Read BORANA BIBLE – KITAABA WAAQA Isaya 64 Bible Online

Isaya 64 - BORANA BIBLE – KITAABA WAAQA bible

Isaya 64

¹Atini maanifi gubba tarsaafte gadi imbuune? Sila gaareeni si garte, mudamte si durati holati.

²Gaareeni suni holate, aka bisaani ibida irati owani okote keesati woch'ani taati. Kooti, nyaapa kanke guddinnaafi jabeenna ke garsiisi, gosa ch'ufa ufi durati mudamsiisi.

³Gaafa toko atini d'ufte, waan nama mudamsiisa, ka nu insehatini, tolchite gaareenileeni mudamte holate.

⁴Nami tokoleeni takaa Waaqa aka keeti, ka nama isa abdatu wo bahu, arge ind'ageenne.

⁵Atini nama gammadaani d'uga gula deeme kara kanke jabeese qaabatu qarqaarta. Ato atini nuti dallantele, nu daba iraa indeebine, hojja ch'ufa inuma tolchina. Ato dallansuuni tante guddo taatele, nu haguma duriti ch'ubbuma gula yaane.

⁶Nu ch'ufti nama dabaati, hujiini teenna dansaleeni ch'arqi t'uriti fakaati. Maro daba keennatifi nu baala mukha ka qanch'oorate, qilleensi fud'ate, fakaanna.

⁷Nami tokoleeni si iyaamatu, tokoleeni qarqaarsa siraa imfed'atu. Atini ya fuula kanke nu d'ofate, maro ch'ubbu teennatifi nu balleesite.

⁸Ee AABBO Waaqa, atini abba keenna. Nu d'oqe faara fakaanna, ammo atini nama isii supe mid'aasu fakaata. Atini harka keetiini nu uumte,

⁹akana nuti indallanini yokhaani ch'ubbu teenna haga jiru jireenna nuti inheregini. Nu gumi teeti, nuu nahi.

¹⁰Diri kanke qulqullooni ch'ufti ya bade lafa aloo tahe; Yerusalemuleeni ya badde ona taate,

¹¹ammalle mana keenna mid'aaga qulqullo, duri ababooti teenna keesati si faarsite, ya ibidaani gubani. Fullaani mimid'aaduni ch'ufti ya badde ona taate.

¹²AABBO Waaqa, wonti kunini ch'ufti si ind'ibdu? Atini maafi afaani qabate gaargala hagana gahu kana nuti lakifte?