Read BORANA BIBLE – KITAABA WAAQA Isaya 65 Bible Online

Isaya 65 - BORANA BIBLE – KITAABA WAAQA bible

Isaya 65

¹AABBO Waaqi waan jed'u, Anini kurfo jira, aka kad'acha gumi tiyyaa d'agau, ammo worrati na kad'achu dide male. Ammalle anini aka worri na barbaadu iti kurfo, ammo worrinu iti ingamne. Gochiti sunini takaa na inkad'anne, ato anini guyya ch'ufa, anini kunooti kurfo jira, isani qarqaara, jed'eenilee.

²Anini haguma duriti harka balliseti, worra mata jabaate, na dide, kara ufi gula yau kana yaama.

³Worri ch'ufti waan ch'eera tahe na dallansiise oobru woyyu keesati sorio baase, waaqa d'araati d'akhaye irati hit'aani aarse.

⁴Halkani worri godaafi irreesa d'aqe ekhera wo gaafate. Worri fooni booyye nyaate fuuto fooni sorio waaqa d'araati baasani d'uga.

⁵Duuba worri waan nama d'ibiini jed'u, Nuti ind'iaatiina, nuraa fagaad'a, nu intuqina, nu nama qulqullo! Worri seeruma hafuura ani baafad'u, woma keesa injiru dallansuuni anini worrati dallanu ibida haguma jiru ind'aamne fakaati.

⁶Anini qara waan worra tolchu la herege t'aafe. Anini waan worri tolche suni argaa dandae afaani inqabad'u ammo

⁷maro daba worraatifi ka ababoota worrale haalo baafad'a. Worri gaara irati sorio gubbaani baase kubile irati na arabse. Tanaafi anini waan worri tolche suni gula haalo baafad'a.

⁸AABBO Waaqi waan jed'u, Nami mid'aani zabibu dansa balleesu injiru, ammo fulla balleesu daad'i mid'aasa. Aninileeni gumi tiyya ch'ufa imballeesu nama naa hojatu anini inuma baasa.

⁹Anini worra Israeli ka gosa Yuda daraarse, d'alooti worraleeni lafa tiyya ta gaareeni d'aala. Ammalle gumiini anini fohad'e, ta naa hojatu, achi teeti.

¹⁰Duuba worri na kad'ate, loonifi reeni worraaleeni diida Sharoni gama ila adutifi bale gaargala Akori gama ilaborule tikhati.

¹¹Ammo isani worri na lakise gaara qulqullo yaala bahe waaqoota milkifi ayyaana ta Gadifi Menini jed'ani kad'atu, aka d'ibi taha.

¹²Waan anini isani yaame jennaani na jalaa didani dubbi tiyyale ch'aqasu diddaniifi, amma wonti anini isanii heregu, aka woraanani isani balleesani isani fit'ani. Isani seera kiyyale diddani hameenna fohatani gula baatani.

¹³Tanaafi AABBO Waaqi guddaani waan jed'u: Worri na kad'ate seera kiyya guutu aka dansaa nyaata d'ugaati qaba ammo isani gaargala beelafi d'eebu qabdani. Worri ingammada, ammo isani inch'eersani.

¹⁴Worri gammade sirba, ammo isani garaa hammaatani laalefatani bootani.

¹⁵Gumiini anini fohad'e maqa keesanini nama abaarti. Ana, AABBO Waaqa guddati, isani fit'a; ammo nama naa saalfatu maqa haareesa kennaafi.

¹⁶Nami lafa suni ka eeba nama ira fed'atu, maqa Waaqa d'ugaatini naa eebisi namaani jed'a. Nami kakhu kakhatuleeni maqa Waaqa d'ugaatini kakhata. Gaargali qara lafa jiru hobae deebie inqaabatani.

¹⁷AABBO Waaqi waan jed'u, Anini lafa hareetifi gubba haraa uuma. Waan duri lafa jira deebiani inqaabatani.

¹⁸Maro waan anini uume sunifi, gammada, qilit'ama. Wonti akanatiifi Yerusalemu hareetiini anini uume fulla gammada taate, gumiini isiileeni gammadi.

¹⁹Anini Yerusalemu iraa gammade, nama isiile maacha. Deebiani achiti imbohani yokhaani ilaalefatani.

²⁰Daimi ch'araqoni deebie indeebiu nami guddaleeni haga jaare hobauti lubbu ind'abu. Nama ganna d'ibba tokoti duu kaimati heregani; nama ganni d'ibba ingahiini ka due abaarsa qaba jed'ani.

²¹Mana jaaratani ke taani, oobru zabibu oobratani iraa nyaatani.

²²Mana nami toko jaare nami d'ibiini iti ingalu; yokhaani oobru nami toko oobre nami d'ibiini inyaatu. Akuma mukhi lafa irati turu, gumiini tiyyaleeni lubbu bulte lafa irati turti, ammalle worri anini fohad'e waan hojate ch'ufa bara heddu iraa gammada.

²³Hujiini worraa ch'ufti tolte eebifamti, ijoolleeni worraleeni gaargala inargattu. Ammalle anini worraafi d'aloota worrale haga jiru jireenna eebisa.

²⁴Ato worri na iyyaamanne anini d'agayaafi, ato worri tae na kad'atu jalaa qaba.

²⁵Yaifi ilmaani hoola woliini d'eedde, nyeench'ileeni aka looni buuyo nyaate, bofileeni deebie nama inyaatu. Gaara kiyya qulqullo gubbati waan hamtu intolchani yokhaani woma inijeesani.