Read BORANA BIBLE – KITAABA WAAQA Yeremia 46 Bible Online

Yeremia 46 - BORANA BIBLE – KITAABA WAAQA bible

Yeremia 46

¹Tunini waan gosa d'ibii, ka AABBO Waaqi Yeremiati hime.

² Misiri, waan askarti hayyu Misiri, ka Neko jed'ani, ka hayyuuni Babiloni, ka Nebukadreza jed'ani, Karkemeshi d'aatu galaana Fratiti dabsate, ganna afreeso ka Yehoiakimuni, ilmi Yosia, hayyu Yuda tahe. Inni akana jed'e:

³Askartini Misiri lalabde waan jettu kurfefad'a, wonte teesani guurad'a, had'iisa d'aqe!

⁴Fardoole teesani koora ira keeyad'a, yaabad'a! Kofia teesani ta sibiila naqad'a, ch'orora ejaanja! Woraana keesani qarad'a, miiha keesani ka lola naqad'a!

⁵AABBO Waaqi waan jed'u, Wonti anini argu kunini maani? Worri ya mudame baqate, askarti worrale ya dabsatani; worri akamale nahe, haga dandau ch'ufa baqate, ufira millachu dad'abe.

⁶Nami qolchaleeni dandae duraa imbahu, askartileeni infiiddu. Mirgaa, gara galaana Fratiti, worri gugufate jijiga.

⁷Eenu kunini, ka aka galaana nile olbahe, galaana afaani ufi ch'ufati fach'au fakaatu?

⁸Inni Misiri, ka aka Nile olbahe, galaana afaani ufi ch'ufati fach'au fakaatu. Worri Misiri waan jed'e, Nu kaane lafa ch'ufa qabanne dirafi nama keesa taule ch'ufa balleesina.

⁹Fardoole teesani gussa, gaarile keesanini oria! Askarti teesani erga: Worra Kushitifi ka Libya ka wonte qabu, worra Ludi, ka t'iyaani wohad'u beekhu.

¹⁰Kunini guyya AABBO Waaqa guddaa, ka inni haalo baafate, nyaapa isaa balleesu. Goraadeeni isaa worra nyaatte, d'iiga worraa d'udde quufti. Arra AABBO Waaqi guddaani sorio mirga d'aatu galaana Fratiti qaqala.

¹¹Isani worri Misiri, Gileadi d'aqa, qorsa barbaada! Qorsi keesani ch'ufti ya woi isanii bahu dad'abe, wonti isani fayyisa injirtu.

¹²Gochiti hedduuni ya ch'eera keesani d'ageete, nami ch'ufti yayu boha teesani d'agaye. Askartini wolti gufatte woliini jijiddi.

¹³ Gaafa hayyuuni Babiloni, ka Nebukadreza jed'ani, lafa Misiri had'u d'ufe, AABBO Waaqi waan nani jed'e:

¹⁴Misirifi Migdolifi Nofufi Tahapenesi keesati dubbi tana lalaba: Kurfefad'a, nyaapa ufiraa d'owa; waan isani qabdani ch'ufa woraanati balleesa!

¹⁵Waaqi keesani jabaani Apisi jed'ani, maafi jige seetani? AABBO Waaqati d'ae isa buuse!

¹⁶Askartini teesani gugufatte jijidde waan woliini jette, Hurrisa, nu yaasa, worra keennati nu galcha, aka woraana nyaapaa jalaa baanu.

¹⁷Hayyu Misiri maqa d'ibi baasafi: kiyyibaa iyyaa deemu, ka qoomni ufi balleesu.

¹⁸Anini, AABBO Waaqi guddaani, hayyu, Waaqa jiru. Akuma gaari Tabori, gaareeni ch'ufa iraa d'eerate, gaari Karmeli galaana ch'ufa iraani mullatu, akasuma nami isani had'u nama irre qabu taha.

¹⁹Isani worri Misiri, aka isani boojiani kurfefad'a, miiha wolti hid'ad'a? Dira Nofu balleesani, ona nami keesa inteenne tolchani.

²⁰Misiriini goromsa looni mid'aaga sorondisi mirgaa d'ufe nyaatu fakaati.

²¹Askartini worri beeseeni bitateleeni yabbiye gagabbo fakaati. Worri nyaapa dura eje inhaane, ammo dudda iti gale baqate. Guyyaani badi worraa ya d'ufe, ka worra balleesani.

²²Worri Misiri akuma bofaa lohe baqata, yo duuli nyaapaa worrati d'iaatu. Worri akuma nami badda guddo d'agaraani ch'ire balleesu, worra ch'ire balleesa. Worri nama heddu, ka henna inqamne, ka tuuta awaanisale ira jiru.

²⁴Worra Misiri ya ch'eersani; worri mirgaa d'ufeti had'e worra dabsate. Nami dubbi tana jed'e ana, AABBO Waaqa.

²⁵AABBO Waaqi guddaani, Waaqi Israeli, waan jed'u, Anini Amoni, waaqa Thebesitifi Misirifi waaqoota isiitiifi hayyoota isiile ch'ufa ingaargalcha. Anini hayyu Misiritiifi nama isa abdatu ch'ufa fuud'e,

²⁶harka nama worra fit'u fed'uti kenna — hayyu Babiloni ka Nebukadreza jed'anifi duula isaa. Ammo eege nami akuma duri kaani lafa Misiriti deebie keesa taa. Nami dubbi tana jed'e ana, AABBO Waaqa.

²⁷Gumi tiyya, insodaatina, worra Israeli, imudamina. Anini lafa fago suni ta boojiani iti isani geesani keesaa isani baasa. Isani lafa teesaniti galtani, nagayaani teetani, ch'alleesumani teetani, nami isani mudamsiisu injiru.

²⁸Anini isaniti d'ufe isani baasa, isani male, gosa anini keesati isani firfirse taani ch'ufa imballeesa. Anini ato diqo tateele isanuma gaargalcha, ammo yo tateele d'uguma gula isani gaargalcha, Nami dubbi tana jed'e ana, AABBO Waaqa.