegate, ammo mid'aani ch'ufti bushao tahani.

³Duuba amma jaali kiyya waan jed'u, Isani worri Yerusalemufi Yuda keesa tau, anaafi oobru tiyya ta zabibu wolti nu ilaala.

⁴Wonti nami tolchu ka anini intolchinifi jirti? Yo akasi taate, isiini maanifi mid'aani miyao anini heregad'e imbaasini, mid'aani bushao baafti?

⁵Waan anini amma oobru tiyya ta zabibu suni tolchu ch'aqasa; anini dallaa isiini jaarani guure, d'akhaa jaaraninile ch'ufa ch'ach'abse, bineensa alaa iti lakisa, aka inni nyaate ira ejaanjate balleesu.

⁶Anini isiini ha danqara taatu jed'e, akusumati lakisa. Anini mukha isii inkolkolu, yokhaani inharamu; mogoreefi qoraatiti iti baha. Anini dumansaleeni iti irroobiini jed'a.

⁷Worri Israeli oobru zabibu AABBO Waaqa guddati. Worri Yudaleeni mukha zabibu ka inni oobrate. Inni d'uga worra ira barbaade, ammo d'iiga jissani ch'alla irati arge. Inni qajeeluma worra ira barbaade ammo boha laalala ch'alla d'agaye.

⁸Isani la baddaani; worra mana heddu bitate ammalle oobru d'ibile iti daratu. D'iotu nami d'ibiini fulla qubatu d'abe, isani ch'allaani lafa keesa teetani.

⁹Anini AABBO Waaqa gudda, ka dubbi tana jed'u, d'agaye: Maneeni gugurdoni tunini ch'ufti ona taati.

¹⁰Zabibuni lafa eeka kud'ani irati baatu daad'i galeeni lama ch'alla baafti. Mid'aani d'ebbe kud'ani, ka fach'aasani, d'ebbe toko ch'alla d'alani.

¹¹Isani la baddaani! Isani ganama kaatani, farsoti oritani, halkani ch'ufa machaa bultani.

¹²Hojja jila tolfatani, isani, kiraariifi dibbeefi fulludo d'ooftani — daad'ile d'uddani. Ammo isani waan AABBO Waaqi tolchu womatu indaartani,

¹³tanaafi qaqabani isani boojiani. Worra keesani gugurda garaachi hobaase, biyyiti taani d'ibileeni d'eebuuni raawati.

¹⁴Booliti Ekheraa worrati beelofte, afaani iti baante nyaati. Isiini worra gugurda Yerusalemutifi gumi farso d'udde machoofte taani liqimsiti.

¹⁵Nama diqaafi guddale ch'ufa ch'eersani, nama ufi guddisu ch'ufa diqeesani.

¹⁶Ammo AABBO Waaqi guddaani waan d'uga tolche, guddinna ufii garsiise, gumi ufii qore, akasiini qulqullooma ufii mullisa.

¹⁷Dira bade ona tahe kaani keesa hooliyeeni marra d'eedde laleesileeni achi tikhata.

¹⁸Isani ya baddaani! Worra ch'ubbu lakisuu dide ufi gula hirkise yauuni,

¹⁹ka AABBO Waaqaani, Atini waan tolchu feetu hurrisi tolchi aka nu arginu. Waaqi Israeli qulqullooni ha herega ufi guutu; eegi waan inni tolchuu fed'u ilaala jed'u.

²⁰Isani ya baddaani! Worra waan hamtuuni dansa jed'e, waan dansaani hamtu jed'u; ka dukana ifsa tolche, ifsa dukana tolchu. Ka waan had'aa mieese waan miaa had'esu.

²¹Isani ya baddaani! Worra qaroo ufi seehe, Nu qalbi qamna ufiini jed'u,

²²Isani ya baddani! Worra d'ugaati daad'iti janna tahe, d'ugaati farso gosa hedduti d'iira tahu!

²³Ka nama wollaala qabu gumbo iraa fud'ate galakise, nama woma iyyakini dabsu.

²⁴Tanaafi amma tana akuma okhayafi buuyooni godduuni ibida keesati gubatu, akasuma hiddi keesani shame, daraaraani keesani goge bubbeeni fud'atti, waan isani, waan AABBO guddaani, Waaqi Israelii, qulqullooni nu barsiise, diddaniifi.

²⁵Duuba amma AABBO Waaqi yayu gumi isaati dallane, harka d'eerefate, balleesaa iti kaye. Gaareeni chochoote, reefi nama hobae aka huura kara dira keesa ch'iisa. Ato akasile taate, dallansuuni AABBO Waaqa isa ira ingaltu, ammalle harka d'eerefate nama d'aanu fed'a.

²⁶AABBO Waaqi gosa fago jirtu akheekha garsiise, worra muumme lafa jiru fiiquuni yaama. Duuba gochiti sunini hurifte utaalte d'ufti!

²⁷Worra nami tokoleeni indad'abu, yokhaani ingufatu, tokoleeni imugu, yokhaani irafu. Gurdaani worraa infuratu, yokhaani seemsaani kobe worraleeni inch'itu.

²⁸T'iyiti worraa qara qabdi, guubeeni worraleeni had'iisa kurfo jirti. Koteeni fardo worraa akuma d'akhaa jabaati, miili gaari worraa akuma bubbe utaala.

²⁹Askartini worraa akuma nyeench'a bineensa ijeese, fulla nami dandae ira imbuumnetiini baqate itanu itanti.

³⁰Hojja guyyaani sunini gahe, worri akuma bisaani galaana dibbise Israeliti baafata. Nami lafa tana ilaale, dukanaafi gaargala ch'alla arga! Ifsa ya dukanti liqimsite.