Read BORANA BIBLE – KITAABA WAAQA Isaya 55 Bible Online

Isaya 55 - BORANA BIBLE – KITAABA WAAQA bible

Isaya 55

¹ AABBO Waaqi waan jed'u, Nami d'eebu qabu ch'ufti koota, bisaani kunooti! Isani worri beese inqamne koota, mid'aani bitad'a, nyaad'a! Koota, aananifi daad'i beese male fud'ad'a!

²Isani maanifi waan isani inquufsine beese iti baaftani? Isani maanifi ka beela imbaane beese teesani baaftani? Na ch'aqasa, dubbi tiyya gula yaa, sagale sagale ch'ufa ira dansa nyaad'a.

³ Gumi tiyya, na ch'aqasa, nati koota; nati koota, jireenna argattani! Anini wold'aqisa haguma jiru jireenna jiru isani woliini tolfad'e eeba duri Dauditi kakhad'e isanii kenna.

⁴Anini hayyufi abba duula isa tolche, irre tiyya isaani worra garsiise.

⁵Isani gosa qara imbeenne yaamtani; worri qara isani imbeekhu ammo amma tana orie gara keesani d'ufa! Waan kana ch'ufa ana, AABBO Waaqa keesani, Waaqa qulqullo Israeliti, tolche, anini ulfinnaafi guddinna isanii kenna.

⁶AABBO Waaqa barbaada, hojja inni argamu, Waaqa yaamad'a, yo inni d'io jiru.

⁷Ch'ubbichi ha kara ufi lakisu, nami hameenna gula deemu ha herega ufi garagalfatu. Inni ha AABBO Waaqa keennati deebiu. Duuba inni naheefi hurrise araaramaafi.

⁸AABBO Waaqi waan jed'u, Heregi kiyya keesaniniti, karaani kiyyaafi keesanileeni gargara.

⁹Akuma gubbafi lafti gargari fago jirtu, heregaafi karaani kiyyaleeni keesani iraa fago jira.

¹⁰ Dubbini tiyya bokaya gubbaa roobe lafa jiisu fakaati, ka mid'aani baase sanyi fach'aasanifi sagale nyaatani namaa baasu.

¹¹Akasuma dubbini afaani kiyya keesaa baatu taati — isiini waan baateefi guutu male, lafati imbaddu; ammo waan anini ergeefi ch'ufa intolchiti.

¹²Isani gammadaani godaantani, nagayaani iti d'aabattani, gaareenifi kubileleeni gammadde sirba baafte, mukhileeni gammade harka d'aa.

¹³Fulla duri mogoreeni iti baatu, haruuni iti baate, fulla duri mukhi qoraati iti bahu qilt'aani iti baha. Tunini akheekha haga jiru jireenna tau taati, qaabacha waan anini AABBO Waaqi tolche.