Read BORANA BIBLE – KITAABA WAAQA Yeremia 32 Bible Online

Yeremia 32 - BORANA BIBLE – KITAABA WAAQA bible

Yeremia 32

¹Ganna kud'anneeso ka Sedekiani lafa Yuda mohate, ka ammalle ganna kud'ani saddeeteeso ka Nebukadrezani lafa Babiloni mohate, AABBO Waaqi nani dubbate.

²Gaafasi duuli hayyu Babiloni Yerusalemu had'uuti jira, ammalle naabo mana hayyu Yuda keesati na hid'aani.

³Hayyu Sedekiati achiti na hid'e, waan nani jed'e, Atini maafi AABBO Waaqati akana jed'e jette dubbi akana tana fadda? Anati dira kana harka hayyu Babiloniti kenne, inni isa dabsate

⁴hayyu Sedekiale bahu d'owa. Isa qabani harka hayyu Babiloniti kennani, duuba inni isa dura d'ufe afaanuma ufiitini isaani dubbata.

⁵Ammalle Sedekia lafa Babiloni geesani, haga anini waan fed'u isa tolchuti inni achuma taa. Yo inni worra Babiloni had'ele indabsatu. Nami dubbi tana jed'e ana, AABBO Waaqa.

⁶AABBO Waaqi waan nani jed'e,

⁷Hanamelini ilmi abuyya kanke Shalamu, siti d'ufe waan siini jed'u, oobru tiyya ta Anathothi jirtu bitad'i, miilooni tiyya aantini ta bitachuu malte sii.

⁸Jennaani akuma AABBO Waaqi nani jed'e, oboleesi kiyya Hanameli naabo suni keesati nati d'ufe waan nani jed'e, Oobru tiyya ta Anathothi, ta lafa Benjamini keesa jirtu, bitad'i. Miilooni tiyya aantini ta bitachuu malte sii. Duuba akasiini anini aka AABBO Waaqi nani dubbate hubad'e.

⁹Jennaani anini oobru Anathothi jirtu taani Hanameli iraa bite, beese hede kenneefi; gatini isii qarsi kud'ani torba taate.

¹⁰Duuba anini tatabe bitanini maqa kiyya irati t'aafad'e d'uga iti yaamad'e beesisa ira keeyad'e beese taani hede kenneefi.

¹¹Jennaani anini tatabe lamaani bitanini taani, ta aadaafi seera bitii irati t'aafani beesisa ira kayanifi ta beesisa inqamne fuud'e,

¹²Baruku, ilma Neria, ka ilma Maaseyati kenne, ka Hanamelifi jari tatabe suni beesisa ira keeyatefi jara Yahudi ka achi keesa tau achi jiru.

¹³Jara suni ch'ufa durati anini waan Barukuni jed'e,

¹⁴AABBO Waaqi guddaani Israeli, waan siini jed'u: Tatabe tana ta beesisa ira kayaanifi ta beesisa inqamnele fuud'i, aka isiini inhamanne ganna heddu teetu okote faara ke kai.

¹⁵AABBO Waaqi, guddaani Israeli, waan jed'u: Lafa tana keesati nami deebie maneenifi oobrufi oobru zabibu bitata.

¹⁶Eegi anini tatabe oobruuni bitani Baruku kenne, anini Waaqa kad'ad'e waan jed'e,

¹⁷Ee AABBO Waaqa gudda, atini irreefi jabeenna kanke guddaani lafafi gubba mid'aasite. Wonti atini indandeenne tokoleeni injirtu.

¹⁸Atini nama kunki kunki jaalala garsiifte, ammo maro ch'ubbu abbooti isiitiifi ijoolle gaargalchita. Atini Waaqa guddaa, ka guddo jabeenna qabu: Waaqi guddayaani si.

¹⁹Atini heregaafi mala jaba qabda, waan jabdule siumati tolcha; atini waan nami tolchu ch'ufa agarte huji isaa gula woi kennitaafi.

²⁰Atini duri lafa Misiri keesati waan mamatiifi akheekha woi tolchite, ammalle haga arrale Israelifi gosa d'ibi keesati waan akana kana tolchite, akasiini gurra baafate.

²¹Waan mamatiifi akheekha woitini nyaapa keenna mudamsiifte, jabeennafi irre teetiini gumi tante ta Israeli lafa Misiri keesaa baafte.

²²Atini lafa aananifi dammi aka lola yau tana worraa kennite, akuma atini duri ababoota worrati kakhate.

²³Ammo gaafa worri lafa tana seene fud'ate, worri seera kanke inguunne yokhaani barsiisa tante gula iyyaane; waan atini Tolcha jetteeni tokole worri intolchine. Duuba akanaani atini badii tana worra kanatini d'ufte.

²⁴Worri Babiloni boola qote dira kana marse had'uu jira. Maro woraanafi beelafi d'ukubatifi diri kunini harka worraa kanati mara. Atini aka wonti ati duri jette guutamte ingarta.

²⁵Ammo, ee AABBO Waaqa gudda, nami oobru suni gumi durati bitad'i nani jed'e sii, ka ufiftu dira kana diquma worri Babiloni inqabini.

²⁶Jennaani AABBO Waaqi waan nani jed'e,

²⁷Anini AABBO, Waaqa nama ch'ufati. Wonti tokoleeni ka anini tolchu indandeenne injirtu.

²⁸Anini dira kana harka hayyu Babiloni ka Nebukadreza jed'anitifi duula isaati kenna. Worri dira kana dabsate,

²⁹ibida iti kaye maneeni nami gubba isaati hit'aana Baali aarse, daad'i waaqa d'ibi d'ibaayu baasani akasiini na dallansisanile guba.

³⁰Haguma duriti worri Israelitiifi ka Yudaleeni waan tolchani ch'ufaani ya garaa na yake na dallansiise.

³¹Nami dira kana haguma gaafa duri isa jaaraniti haga arrale yayu na hiifachise na dallansiise. Tanaafi

³²maro worra Yudatifi ka Yerusalemutifi hayyootafi jaaroleefi qaaloleefi raagooti worraa hameenna tolchiteefi, anini dira suni fuula kiyya duraa balleesu fed'a.

³³Worri dudda nati garagale, ammalle ato anini guyya ch'ufa barsiisele, worri na ch'aqase woma naraa imbaranne.

³⁴Worri waan hamtu harkaani boch'ani kad'ate mana maqa kiyyaani jaarani keesa kaye, akasiini t'ureese.

³⁵Ammalle Bale Hinomu keesa fulla sorio iti qalani Baalii jaarani ilmaani isani waaqa Moleki jed'ani sorio baasani. Anini, waan kana tolcha worrani injenne, yokhaani aka worri waan akana kana tolche worra Yuda ch'ubbu keesa buusu diqole inherenne.

³⁶AABBO, Waaqi Israeli, waan nani jed'e Yeremia, Biyyiti waan jettu, woraanafi beelafi d'ukubati dira kana harka hayyu Babiloniti marsa. Amma dubbi d'ibi anini jed'u ch'aqasi.

³⁷Anini worra ch'ufa lafa anini dallansu tiyyaani worra iti firfirse keesaa wolti guure fulla tanati deebise nagayaani teesisa.

³⁸Duuba worri gumi tiyya tahe aninileeni Waaqa worraa taha.

³⁹Anini herega toko ch'alla worraa kenne: aka hojja ch'ufa dansuma ufitifi ta ilmaani isaaniti jed'ani na sodaatani.

⁴⁰Anini wold'aqisa jiru jireenna worra woliini tolfad'a. Waan dansa worraa tolchu illakisu, ammalle ufi sodaachisa, aka worri garaa tokooni na gula yae haga jiru naraa ingorre.

⁴¹Anini waan dansa worraa tolche, lafa tana keesati garaa tokooni teeso dansa worraa kenne huji sunile iraa gammada.

⁴²Akuma anini badii worra kanatini d'ufe, akasuma waan dansa worraa kakhad'e ch'ufa kennaafi.

⁴³Biyyiti, lafti tunini lafa aloo ta namaafi bineensi keesa inteenne taate, worra gosa Babiloniti kennani jetti. Ammo lafa tana keesati deebiani oobru bitatani.

⁴⁴Biyyiti oobru bitate, hojja bitani suni tatabe bitani d'uga durati t'aafani beesisa ira kayani. Wonti kunini lafa Benjaminitifi ollowaani d'aatu Yerusalemutifi dira Yudatifi dira lafa gaareenitifi lafa golbootifi lafa Yuda ta bitale ch'ufa keesati taati. Nami dubbi tana jed'e ana, AABBO Waaqa.