Read BORANA BIBLE – KITAABA WAAQA Yeremia 30 Bible Online

Yeremia 30 - BORANA BIBLE – KITAABA WAAQA bible

Yeremia 30

¹AABBO Waaqi Israeli waan nani jed'e:

²Waan anini siini jed'e ch'ufa kitaaba keesati t'aafi;

³wonti akanatiifi guyyaani ind'ufa, ka anini gumi tiyya worra Israelitiifi ka Yuda lafa worra iti boojiani keesaa galche, lafa anini duri ababoota worrati d'aala kenneti deebisu. Nami dubbi tana jed'e ana, AABBO Waaqa.

⁴AABBO Waaqi waan worra Israelitiifi ka Yudatini jed'u,

⁵Anini qonqo mudamsu yokhaani ta soda, ta nagaya intahini, d'agaye.

⁶Me heregi, nami d'iira dandae d'iibate ilmaani ind'ala? Anini maafi nama d'iira ch'ufa, ka garaa qabate, aka nad'eeni garaacha ta ch'ininfatu ejaanju arga re? Nama ch'ufa maafi fuuli golgolaa:

⁷Guyyaani hamaani d'ufuu jira, ka nami takaa arge ind'agayini — guyya gumiini tiyya ta Yakobo gaargaltu, ammo ha taatu worri inuma baha.

⁸AABBO Waaqi guddaani waan jed'u: Hojja guyyaani suni d'ufu, anini qaampara morma isaaniti jiru ch'abse sansalata iraa baasa, duuba worri ituma deebie tisse gosa d'ibi intahu.

⁹Ammo worri ana, AABBO Waaqa isaaniti hojate, nama d'aloota Daudi ka anini hayyu tolchule hojata.

¹⁰ Gumi tiyya ta Yakobo, insodaatina; worra Israeli, imudamina. Anini lafa fago suni, ta qara boojiani iti isani geesani, keesaa isani baase, isani galtani nagayaani teetani, nami tokoleeni deebie isani insodaachisu.

¹¹Anini d'ufe isani baase, gosa anini keesati isani firfirse ch'ufa imballeesa, ammo isani imballeesu. Anini yo isani gaargalchele d'uga gula isani gaargalcha. Nami dubbi tana jed'e ana, AABBO Waaqa.

¹²AABBO Waaqi waan gumi isaatini jed'u, Madaani teesani infayyitu fulla isani woraanani dandaani infayyisani.

¹³Nami isani qorqoratu injiru, qorsi mada teesani fayyisu injiru, isani haga jirtani infayyitani.

¹⁴Jaalani teesani ch'ufti ya isani deete, worri diqole waan keesani iyyaalu. Waan dabi keesani heddate, ch'ubbuuni teesani lafa ira dabarteefi, anini aka nyaapa isani had'e gaargala gudda isanitini d'ufe.

¹⁵Isani maafi mada teesani ta infayyine jettani teetani bootani? Waan dabi keesani heddate ch'ubbuuni teesani lafa ira dabarteefi, anini akana isani gaargalcha.

¹⁶Ammo amma tana nama isani hobaasu ch'ufa inhobaasani, nyaapa keesani ch'ufale imboojiani. Nama isani dabsu ch'ufa dabsani, nama isani saamu ch'ufa saamani.

¹⁷Anini isani fayyise, mada teesanile qorsa ira kaaya, ato nyaapi keesani, Sionini waan jibbani, nami tokoleeni waan isii iyyaalu jed'ele.

¹⁸AABBO Waaqi waan jed'u, Anini gumi tiyya lafa isaaniti deebise worra isaani ch'ufaa naha; dira Yerusalemu jaarani, mana hayyule mid'aasani.

¹⁹Nama achi tau faaru d'awate gammade sirba. Anini worra daraarse, worri heddate lafa ira dabra; anini worra ulfeese deebiani worra intufatani.

²⁰Ilmaani worraa akuma duri taate, worrileeni gumi jabdu taha; ammalle nama worra dabsu ch'ufa imballeesa.

²¹Nama worraani deemuti gosa worraa keesaa d'alata, nami worra fiduleeni worruma keesa d'alata. Nama suni hojja anini yaamu, inni nati ga d'ufa, wonti akanatiifi nami yaamicha male d'ufu injiru worri gumi tiyya tahe, aninileeni Waaqa worraa taha. Nami dubbi tana jed'e ana, AABBO Waaqa.

²³Dallansuuni AABBO Waaqa aka bubbe jirti, ta d'ufte mata worra ch'ubbu qabu roraaftu.

²⁴Isiini haga waan inni herege ch'ufa guututi iraa ingaltu. Takaa tana waan kana inuma hubattani.