Read BORANA BIBLE – KITAABA WAAQA Yeremia 23 Bible Online

Yeremia 23 - BORANA BIBLE – KITAABA WAAQA bible

Yeremia 23

¹Gaargali AABBO Waaqi nama nama fidu, ka gumi isaa balleese gargari firfirsutini d'ufu, akami hama!

²Wonti AABBO Waaqi Israeli waan nama nama fidu, ka sila gumi isaa qorqoratuni jed'u, tana: Isani gumi tiyya qorqorachu diddani gargari firfirsitani d'id'imati d'ooftani. Anini amma tana maro isani waan hamtu suni tolchitanifi isani gaargalcha.

³Anini gumi tiyya ta hafte lafa iti firfirse keesaa guure, lafa worra ta qaraa taaniti galcha. Achiti worri ilmaani heddu d'ale lafa ira dabra.

⁴Anini nama worra fidu, ka worra qorqoratu, iti tolche, duuba worri deebie woma sodaate imudamu, aninileeni deebie worra ingaargalchu. Nami dubbi tana jed'e ana, AABBO Waaqa.

⁵ AABBO Waaqi waan jed'u, Guyyaani ind'ufa, ka anini d'aloota Daudi keesa nama d'uga toko fohad'e hayyu tolchu. Hayyichi sunini kara dansaani nama fidde, waan d'ugaatifi ka qajeela lafa ch'ufa keesati tolcha.

⁶Gaafa inni hayyu tahu, worri Yuda soda nyaapa jalaa bahe, worri Israelileeni nagayaani taa. Maqaani isaani yaamani AABBO Waaqi d'uga keenna.

⁷AABBO Waaqi waan jed'u, Guyyaani ind'ufa, ka nami deebie maqa AABBO Waaqa jiru, ka gumi Israeli lafa Misiri keesa baaseni, inkakhanne.

⁸Ammo fulla suni wonti worri kakhatuni maqa AABBO Waaqa jiru, ka gumi Israeli lafa mirgaatifi lafa inni iti firfirse ch'ufa keesaa galche. Duuba worri lafa isaani keesa taa.

⁹Maro AABBO Waaqatifi maro dubbi isaa qulqullootifi onneeni na ch'ite, nafi na hollate, akuma nama guddo daad'iini machae daad'iini dabsatte fakaad'e.

¹⁰Nami waan hamtu tolche Waaqa lakisu ya lafa ira dabre; worri hameenna gula yae irreeni nama dabse. Maro Waaqi worra abaareefi, lafti boote marrileeni gogoge.

¹¹AABBO Waaqi waan jed'e, Raagootafi qaaloleeni Waaqa imbeetu; Mana Waaqa keesaleti aka worri waan hamtu tolchu ya arge.

¹²Daandini worri gula yau worra jalaa much'uch'ate, lafti worrati dukanoofti; anini worra gufachiise worra buusa. Anini badi worratiini d'ufa, guyyaani worra gaargalchani ya gahe. Nami dubbi tana jed'e ana, AABBO Waaqa.

¹³Raagoota lafa Samaria keesa jirtu anini waan hamtu toko irati arge: Worri maqa waaqa Baali jed'anitini fage gumi tiyya kara iraa gorse.

¹⁴ Ammo anini raagoota Yerusalemu, ta waan hagasi ira hamtu tolchitu, arge: Worri huji sharmut'oma hojate, d'ara dubbate, nama waan hamtu tolchule wahelche; duuba akanaani nami tokoleeni hameenna ufi iraa deebiu dide. Aka kiyyati worri yayu worra Sodomatifi ka Gomora fakaate.

¹⁵Tanaafi duuba wonti raagoota Yerusalemu suni, ka anini AABBO Waaqi guddaani jed'u, tana: Waan worri lafa ch'ufa keesa yae, kara Waaqa iraa nama gorse hameennaani d'ufeefi, anini mukhi had'aa nyaachise bisaani had'ao obaasa.

¹⁶AABBO Waaqi guddaani waan worraa Yerusalemutini jed'e, Waan raagooti isaniini jettu inch'aqasina; worri waan d'ara isani abdachisuu jira. Worri daayya nara ind'ufini hereguma ufitini gabaase isaniti himu jira.

¹⁷Ammalle worri worra dubbi Waaqa tufatuni waan jed'u, Woma insodaatina, lafti naguma. Ammalle nama mata jabaate, herega ufi ch'alla gula deemuni waan jed'u, Isani gaargala inargattani.

¹⁸Anini waan jed'e, Raagoota tana keesa eenuti herega AABBO Waaqa beekha? Worra keesa eenuti taka dubbi isaa d'agaye hubate, yokhaani waan inni jed'u ch'aqase jalaa qaba?

¹⁹Dallansuuni isaa aka bubbe jirti, ta irrumani mata worra ch'ubbu roraaftu.

²⁰Dallansuuni sunini isa iraa ingaltu, haga inni waan fed'u ch'ufa tolchuti. Takaa tana dubbini tunini aka dansaa gumi isaati galti.

²¹AABBO Waaqi waan jed'e, Anini raagoota tana inergine, ammo worrumati ufiini yae. Anini waan tokole worrati inhimne, worri dubbuma ufitini woi fage.

²²Worri sila, ato herega kiyya beekhe, yayu dubbi tiyya biyyati haasae, kara hamafi waan hamtu worri tolche iraa gorse.

²³Anini Waaqa fulla toko ch'alla tauniti, ammo fulluma ch'ufa jira.

²⁴Nami tokoleeni dandae fulla tokoleti na duraa ind'okhatu. Isani aka anini fulla ch'ufa lafafi gubbale jiru imbeetani?

²⁵Anini waan raagooti maqa kiyyaani waan d'ara dubbate, Anini ya oobjad'e, anini ya oobjad'e jettu imbeekha.

²⁶Haga yoomi raagooti d'ara tunini gumi tiyya herega worraa ka d'araatiini sobde balleesiti?

²⁷Worri waan oobjuuni amma, worri wolti himu tunini gumi tiyya na wollaalchiftu seha, akuma abbootini worraa na lakifte Baali gula yaate.

²⁸Raagi oobju oobjate ha waan oobju isaa himuti, ammo raagi dubbi tiyya d'agaye ha dubbi suni kara d'ugaatini himu. Ch'idiifi dargayeeni maanini woli fakaati?

²⁹Dubbini tiyya aka ibida jirti, ammalle burrisa d'akha ch'ach'absu fakaati.

³⁰Anini raagoota dubbi woli jala fud'atte, AABBO Waaqati akana jed'e jettu, infed'u.

³¹Ammalle raagoota dubbuma ufi dubbatte, Waaqati akana jed'e jettule, infed'u.

³²Waan anini, AABBO Waaqi jed'u, D'agaya! Anini raagoota oobjatte d'ara odeesitu infed'u. Worri waan oobju suni odeese, d'araafi kiyyiba worratiini gumi tiyya kara iraa gorsa. Anini worra suni infohanne yokhaani inergine, tanaafi worri diqole qarqaarsa gumi tana intahu. Nami dubbi tana jed'e ana, AABBO Waaqa.

³³AABBO Waaqi waan nani jed'e, Yo gumi tiyya keesa nami toko, yokhaani raagi toko, yokhaani qaallichi toko d'aamsi AABBO Waaqa maani? Jed'e si gaafate, atini waan jettuuni, Atini yayu baa ulfo AABBO Waaqati taate, tanaafi inni amma si balleesa.

³⁴Ammalle gumi tiyya nami toko, yokhaani raagi toko, yokhaani qaallichi toko, dubbi baa ulfo AABBO Waaqa maqale d'ae, anini isaafi worra isaa ch'ufa balleesa.

³⁵Fulla suni nami ch'ufti sila ha jaalani ufitifi fiit'a ufile gaafate, AABBO Waaqi maani siini jed'e? Dubbini inni jed'e maani? jed'u.

³⁶Tanaafi nami deebie, baa ulfo AABBO Waaqa maqa d'au himmalle; wonti akanatiifi yo nami akasi jed'e, Anini d'aamsa kiyya baa ulfo iti tolcha. Nami yayu dubbi Waaqa jiru, AABBO Waaqa guddaa, garagalche balleese.

³⁷Yeremia, waan atini raagootaani jettu, AABBO Waaqi maani isaniini jed'a? Dubbini inni jed'e maani?

³⁸Ammalle yo worri dubbi tiyya ch'aqasu dide baa ulfo AABBO Waaqa maqa d'ae, waan jettuuni, Waan isani dubbi suni maqa d'ooftanifi,

³⁹anini isani fuud'e ufira isani fageesa, isanifi dira anini ababoota teesani kennele.

⁴⁰Anini haga jiru jireenna worra ch'eerse lafa isaani balleesa ch'eera suni nami haga jiru inded'u.