Read BORANA BIBLE – KITAABA WAAQA Lawi 16 Bible Online

Lawi 16 - BORANA BIBLE – KITAABA WAAQA bible

Lawi 16

¹Eegi ilmaani Haruni taani lamaani kara maleeni AABBO Waaqati d'iaate akasiini doote, AABBO Waaqi waan Musani jed'e,

²Waan atini oboleesa kanke Harunini jettu, Hojja ch'ufa golla duuba dabarte, Fulla Fulla Ch'ufa Ira Qulqullo ind'aqini; wonti akanatiifi sunini fulla anini duumansa keesa namati mullad'u qadaada Sanduqa Wold'aqisa gubati. Hojja inni waan suni dide, inni indua.

³Hojja inni Fulla, Fulla Ch'ufa Ira Qulqullo seenu, inni ha jibicha korma, ka sorio dabaani ufi iraa baasanifi elemo sorio gubani baasanini d'ufu.

⁴Inni ha nafa d'iqate woya qaallu keeyatu; ubaara booftatifi hid'a booftatifi gurda booftatifi sure booftale.

⁵Ammalle inni ha gumi Israeli ira korbeeyyi lama ta sorio dabaani ufi iraa baasani baasanifi elemo toko, ka sorio gubani baasani fuud'u.

⁶Inni ha jibicha korma suni sorio qaluti aka isaafi worra isaale daba iraa fuud'ani.

⁷Duuba inni korbeeyyi taani lamaani ha fulla balbala Waaro Woyyumati AABBO Waaqa duraani d'ufu.

⁸Harunini achiti ha hit'a nama lama buusuti, toko ka Azazeli, kaani ka AABBO Waaqaa.

⁹Duuba inni korbeesa hit'ani AABBO Waaqa ira bue ha qale, sorio dabaani ufi iraa baasani baasu.

¹⁰Ammo korbeesa hit'ani Azazeli ira bue ha jira AABBO Waaqaa baasani, lafa aloo gara Azazeli ergani, aka akasiini daba gumi iraa fuud'ani.

¹¹Hojja Harunini korma kaani sorio dabaani ufi iraa baasani maro isaatiifi ka worra isaa baasu,

¹²inni ha daboola ibida, ka ch'ile miju, waan mesa fakaata kaani iraa fuud'e ammalle hit'aana tumani, ka harka miju fuud'e, Fulla Fulla Ch'ufa Ira Qulqullo taanini d'ufu.

¹³Achiti AABBO Waaqa durati inni ha hit'aana suni ibidati naquuti, duuba aari hit'aana suni qadaada Sanduqa Wold'aqisa d'ossa, aka inni arge indoone.

¹⁴Ammalle inni ha d'iiga korma suni haga toko fuud'e, quba ufitini qadaada suni gama durati fifit'e ammalle ka gari maro torba Sanduqa Wold'aqisa durati fifit'u.

¹⁵Duuba eegi inni ha korbeesa sorio daba gumitini baasani qale, d'iiga isaa Fulla Fulla Ch'ufa Ira Qulqullootini d'ufe, qadaada gubbafi Sanduqa Wold'aqisa durati fifi'uti akuma inni d'iiga korma kaani tolche.

¹⁶Akanaani inni aada Fulla Fulla Ch'ufa Ira Qulqullo, maro t'uriifi ch'ubbu gumu Israelitiifi qulqulleesani guuta. Ammalle akasuma inni Waaro Woyyuma maro isiini jiddu worra jirtu ka akasiini t'uroofte, ha tolchu.

¹⁷Haga Harunini Fulla Fulla Ch'ufa Ira Qulqullo seene aada qulqulleesa tolche gabahuti, nami tokoleeni Waaro Woyyuma keesa injiratini. Eegi inni aada suni ufiti worra isaatiifi gumi ch'ufa guute,

¹⁸inni waan mesa fakaata ka sorio irati gubani d'aqe, ha qulqulleesuti. Ammalle inni d'iiga kormatifi ka korbeesale ka garifuud'e, ha gaafa afraani mesa suni ibsuuti.

¹⁹Quba ufitini inni d'iiga suni ka gari ha maro torba waan mesa fakaata suniti fifit'u. Akanaani inni waan mesa fakaata suni ch'ubbu gumi Israeli iraa qulqulleese, qulqullo tolcha.

²⁰Harunini aada Fulla Fulla Ch'ufa Ira Qulqullootifi Waaro Woyyumatiifi waan mesa fakaata sunileeni qulqulleesani guute biraa deemnaani, inni ha korbeesa jira kaani AABBO Waaqa duraani d'ufu.

²¹Duuba ha harka lachu mata korbeesa suni gubba keeyate, wollaalafi dabaafi ch'ubbu worra Israeli hime, akanaani ch'ubbu worraa mata korbeesa suniti dabarsu. Duuba eege nami huji suni baasani ha korbeesa suni lafa alooti gussu.

²²Korbeesi suni daba worra ch'ufa fuud'e, lafa nama inqamneti geesa.

²³Duuba Harunini ha Waaro Woyyuma seene, woya qaallu, ta inni ato Fulla Fulla Ch'ufa Ira Qulqullo inseeniini keeyate taani, ufira baase achiti lakisu.

²⁴Ammalle inni ha Fulla Quilqullooti nafa d'iqate woya ufi keeyatu. Eegi suni, inni ha gabahe, sorio gubani, ta ch'ubbu isaatiifi ta biyyale balleesitu, baasu.

²⁵Ammalle gabbinna hori sorio dabaani ufi iraa baasani kaani ha waan mesa fakaata irati gubuti.

²⁶Namichi korbeesa kaani lafa aloo gara Azazeli gusse, ha woya miich'ate nafa d'iqatu, ato ollatu indeebiini.

²⁷Kormafi korbeesa sorio dabaani ufi iraa baasani baasani, ka d'iiga isaani Fulla Fulla Ch'ufa Ira Qulqullootini d'ufani dabaani balleesani, ha olla keesaa alati baasani goga, fooni, marumale ch'ufa gubani.

²⁸Nami waan suni gubuleeni ha ato ollati indeebiini woya miich'ate nafa d'iqatu.

²⁹Aada tana haga jiru jireenna ha guutani: guyya kud'anneeso ka jia torbeeso worra Israelitiifi nami gosa d'ibi ka worra keesa godaanuleeni ha ufi agabse huji ch'ufa lakisu.

³⁰Guyya suni aada daba nama iraa qulqulleesani ha tolchani aka worri qulqullau.

³¹Guyyaani sunini ha guyya guddo qulqullo tahuti, guyya worri ufi agabse huji male oolu. Aada tana bara ch'ufa jabeesu malani.

³²Qaallichi guddaani ka fohatani muudani huji abba isaa ta qaallumma iraa fuud'u, ha aada qulqulleesa suni guutu. Inni ha woya qaallu keeyate,

³³aada Fulla Ch'ufa Ira Qulqullotifi Waaro Woyyumatiifi waan mesa fakaatatiifi qaaloleefi gumi ch'ufaani qulqulleesani guutu.

³⁴Aada tana haga jiru jireenna guutu malani. Ammalle aada tana ganna ch'ufa keesa guyya toko tolchu malani, aka worra Israeli daba isaani iraa qulqulleesani. Jennaani Musani akuma AABBO Waaqi isaani jed'e kaani tolche.