Read BORANA BIBLE – KITAABA WAAQA Yeremia 17 Bible Online

Yeremia 17 - BORANA BIBLE – KITAABA WAAQA bible

Yeremia 17

¹AABBO Waaqi waan jed'u, Worra Yuda, ch'ubbu teesani yayu qalamu sibiilatini t'aafani; d'akha qara qabu jajabaani onne teesani irati qorani, fulla isani sorio irati baaftanile moga ch'ufa irati barreesani.

²Worri keesani fulla sorio waaqa Ashera jed'ani iti qalanifi fulla akheekha isaa old'aabani, ka mukeeni gugurdofi kubileefi.

³Gaareenifi diida lafaleti kad'atani, achiti waaqa suni kad'ata. Anini nyaapa keesanini d'ufe, worri hori keesani, waan isani qabdani ch'ufa, boojia, maro ch'ubbu heddu isani lafa teesani keesati tolchitanifi.

⁴Isani lafa anini isanii kenne jibbaatani keesa bahu maltani; ammalle lafa isani imbeenne isani kenna, wonti akanatiifi dallansuuni tiyya ibida fakaati, isiini haga jiru jireenna bobeeti.

⁵AABBO Waaqi waan jed'u, Anini nama na lakise abdi isaa nama ira keeyatu, ka yokhaani jabeenna namaa d'aabatu inabaara.

⁶Inni gurbi raasa keesa ejitu fakaata, ta lafa aloo ta gamooji ta, biyye kurooftu woma iti imbaane keesati baatu. Wonti dansaani inni argu tokoleeni injirtu.

⁷Ammo nama na d'ugeefatu ch'ufa ineebisa.

⁸ Inni mukha d'aatu galaanati bahe ka hiddi isaaleeni gara bisaani bahu fakaata. Inni yo lafti bontele woma insodaatu, wonti akanatiifi baali isaa yo ch'ufa doti; yo bokeeni injirrele woma ind'eetu, mid'aanile baasu illakisu.

⁹Eenuti garaa namaa hubata? Wonti aka garaa namaa nama soba injirtu, waan nami dandae fayyisuniti.

¹⁰ Anini, AABBO Waaqi, qalbi nama ch'ufa laale, garaa namale ilaalad'a. Anini nama ch'ufa adabuma isaa gula waan male kennaafi, waan inni tolchu gula.

¹¹Nami kara ch'ubbutini hori argate simpirre okhokaani isiini ind'aliini ira teete baqasitu fakaata. Gaafa inni guddate ch'ime, inni hori suni d'abe, duuba eege daallae akanumati taa.

¹²Mani nu Waaqa iti kad'annu barch'uma guddinna, ka haguma duriti gaara d'eera gubba eju, fakaata.

¹³Ee AABBO Waaqa, nami Israeliini abdatu sii, nama si lakisu ch'ufa inch'eersani. Worri akuma maqa d'uke keesati t'aafani bada, waan si AABBO Waaqa, bisaani madda jireenna lakiseefi.

¹⁴Ee AABBO Waaqa, na fayyisi, yo suni anini inuma fayya; na baasi, yo suni anini inuma baha. Nami anini faarsu si!

¹⁵Biyyiti waan nani jettu, Dubbini AABBO Waaqi qara jed'e me? Amma ha guutamtuti!

¹⁶Ee AABBO Waaqa, anini takaa, worra kana balleesi siini injenne. Anini takaa aka worri badu infeene. AABBO Waaqa, atini imbeeta, waan anini jed'ele ch'ufa imbeeta.

¹⁷Na imudamsiisini; hojja gaargali nati d'ufu nami anini iti baqad'u sii.

¹⁸Nama na gaargalchu ch'eersi, ammo ch'eera suni na hanqisi. Worra mudamsiisi, ammo na imudamsiisini. Gaargala worratiini kooti aka hama worra hobaasi.

¹⁹AABBO Waaqi waan nani jed'e, Yeremia, kai, gara fullo, fullo Biyya jed'ani, ta hayyooti Yuda diraani seente keesaa baatu, d'aqi; duuba fullo Yerusalemu d'ibile ch'ufa d'aqi,

²⁰waan biyyaani jettu, Isani hayyootafi worra Yudatifi nami Yerusalemu keesa tau, ka fullo tanaani oli seenu, dubbi AABBO Waaqa ch'aqasa.

²¹ Hojja duu infeene guyya Sabato wo baatani fullo Yerusalemutini oli inseenina.

²² Maneeni teesani keesale woma fuutani imbaatina, yokhaani guyya Sabatole huji tokole inhojatiina; ammo guyya Sabato qulqullo tolcha, akuma anini duri ababoota teesaniti hime.

²³Ammo ababooti teesani na inch'aqamne, yokhaani dubbi tiyyale inguunne. Ammo worri fulla suni mata jabaate naa saalfachu dide, womale naraa barachu dide.

²⁴Ammo AABBO Waaqi waan jed'u, yo isani seera kiyya guutani, guyya Sabato woma baatani fullo dira kanatini olseenu baatani, ammalle Sabato guyya qulqullo tolchitani guyya suni huji hojachu diddani;

²⁵hayyooti barch'uma Daudi ira tetetu fullo dira kanatini olduuddi. Worra Yudatifi ka Yerusalemu woliini, gaarifi farda yaabatani ammalle dira Yerusalemule guyya ch'ufa namati guuta.

²⁶Nami dira Yudatifi ollowaani d'aatu Yerusalemutiiti bahe, ammalle lafa Benjaminitifi golba gaaratifi gaareenifi lafa Yuda ta bitatile baha. Duuba sorio gubanifi sorio d'ibifi mid'aani Waaqa baasanifi hit'aana isaa aarsani, waan maro galatatifi Waaqa baasanile ch'ufa Mana kiyyatiini d'ufani.

²⁷Ammo worri sunini naa saalfate, guyya Sabato guyya qulqullo ha tolfatuti. Worri guyya suni wo baate fullo Yerusalemutini seenu himmalle; yo sila worri akasi tahe, anini fullo Yerusalemu suni inguba. Ibidi suni maneeni hayyu ch'ufa inguba ammalle nami tokoleeni ka dandae d'aanfu injiru.