Read BORANA BIBLE – KITAABA WAAQA Yeremia 40 Bible Online

Yeremia 40 - BORANA BIBLE – KITAABA WAAQA bible

Yeremia 40

¹Eegi abbaani duula Nebusaradanini Ramati na gad'iise, AABBO Waaqi nani dubbate. Qara duri sansalatani na hid'aani, worra Yerusalemutifi ka Yuda ka boojiani Babiloni geesani kaani ch'ufa woliini achi na geesani.

²Abbaani duula koba na yaame waan nani jed'e, AABBO Waaqi kanke duri lafa tana imballeesa jed'e,

³duuba amma tana inni waan jed'e, suni ya guute. Wonti waan kana ch'ufa tolchanifi, waan worri gosa teesani AABBO Waaqati ch'ubbame, dubbi isaa ch'aqasu dideefi.

⁴Ammo amma tana anini sansalata harka kanke iraa hiikhe si gad'iisuu jira yo atini lafa Babiloni na woliini deemu feete nu yaasi, anini si qorqorad'a. Ammo yo infeene ufira tai. Lafti ch'ufti ta si duraa mullatu tana, fulla feetu deemi.

⁵Anini ch'allise ufumaa tae jennaani Nebusaradanini waan nani jed'e, Gedalia, ilma Ahikamu, ka ilma Shafani, ka hayyuuni Babiloni gudda dira Yuda tolchufa tolcheti deebii. Yo feete isa woliini biyya keesa taa, yokhaani fulla feetu deemi. Jennaani inni woreegaafi waan d'ibile ch'ufa naa kenne na gad'iise.

⁶Anini gara Gedalia Mispa d'aqe, biyya achiti hafte woliini tae.

⁷ Worra gugurda askarti Yudatifi askartini worraa ta gari harka inkennanne. Worri aka hayyuuni Babiloni Gedalia gudda lafa suni tolche, ammalle worra boojiani Babiloni ingeesini, d'iirafi nad'eenifi ijoolleefi hiyyeeyi lafa suni, harka isati kenne d'agaye.

⁸Jennaani Ishmaeli ilma Nethaniatifi Yohana ilma Kareatifi Seraya ilma Tanhumetatifi ilmaani Efai, ta worra Netofatifi Yezaniani ka worra Maaka, askarti isaani woliini gara Gedalia Mispa d'aqani.

⁹Gedaliani kakhate waan worraani jed'e, Yo isani worra Babiloniti harka kennattani booju kad'atani woma intaatani. Lafa tanati qubad'a, hayyu Babiloniti hojad'a, wonti ch'ufti isanii tolti.

¹⁰Anileeni Mispa keesa tae, hojja worri Babiloni d'ufu isanii dubbad'a. Ammo isani daad'ifi mid'aani mukhaatifi d'aad'a olikeyad'a, ollowaani isani iti qubatani tana keesa taa.

¹¹Duuba worri Israeli ka lafa Moabutifi lafa Amonitifi lafa Edomutifi lafa d'ibile keesa jiru, aka hayyuuni Babiloni worra Israeli ka gari lafa Yuda keesati hambise, Gedalia gudda worraa tolche, d'agaye.

¹²Tanaafi worri lafa iti firfirsani taani keesaa deebie, lafa Yuda d'ufe gara, Gedalia ka Mispa jiru d'aqe, daad'ifi mid'aani mukha ka muumme inqamne galfate.

¹³Eegi suni Yohananifi jari gugurdaani askarti ka booju inkad'atiini Gedalia ka Mispa jiruti d'ufani,

¹⁴waan jed'aniini, Atini aka hayyuuni Amoni ka Baalisi jed'ani, Ishmaeli siti ijeecha erge imbeetu? Ammo Gedaliani jecha worra suni ind'ugeefanne.

¹⁵Jennaani Yohanaani d'ossani isa yaame waan jed'eeni, Ani deeme, Ishmaeli ka nami tokoleeni quba inqamne ijeesa, na gad'iisi. Inni maafi si ijeese, Yahudi fulla tante jirtu ch'ufa gargari firfirse worra Yuda ka hafe hobaasa?

¹⁶Ammo Gedaliani waan jed'eeni, Lakisi, akasi intolchini, wonti Ishmaeli ka atini jettu d'ugaaniti!