Read BORANA BIBLE – KITAABA WAAQA Ezekieli 18 Bible Online

Ezekieli 18 - BORANA BIBLE – KITAABA WAAQA bible

Ezekieli 18

¹AABBO Waaqi na yaame waan nani jed'e,

²Mammaasi lafa Israeli keesati nami tae mammaakhu kunini maani? Ka, mid'aani zabibu kurao abbootini nyaatte, ammo ilmaani ilkaani dilalaani, jed'u.

³AABBO Waaqi guddaani waan jed'u, Anini iti kakhad'e, aka isani iti deebitani lafa Israeli keesati mammaasa kana imammaane.

⁴Lubbu nama ch'ufaa anumati harkaa qaba, ta abbootitifi ta ilmaanile. Abbuma ch'ubbamuti dua.

⁵Yo nami qajeelani d'uga gula deemu jiraate,

⁶nami sunini waaqoota Israeli ka harkaani boch'ani inkad'atu, yokhaani sorio gaara gubbati qalani inyaatu. Nad'eeni nama d'ibile infaarau, yokhaani nad'eeni aada uwa qabdule bira irafu.

⁷Inni nama indabsu, yokhaani nama insaamu. Inni qabdo nami hori isa iraa fud'ate iti kenne deebise, beelaa beela baase, ka daara qabu daara baasa.

⁸Inni beese namaa liqeese tirfi iraa ibarbaadu. Inni waan hamtu intolchu, yo nami wold'abule d'uga gula dubbi mura.

⁹Nami akana kunini aadaafi seera kiyya jabeese guuta. Maro inni nama d'uga gula deemuufi, injiraata. Nami dubbi tana jed'e AABBO Waaqa.

¹⁰Yo duuba nami kunini ilma namaa saame ijeesu, ka waan

¹¹abbaani intahini kana ch'ufa tolchu qabaate, ka gurbaani sunini sorio gaara gubbati qalani nyaate, nad'eeni biyyale farae,

¹²hiyyeesa dabse saame, qabdo nami iti kennele deebisu dide, ammalle Waaqa d'ara kad'ate, artiti waan ch'eera hamtule tolche,

¹³beese namaa liqeesele tirfi ira barbaade, nami kunini injiraata? Hiyo, injiraatu. waan inni waan ch'eera hamtu kana taheefi, inni inuma dua, d'iigi isaaleeni gubbuma isati.

¹⁴Yo ilmi akana kunileeni ilma qabaate, ka ilmi sunini ch'ubbu abbaani isaa tolche ch'ufa arge, gula deemu baate,

¹⁵Waaqa Israeli ka harkaani boch'ani kad'achu dide, yokhaani sorio gaara gubbati qalanile nyaachu dide, nad'eeni nama d'ibile farau dide,

¹⁶yokhaani nama dabse saamu baate, ammo qabdo nami hori isa ira fud'ate iti kenne deebiseefi, beelaa beela baase, ka daara qabu daara baase.

¹⁷Waan hamtu tolchu dide, hori namaa liqeesule tirfi ira barbaadu dide, aadaafi seera kiyya jabeese guute, inni induu, ammo injiraata.

¹⁸Ammo abbaani isaa, ka nama dabse saame, ka hojja ch'ufa waan hamtu nama tolche kaani, ch'ubbuma ufi suniini dua.

¹⁹Ammo isani na gaafatani waan jettani, Ilmi maafi ch'ubbu abbaani tolche jed'e ingaargalle? Wonti inni akasi intaaneefi waan inni waan d'uga qajeela gula bahe, aadaafi seera kiyya guuteefi tanaafi inni lubbu bula.

²⁰Abbuma ch'ubbu tolcheti dua — abbaaleeni ch'ubbu ilmati jed'e ingaargalu, ilmileeni ta abbaati jed'e ingaargalu. Nami d'uga d'uguma ufitini baha, ch'ubbichileeni ch'ubbuma ufitini bada.

²¹Yo ch'ubbichi ch'ubbu iraa deebie, seera kiyya guute, waan d'ugaatifi ka qajeela tolche, inni induu, injiraata.

²²Ch'ubbu inni tolche ch'ufa araaramanifi waan inni d'uga gula deemefi jireesani,

²³AABBO Waaqi guddaani waan jed'u, isani waan hojja nami ch'ubbu qabu duu anini gammadu seetani? Hiyo, anini ingammadu, Isa sila ch'ubbu suni iraa deebie jiraatu fed'a.

²⁴Ammo yo nami d'ugaa qajeelani waan d'uga lakise, waan ch'eera hamtu nami hamani tolchu tolche, inni d'uguma injiraata? Injiraatu! Dansuma duri inni tolche tokole inqaabatani. Inni waan d'uga qara gula deemu taani lakise ch'ubbu tolcheefi dua.

²⁵Ammo isani waan jettani, Wonti Aabbo Waaqi tolchu kunini qajeeltuniti. Worra Israeli, me na ch'aqasa! Isani karaani anini woini tolchu qajeelaniti jettani? Keesanumati qajeela intahini.

²⁶Hojja nami d'ugaa qajeelani qajeeluma ufi lakise, ch'ubbu gula bahe, duu, inni woma ch'ubbu tolcheefi dua.

²⁷Hojja ch'ubbichi daba lakise waan d'uga qajeeltu tolchu, inni lubbu ufi baasa.

²⁸Inni hameenna tolchu jiru arge iraa deebia, tanaafi inni induu, lubbu bula.

²⁹Ammo isani worri Israeli waan jettani, wonti Aabbo Waaqi tolchu kunini qajeeltuniti. Isani kara kiyyaani qajeelaniti jettani, akasumayu? Keesanumati qajeela intahini.

³⁰Amma anini, AABBO Waaqi guddaani, waan isani worra Israelitini jed'u, Anini isani namu woma inni tahuni qora. Tanaafi ch'ubbu tolchitani tana ch'ufa iraa deebia; ch'ubbuuni teesani tunini isani imballeesini ufi eegad'a.

³¹Hameenna isani tolchitani kana ch'ufa yaala baha, qalbiifi garaa hareesa horad'a. Isani worri Israeli, maafi badu feetani?

³²Anini, AABBO Waaqi guddaani, nama tokole ka duu infed'u, ch'ubbu teesani iraa deebia, jireennati baha, jed'a.