Read BORANA BIBLE – KITAABA WAAQA Yeremia 48 Bible Online

Yeremia 48 - BORANA BIBLE – KITAABA WAAQA bible

Yeremia 48

¹Wonti moabu ka AABBO Waaqi guddaani dubbate tana: Worra Neboti naha, dira worra ya balleesani! Kiriathaimu, dira worra jaba ya qabani balleesani, nama isale ch'ufa ya ch'eersani.

²Mid'aagumti Moabu ya badde, nyaapi yayu Heshboni qabe, aka gosa Moabu balleesule malate. Dira worra marata inch'alisisani; duulati d'ufe had'a.

³Worri Horonaimu iyye waan jed'u, Woraani ya d'ufe! Lafti ya bade!

⁴Moabu ya balleesani, aka ijoolleeni teete bootu ch'aqasa.

⁵Qonqo isii ta boha yo kara Luhithi yaatani d'agaya, qonqo laalala isi, hojja Horonaimu d'at'ani d'agaya.

⁶Hurrisa, baqad'a, lubbu ufi baasa; aka harre diida oria! jed'ani.

⁷Moabu, atini irre teetifi hori kanke d'aabatte, ammo amma tana sile indabsatani; waaqi kanke ka Kemoshi jed'ani ilmaani hayyutifi qaalole woliini boojiani.

⁸Diri tokoleeni ka badi duraa bahu injiru; baleefi diidale imballeesani. Nami dubbi tana jed'e ana, AABBO Waaqa.

⁹D'akha awaalaa Moabu guura; d'iotu isii balleesani. Dira isii balleesani ona tolchani, deebiani keesa intaani.

¹⁰(Nama huji AABBO Waaqa garaa tokooni inhojanne abaara! Nama goraadeeni isaa woma inijeemnele abaara!)

¹¹AABBO Waaqi waan jed'e Moabuni haguma duriti nagayumani teeti, taka nami imboojine. Moabuni daad'i taka inchochoosini, ta gorjo toko keesaa gorjo d'ibiti taka innaqini, fakaati. Miaa isii taka iyyakine, akuma duri kaani mioofti.

¹²Duuba amma guyyaani ind'ufa, ka anini nama erge Moabu aka daad'i lafati jissu. Worri d'ufe gorjo worraa ta daad'i duwa tolche tatarsaasa.

¹³Duuba worri Moabu waaqa worraa, ka Kemoshi jed'ani tufate jibbe yalabaha, akuma duri worri Israeli Betheli, waaqa worri duri abdate, tufate yalabahe.

¹⁴Worra Moabu, isani maafi nu janna, guddo had'iisa beenna ufiini jettani?

¹⁵Moabufi dira isii ya balleesani, kaima isii dadansa ch'ufa ya qaqalani. Nami dubbi tana jed'e ana, hayyicha, AABBO Waaqa gudda.

¹⁶Badiini Moabu ya d'iaatte, balleesani isii fago injirtu.

¹⁷Isani nami d'aatu tau, ka gurra isii beekhu ch'ufti, gosa suni boha; waan jettani, Irreeni worri namaani fidu ya ch'ach'abt'e guddinnaafi jabeenna isi deebiani lafati inargani.

¹⁸Isani nami lafa Diboni tau, fulla teesani ta guddinnaati gabua, awaara keesa tataa; nami Moabu balleesu arma jira, dira isii jajaba ya balleese.

¹⁹Isani nami Aroeri keesa tau, kara d'aatu ejaanja, eega; worra baqatu odu iraa fuud'a, waan hamaate gaafad'a.

²⁰Worri waan jed'u, Moabu ya balleesani bohafi; isii ya ch'eersani. D'aatu galaana Arnoniti lalaba, aka Moabu balleesani hima!

²¹Dira dirra lafa gubbaa jiru ya badi iti himani diri sunini kana: Holoni, Yasa, Mefaathi,

²²Diboni, Nebo, Beth-Diblathanu,

²³Kiriathaimu, Bethgamuli, Beth-Meoni,

²⁴Keriothi, Bozra. Badi yayu dira Moabu ka fagootifi ka d'ioleti himani.

²⁵Irre Moabu ya ch'ach'absani, jabeenna isiile ya balleesani. Nami dubbi tana jed'e ana, AABBO Waaqa.

²⁶AABBO Waaqi waan jed'e, Worra Moabu farso iti guura, macheesa, wonti akanatiifi worri yayu na dide. Worri Moabu diddiga ufi keesati gangalate, nami d'ibileeni worra kobla.

²⁷Worra Moabu isani aka worra Israeli duri goyeesitani qaabatu? Isani aka waan worri ato hatuu woliini jiru qabani worra hereddani.

²⁸Isani worri lafa Moabu keesa tau, dira keesani keesaa baha! Beena d'akha gubbati gala! Aka sabaliisa ka mana ufi rarra bale irati jaaratu tahe.

²⁹Worri Moabu guddo kiyyiba! Anini aka worri kiyyibe ufi saade ufi guddisu ya d'agaye, yokhaani aka worri ufi koorsu.

³⁰Anini AABBO Waaqi aka worri ufi saadu imbeekha. Ufi saaduni worraa woma keesa injirtu, wonti worri tolchuleeni waan turatiniti.

³¹Tanaafi anini worra lafa Moabu keesa taufi worra Kia-Heresi keesa taule boha.

³²Dira Sibma, atini mukha zabibu ka dameeni isaa galaana soodda ira baate Yazeri geetu fakaata. Ammo amma mid'aani kanke ka gannatifi mid'aani zabibule ya balleesani.

³³Gammadafi qilit'ama yayu lafa Moabu dansa wo baaftu keesaa fuud'ani. Anini yayu daad'i fulla isi iti miich'ani keesaa yau d'owe; nami daad'i mid'aase, koble gammadu injiru.

³⁴Worri Heshbonitifi ka Eleale iniyya. Iyyanna worraa Yahasiti d'agayani iyyanna suni Zoarifi Horonaimufi Eglath-Shelishiati d'agayani. Maddooni Nimrimuleni ya gogodde.

³⁵Anini worra Moabu ka fulla kad'achati sorio gube waaqa isaniti baase hit'aanale aarsufi, huji suni ind'owa. Nami dubbi tana jed'e ana, AABBO Waaqa.

³⁶Tanaafi garaani kiyya Moabufi worra Kia-Heresiiti boha, akuma nama faaru boha fulludooni d'aatu. Wonti akanatiifi waan worri qabu ch'ufa ya iraa fuud'ani.

³⁷Worri ch'ufti yayu matafi areedale haadate. Worri ch'ufti yayu harka ufi mamadeese ch'arqi naqate.

³⁸Maneeni Moabu gubbafi ballinna dira ch'ufa keesale boha male woma injirani, wonti akanatiifi anini yayu Moabu aka okote faara ta nami jibbe ch'abse.

³⁹Moabu yayu bulleesani! lalaba, iyya! Moabu yayu ch'eersani isi yayu balleesani ona tolchani, gochiti d'aatu jirtu ch'ufti isi goyeesiti. Nami dubbi tana jed'e ana, AABBO Waaqa.

⁴⁰AABBO Waaqi waan jed'u: Gochiti toko aka risa koola ballifte d'ufte Moabuti buuti.

⁴¹Dirafi maneeni jajabdu isale inqabani. Guyya suni askartini Moabu mudamte, lubbuuni d'ufte, niiti dauu jirtu fakaati.

⁴²Moabule imballeesani deebiani gosa injed'anini, waan worri na dideefi.

⁴³Sodaafi boolafi t'ururati worra Moabu eegata. Nami dubbi tana jed'e ana, AABBO Waaqa.

⁴⁴Nami soda duraa baqachu fed'u boola suni keesa bua, ammalle nami boola suni keesaa oli bahu t'urura keesa seena; wonti akanatiifi AABBO Waaqi yayu guyya worra Moabu balleesani tolche.

⁴⁵Nami irre inqamne, ka baqaa yau, Heshboniti goru fed'a, dira hayyuuni Sioni duri mohate. Ammo dira sunile yayu gubani. Ibidi yayu diidafi gaareeni Moabu, ka worri isi guddo had'iisa fed'ule, gube.

⁴⁶Worra Moabuti naha! Worra Kemoshi kad'atu ya balleesani, ilmaani worrale ya boojiani.

⁴⁷Ammo takaa tana AABBO Waaqi finna dansa worraa deebisa. Wonti kunini ch'ufti waan AABBO Waaqi Moabuti ind'ufti jed'e.