Read BORANA BIBLE – KITAABA WAAQA Yeremia 14 Bible Online

Yeremia 14 - BORANA BIBLE – KITAABA WAAQA bible

Yeremia 14

¹AABBO Waaqi waan oola tana dubbate waan nani jed'e,

²Yudaani bohuti jirti, diri isi badu jira; worri dira suni laalefate ufuma lafa ch'ich'iisa worri Yerusalemuleeni iyye qarqaarsa kad'ata.

³Dureeyyiini hojattu isaani bisaani ergite, hojattuuni sunini eelaani baate, bisaani keesaa d'abde, buute duwani galti. Worri ufi jibbaate, ch'eere mata qabata.

⁴Waan bokaya d'abani lafti gogoddeefi, nami oobruleeni waan tahu wollaale laalefate mata qabata.

⁵Hidini d'altuni, raasa isiini keesa oltu, ilme isii ta d'io d'alate, maro marrii injirreefi biraa deemti.

⁶Harreeni diidaa gaareeni gubbaa ejaanjite, aka sare diida harganti, isiini sagale d'abde, ilti keesati ch'iti.

⁷Gumiini tiyya nati iyyite waan jettu, Ato ch'ubbu teenna gula gaargali kunini nuti d'ufeele, ee AABBO Waaqa, maro maqa keetiti jed'i nu qarqaari. Nu maro heddu dudda siti galle, si biraa yaane siti ch'ubbamne.

⁸Abdiini Israeli siuma; nami gaargala keesaa nu baasu si male injiru. Atini maafi lafa teenna keesati keessuma karaa deemtu, ta halkani toko ch'alla worra namaa bulte, fakaata?

⁹Atini maafi nama nami tassa iti d'ufe fakaatte, aka askarti nama qarqaaru indandeenne taate? Ee AABBO Waaqa, atini numa woliini jirta! Nu gumi teeti, nu illakisini!

¹⁰AABBO Waaqi waan gumi tana waan jed'u, Worri naraa baqachu fed'a, ufi d'owu indandau. Tanaafi anini worra inquufini; anini wollaala worri tolche qaabad'e maro ch'ubbu isaanitifi gaargalcha.

¹¹AABBO Waaqi waan nani jed'e, Worra kana qarqaari nani injed'ini.

¹²Ato worri ufi agabsele anini kad'acha worraa ind'agayufi; ammalle yo worri sorio gubanifi mid'aani naa baasele, anini waan suni iraa ingammadu. Ammo fulla suni anini worra woraanafi beelafi d'ukubaani balleesa.

¹³Jennaani anini waan jed'e, Ee AABBO Waaqa gudda, raagooti hojja ch'ufa maqa kanketini waan woraani jettu, isani woraana ingartani yokhaani imbeeloftanile; ammalle worri waan jed'u, Atini fulla tanati nagaya jiru jireenna worraa kenna, jette jed'ani.

¹⁴Ammo AABBO Waaqi waan jed'eeni, Raagooti maqa kiyyaani waan d'ara faguu jirti, anini worra inergine, yokhaani womale faga injenneeni yokhaani womale iti inhimne. Daayyani worri hime sunini naraa imbaane; wonti worri faguleeni hereguma worraa male, waan woma keesa jiraatiniti.

¹⁵Tanaafi AABBO Waaqi waan raagoota maqa isaatini faddu tana akana jed'a: Anini worra inergine, ammo worri waan jed'u woraanafi beelti lafa tana inqabattu. Ammo anini waan jed'u raagootuma suniti woraanafi beelaani hobaa.

¹⁶Ammalle worra raagooti sunini fadduufi kara dira Yerusalemu keesati d'abbani; nami worraafi nad'eeni worraatifi ilmaani worrale awaalu injiru. Anini ch'ubbu worraa worrumati deebise akasiini worra balleesa.

¹⁷AABBO Waaqi waan nani jed'e, Waan atini worraani jettu, Ilti tiyya ha halkanifi guyya imimaanini guutamte boote lakisu diddu; wonti akanatiifi gumi tiyya ya aka hama madeesani aka takaa inargini d'ukubsachisani.

¹⁸Yo anini alaati gabahu reefa nama woraanani fit'ani arga; yo anini dira d'aqule nama beelaani hobau arga. Raagootafi qaaloleeni akuma ufi huji hojati, ammo waan tau jirani imbeekhani.

¹⁹Ee AABBO Waaqa, atini d'uguma yayu Yuda jibbaatte lafa buufte? Atini worra Sioni ya jibbite? Atini maafi akana nu gaargalchite nu fayyu dad'amna? Nu nagaya barbaanne ammo waan dansa tokole lafaa d'amne; nu waan fayyinu ufi seene ammo mudamsuuni nu qabatte.

²⁰AABBO Waaqa, nu yayu siti ch'ubbamne; nu amma ch'ubbu teennafi ta ababoota teenna siti himanna.

²¹Maro maqa keetiti jed'i, nu intufatini; fulla barch'umani kanke ka hayyuma jiru inch'eersini. Wold'aqisa atini nu woliini tolfatte qaabad'i, inch'absini.

²²Waaqi harkaani boch'ani ka gochiti d'ibiini qabdu dandae bokayaani d'ufa? Gubbaleeni dandeete ebele iroobdi? Hiyo, ka namaa roobu siuma AABBO Waaqa keenna. Nami waan kana ch'ufa tolchu sii, abdiini teennaleeni gamuma kee jirti.