Read BORANA BIBLE – KITAABA WAAQA Ezekieli 20 Bible Online

Ezekieli 20 - BORANA BIBLE – KITAABA WAAQA bible

Ezekieli 20

¹Guyya kud'anneeso, ka jia shaneeso, ganna torbeeso, ka nu haga nu boojiani teenne, jaaroleeni gumi Israeli hagi toko d'ufte na dura teteete, Waan Waaqi si garsiise nuti himi nani jette.

²Jennaani AABBO Waaqi na yaame waan nani jed'e,

³Namicha, jaarole Israeli tanaani waan jettu, AABBO Waaqi guddaani waan jed'u, Isani woi na gaafachu d'uftani? Anini aka isani woi na gaafatani haga jiru ee injed'u, nami dubbi tana jed'e AABBO Waaqa gudda.

⁴Namicha, atini kurfo jirta, aka jara kana wollaala iti murtu? Yoosi iti muri, waan hamtu abbootini worraa duri tolchite qaabsisi,

⁵waan jettuuni, wonti AABBO Waaqi guddaani jed'u tana: Anini gaafa worri Israeli fohad'e; Worrati kakhad'e, lafa Misiri keesati ufi agarsiise waan jed'eeni: Anini AABBO, Waaqa keesani.

⁶Anini gaafasi worrati kakhad'e waan jed'eeni, Anini lafa Misiri keesaa isani baase lafa lafa ch'ufa ira dansaa, ta aananifi dammi aka lola yautini isani d'ufa.

⁷Duuba waan jed'eeni, Isani ch'ufti waan ch'eera hamtu isani waaqa tolfatani kana boolati d'aa, waaqa d'ara ka Misiri kana gula yaatani akanaani ufi int'ureesina. Anini AABBO, Waaqa keesani.

⁸Ammo worri nati garagale, na ch'aqasu dide, waaqa worra hamama harkaani mid'aasani kaanile boolati d'au dide. Waaqa worra Misirile lakisu dide, tanaafi anini aka male worrati dallane, lafa Misiri keesaa imballeesa jed'e.

⁹Ammo aka gurra kiyya imballeesine worra balleesu dide; wonti akanatiifi anini qara worra worri woliini tau durati, lafa Misiri keesaa isani baasa worraani jed'e.

¹⁰Duuba akanaani worra lafa Misiri keesaa baase, lafa aloo ta gamoojiti geese.

¹¹Anini aadaafi seera kiyya, ka nama gula deemu jireesu, barsiise kenneefi.

¹²Anini guyya Sabato akheekha wold'ageeti teenna tolche, aka akanaani aka anini, AABBO Waaqi, worra qulqulleesu qaabatani.

¹³Ammo lafa gamooji suni keesaleti worri na dide, aadaafi seera kiyya, ka nama isa guutu ch'ufa jireesu, dide. Ammalle worri guyya Sabatole t'ureese balleese; tanaafi anini worrati dallane, lafa aloo keesati worra balleesa, jed'e.

¹⁴Ammo anini worra imballeesine; wonti akasitifi yo gochiti anini ila worra durati worra Israeli lafa Misiri keesaa baase taani na agarte ya gurri na bade.

¹⁵Tanaafi anini lafa gamooji suni keesati worrati kakhad'e waan jed'eeni, Anini lafa lafa ch'ufa ira mid'aadu, ta aananifi dammi aka lola yauti isani ingeesu.

¹⁶Wonti anini akasi kakhad'eefi waan worri aada tiyya dide, seera kiyya ch'abse, guyya Sabatole t'ureese, waaqoota harkaani boch'ani nara jaalateefi.

¹⁷Duuba eege anini worraa nahe, lafa gamooji suni keesati hobaasu dide,

¹⁸waan ijoolle worraatini jed'e: Seera ababooti teesani baafte inguutina, aada worrale gula iyyaina, yokhaani waan worri harkaani boch'ele kad'attani ufi int'ureesina.

¹⁹Anini AABBO, Waaqa keesani, aadaafi seera kiyya jabeesa guuta, gula deema.

²⁰Ammalle guyya Sabato guyya jila jaba tolcha, aka guyyaani kunini akheekha wold'aqisa nu woliini tolfanne tae, aka anini AABBO, Waaqa keesani, isani qaabsisu.

²¹Ammo ijoolleeni worra sunileeni na didde, seera kiyya ch'absite, aada tiyya, ta nama isii gula deemule jireenna kennitule, guutu didde guyya kiyya ka Sabatole t'ureesite. Tanaafi anini worrati dallane, worra ch'ufa lafa aloo keesati infit'a jed'e.

²²Ammo anini worra imballeesine — wonti akanatiifi yo gochiti anini ila worraa durati worra Israeli lafa Misiri keesaa baase taani na agarte ya gurri na bade.

²³Tanaafi anini lafa gamooji suni keesati worrati kakhad'e waan jed'eeni, Anini lafa ch'ufa keesa isani firfirsa.

²⁴Wonti anini akasi worraani jed'eefi, waan worri seera kiyya ch'abse, aada tiyya guutu didde, guyya Sabato t'ureese, waan harkaani boch'ani, ka ababooti worraa kad'ate, kad'ateefi.

²⁵Jennaani anini seera dansa intahinifi aada nama injirreesine worraa kenne.

²⁶Anini aka worri ilmaani isaani ta angafa sorio baase akasiini ufi t'ureesu, iti lakise. Wonti anini akasi tolcheefi, aka worri gaargala argate, akasiini aka anini AABBO Waaqa beekhu.

²⁷Duuba amma, Namicha, waan atini worra Israelitini jettu, AABBO Waaqi guddaani waan jed'u, kunini kara d'ibi, ka abbootini teesani ta saala d'abde, naani arabsite.

²⁸Anini lafa duri worraa kakhad'e taanini d'umnaani, worri gaareeni d'ed'eertufi mukeeni dodoti lafa suni ch'ufa sorio iti qale. Worri sorio gubanifi daad'i d'ibaafatanini na dallansiise.

²⁹Anini worra gaafad'e waan jed'eeni, Gaareeni d'ed'eertuuni isani sorio gubbati qaltani tunini maani? Tanaafi arti asi waan sunini Bamah jed'aniini, akasi jechaani gaareeni d'ed'eertu jechu.

³⁰Amma tana waan worra Israelitini jettu, AABBO Waaqi guddaani waan jed'u: Isani maafi ch'ubbuma abbootini teesani tolchite tolchitani, waan hamtu worri kad'ate kaani kad'atani ufi t'ureesitani?

³¹Arrale isani woma worri baase suni baaftani, waan harkaani boch'ani kad'atani ilmaani teesani gubdani, sorio baaftani, akanaani ufi t'ureesitani. Duuba isani worri Israeli, eegi waan kana ch'ufa taatani, amma d'uftani woi na gaafattani? Anini inkakhad'a, haga anini AABBO Waaqi guddaani jiru, isani itumaa deebitani woma na ingaafatani.

³²Isani waan jettani, Nu aka gosa d'ibi, ta lafa d'ibi keesa teete mukhaafi d'akha kad'atu tahu feena. Ammo wonti sunini isanii intaatu.

³³Anini inkakhad'a haga anini AABBO Waaqi guddaani jiru, aka anini isaniti dallane irreeni isani bulchu.

³⁴Anini lafa isani iti firfirfamtani keesa wolti isani guure, dallansufi irre tiyya isani garsiisa.

³⁵Anini lafa aloo ta d'eebichaa ta gosa d'ibitini isani d'ufe, achiti diideese wollaala isaniti mure isani ch'eersa.

³⁶Anini amma tana, akuma duri ababoota teesani lafa gamooji ta Sinai keesati wollaala iti mure, isanileti mura. Nami dubbi tana jed'e AABBO Waaqa gudda.

³⁷Anini harka kiyya keesa isani keeyad'e, akasiini isani wold'aqisa kiyya guutani.

³⁸Anini nama ch'ubbicha na didu ch'ufa isani keesaa fuud'e, lafa worri amma keesa jiru keesaa baase, lafa Israelileeti deebiu d'owa. Duuba akasiini aka anini AABBO Waaqa beetani.

³⁹AABBO Waaqi guddaani waan jed'e, Amma tana isani worri Israeli waan mataani keesani maddu taha! Waaquma keesani ka harkaani boch'atani gula yaa! Ammo beekha, armaa achi isani ufumani daachatani na gula yaatani, deebitani waan harkaani boch'ani woi baaftani akasiini maqa kiyya qulqullo int'ureesitani.

⁴⁰Achiti isaani worri Israeli ch'ufti gaara kiyya d'eera qulqullo Israeli gubbati na kad'attani. Duuba aninileeni: huji teesani maache, sorioofi d'ibaayufi waan isani naa baaftani qulqullo ch'ufa isani iraa eegad'e isani iraa fud'ad'a.

⁴¹Eegi anini lafa isani iti firfirfamtani keesaa isani fuud'e, fulla tokoti wolti isani deebise, gochiti ch'ufti aka anini qulqullo hubati.

⁴²Hojja anini lafa Israeli ta ababoota teesani kakhad'eti isani galche aka anini AABBO Waaqa beetani.

⁴³Duuba isani akasiini, aka waan hamtu taatani ufi t'ureesitani qaabatani. Ammalle maro waan hamtu akasi suni taatanifi ufi jibbitani.

⁴⁴Yo anini gurra kiyya jed'e woi isani tolchu, isani worri Israeli aka anini AABBO Waaqa beetani; wonti akanatiifi anini waan sila isani gati wollaala keesani gula isani argachu maltani isani intolchu; Nami dubbi tana jed'e AABBO Waaqa gudda.

⁴⁵AABBO Waaqi na yaame waan nani jed'e,

⁴⁶Namicha bita, millad'i, waan isii dubbad'i, badii badda isii fagi.

⁴⁷Waan atini badda Negebutini jettu, waan AABBO Waaqi guddaani jed'u d'agayi. Laali, anini ibida mukha kanke gogafi jiid'ale ch'ufa gube balleesu siti kaya, ka nami dandae ind'aamfine. Ibidi sunini bitaa bahe, mirgati eje, owi isaa waan lafa suni jira ch'ufa guba.

⁴⁸Nami ch'ufti aka anini, AABBO Waaqi, ibida nami dandae ind'aamfine badda suniti kaye, inarga.

⁴⁹Ammo anini, AABBO Waaqa gudda kad'ad'e, waan kana intolchini jed'eeni. Wonti anini akasi jed'eefi nami ch'ufti guyya ch'ufa atini mammaasaani dubbata nani jed'a.