Read BORANA BIBLE – KITAABA WAAQA Yeremia 49 Bible Online

Yeremia 49 - BORANA BIBLE – KITAABA WAAQA bible

Yeremia 49

¹Wonti Amonini taatu, ka AABBO Waaqi jed'e tana: Worri Israeli meeti? Nami lafa isaani nyaapa iraa d'owu injiru? Worri maanifi worra waaqa Milkomu jed'ani kad'atu lafa gosa Gaditi lakise worri iti qubata?

²Ammo guyyaani ind'ufa, ka anini worra dira Raba keesa tau iyyanna woraanaa d'ageesisu. Duuba dira suni ona tolchani, ollowaani isaale gubani balleesani. Jennaani worri Israeli lafa isaani ta qara iraa fud'atani deefata.

³Worra Heshboni, iyya! Dira Ai ya balleesani! Nad'eeni dira Raba, boha, ch'arqi naqad'a, waan taatani wollaala, gara ch'ufa oria. Waaqa keesani ka Milkomu jed'anifi qaalole isaatifi ilmaani worrale imboojiani.

⁴Isani worri d'ugefacha inqamne kunini maafi ufi guddiftani? Humniti teesani hobauu jirti. Isani maanifi irre teesani abdatani, Nami nu had'u injiru jettani?

⁵Anini gama ch'ufa waan isani mudamsiisa isaniti erga, duuba isani ch'ufti imbaqattani. Nami ch'ufti aka lubbu ufi baasu baqate, nama nama baqate suni wolti deebisu d'abani.

⁶Ammo takaa tana anini finna dansa worra Amoniti deebisa. Nami dubbi tana jed'e ana, AABBO Waaqa.

⁷Wonti Edomu ka AABBO Waaqi guddaani jed'e tana: Worri Temani ya qalbi d'abe? Nami worra mala d'au ya mala d'aufi dad'abe? Qaroomi worraa ch'ufti ya bade?

⁸Worra Dedani garagala, baqad'a, d'okhad'a! Anini d'aloota Esau ingaargalcha, wonti akanatiifi guyyaani anini worra gaargalchu ya gahe.

⁹Hojja nami mid'aani zabibu guuru, hagi toko irumati hafani, ammalle hojja hattuuni halkaniini d'uftu woma feetu ch'alla guuratti.

¹⁰Ammo anini d'aloota Esau ya waan ch'ufa iraa sosse fulla inni iti d'okhatule diidati baase, aka akasiini worri dandae deebie ind'okhanne. Worra Edomu ch'ufa ya balleesani, tokoleeni inhamne.

¹¹Ilmaani teesani hiyyeeyi na birati lakisa, inqorqorad'a, nad'eeni teesani ta d'iirsa inqamneleeni ha na abdatuti.

¹²Yo nami gaargala argachu himmalini muduunu gaargalatini d'uge, isani waan gaargala inarganne seetani? Hiyo akasiniti, d'uddani male inteetani!

¹³Anini ya kakhad'e, aka diri Bozra bade ona tahu; nami isa goyeese maqa isaatini woli abaara. Ollowaani d'aatu isaa jirtuleeni haga jiru jireenna badde ona taati. Nami dubbi tana jed'e ana, AABBO Waaqa.

¹⁴Anini waan jed'e, Edomu, anini yayu qonqo AABBO Waaqa iraa argad'e inni nama erge waan jed'e, waan atini gosa ch'ufaani jettu wolti baha, duula keesani wolti baasa, kurfefad'a, worra had'a.

¹⁵AABBO Waaqi irre isani d'owe, nami ch'ufti isani tufata.

¹⁶Kiyyibi keesani ya isani sobe, nami tokoleeni ka isani waan inni isani sodaatu seetani, ka isani sodaatu, injiru. Isani d'akha fiit'e gaara gubbati galtani; ammo ato isani akuma risa fit'e d'akha gubbati galtanile AABBO Waaqi gaduma isani buusa. Nami dubbi tana jed'e ana, AABBO Waaqa.

¹⁷AABBO Waaqi waan jed'e, Badiini Edomuti d'uftu aka male hamtu, tanaafi nami d'aatu dabru ch'ufti rifate mudama.

¹⁸Woma duri Sodomafi Gomorafi diri d'aatu jiru ch'ufti, gaafa balleesani tahe, Edomuleeni taati. Nami deebie achi intau. Nami dubbi tana jed'e ana, AABBO Waaqa.

¹⁹Akuma nyeench'i badda galaana Yordani keesaa bahe lafa doti marra qabdu d'ufu, aninileeni akasuma d'ufe, worra Edomu lafa isaani keesaa tassa baqachiisa. Duuba nama anini fohad'eti lafa mohata. Nami na gahu lafa keesa jira? Nami woi na gaafatu jira? Nami lafa fidu, ka dandae nani morku, jira?

²⁰Tanaafi mala anini worra Edomuti malad'eefi waan anini worra dira Temani tolchu fed'u ch'aqasa. Ijoolle worra alati hirkisani, nami ch'ufti rifata.

²¹Gaafa Edomu balleesani, dibbeesi isii lafa ch'ufa chochoosa; qonqo iyyanna galaana Diimati d'agayani.

²²Nyaapi akuma risaa koola ballise gabue dira Bozra had'a. Guyya suni askartini Edomu akuma niiti d'alaa ch'ininfatu mudamti.

²³Wonti Damaski, ka AABBO Waaqi jed'e tana: Nami dira Hamathitifi ka Arpadi keesa tau waan odu hamtu d'agayeefi ya mudame. Akuma d'awa bisaani, d'ind'isaani sodaani garaa worraa qabate, hafuura baafachu d'owarte.

²⁴Worri Damaski irre inqabu, tanaafi mudame baqate. Akuma niiti d'alaa ch'ininfatu, worri laalefate d'ukubsata.

²⁵Diri gurra qabu, ka duri gammada qabu, ya ona tahe.

²⁶Guyya suni nama isaa ka kaima ch'ufa kara diraa keesati fit'ani, askarti isaa ch'ufa balleesani.

²⁷Anini naabo Damaski gube, maneeni hayyu Benhadadile ibidaani balleesa. Nami dubbi tana jed'e ana, AABBO Waaqa gudda.

²⁸Wonti gosa Kedaritifi lafa finna Hazori jala jirtu, ta Nebukadrezani hayyuuni Babiloni had'e dabsate, ta AABBO Waaqi jed'e tana: Worra kedari had'a, worra ilaboru suni balleesa!

²⁹Waaro worraatifi ree worraatifi golla waaro worraatifi waan waaro worraa keesa jira ch'ufa qaba. Duuba waan worraani jettani, sodaani ya gama ch'ufaani isani marsite.

³⁰Worra Hazori, anini, AABBO Waaqi waan isaniini jed'u, Baqad'a, d'okhad'a. Nebukadrezani, hayyuuni Babiloni, ya isaniti malate, inni waan jed'u,

³¹koota, worra nagayaani tau suni haana! Diri worraa Fullofi ch'ufanale inqabu, kobaa jira.

³²Gaala worraatifi looni worraale ch'ufa fuud'a! Duuba anini worra rifeensa ufi gabaabse ch'iratu ch'ufa lafa ch'ufati firfirse, gama ch'ufa badi itiini d'ufa.

³³Diri Hazori haga jiru jireenna one, fulla sareni diidaa iti galtu taha. Nami deebie achi intau. Nami dubbi tana jed'e ana, AABBO Waaqa.

³⁴Akuma Sedekiani hayyu Yuda taheeni, AABBO Waaqi guddaani waan lafti Elamu taatu nati hime.

³⁵Inni waan nani jed'e, Nama t'iyaani woi had'u beekhu, ka jabeenna gudda kana worra Elamuti kenne ch'ufa inhobaasa.

³⁶Anini moga ch'ufa bubbe Elamutini d'ufe nama isii lafa ch'ufati firfirsa. Duuba akanaani fullaani nami Elamu iti imbaqatini injirtu.

³⁷Anini worra Elamu aka worri nyaapa worraa fit'u fed'u sodaatu tolcha. Dallansu tiyya guddooni anini worra Elamu balleese duula iti erge worra hobaasa.

³⁸Anini hayyufi jaarole worraale balleese, barch'uma kiyya ka hayyuma achi d'aaba.

³⁹Ammo takaa tana anini worra Elamu finna dansaati deebisa. Nami dubbi tana jed'e ana, AABBO Waaqa.