Read BORANA BIBLE – KITAABA WAAQA Isaya 6 Bible Online

Isaya 6 - BORANA BIBLE – KITAABA WAAQA bible

Isaya 6

¹Ganna hayyu Uziani due, anini AABBO Waaqa, ka guddinna ufiitini barch'uma gubba tae, woyaani isaa dudda duubaani d'eeratte Mana Waaqa ch'ufa guuttu, arge.

²Isa d'aatu waan lubbu qaba, ka aka ibida bobaati ejaanja, ka wonti suni ch'ufti koola jaa qabdu; koola lamaani fuula d'ofatani lamaani miila d'ofatani lamaani barisani.

³Woli yaamani waan woliini jed'ani, Qulqullo, qulqullo, qulqullo! AABBO Waaqi guddaani qulqullo! Lafti ch'ufti guddinna isaatini guutamti.

⁴Qonqooni worraa yayaba Mana Waaqaa chochoofte, Mana Waaqale aari guute.

⁵Jennaani anini waan jed'e, Anini ya fafae, ya lafaa badde. Wonti akanatiifi arabi kiyya ch'ubbu ch'alla dubbata, nami nu woliini teenuuleeni ch'ubbu male waan d'ibi indubbatu. Ammo amma anini ila tiyyaani yayu AABBO Waaqa hayyu gudda, arge!

⁶Jennaani wonti lubbu qaba kaani toko nati barifte, ch'ile ibida waan hit'aana irati aarsani iraa qad'abeeni fuute,

⁷ch'ile sunini hid'i tiyya tut'e waan naani jette ch'ileeni tunini amma ya hid'i sii tut'e, ch'ubbu ya sira fuud'ani, daba yayu sii araaramani.

⁸Jennaani anini qonqo AABBO Waaqa ta, Anini eenu erga? Eenuti ergattu nuu taha jettu d'agaye. Anini waan jed'eeni, Anini kunooti, na ergad'i!

⁹Jennaani inni waan naani jed'e, Beeni, dubbi tana biyyati himi: ato haga feetani d'ageetanile inhubattani. Ato haga feetani ilaaltanile waan taha inagartani.

¹⁰Jennaani inni waan nani jed'e, Qalbi biyya tana duuchi, gurra worraa ch'ufi, ila worra bassi, aka worri woma arge yokhaani d'agaye yokhaani inhubanne. Yo sila worri akasi tahe, hegeri worri garagaleti fayya.

¹¹Jennaani anini waan jed'eeni, Aabbo wonti kunini haga yoomi taati? Inni waan naani jed'e, Haga dira ch'ufa balleesani ona tolchani, maneeni ch'ufti duwa taate, oobruuni, ch'ufti badde raasa taatuti.

¹²Anini gumi suni fageese, lafa ch'ufa duwa tolcha.

¹³Ato nama kud'ani keesa nami toko hafele, takacha sunile imballeesani; inni hunda mukha dambi ka murani fakaata. Ammalle akuma hunda suni worri Waaqaa ka d'ibiini late ga baha.