Read BORANA BIBLE – KITAABA WAAQA Ezekieli 24 Bible Online

Ezekieli 24 - BORANA BIBLE – KITAABA WAAQA bible

Ezekieli 24

¹Guyya kud'anneeso, ka jia kud'anneeso, ka ganna sagaleeso, ka nu haga nu boojiani teenne, AABBO Waaqi na yaame waan nani jed'e,

²Namicha ayyana arra kana t'aafi, wonti akanatiifi hayyuuni Babiloni guyya kana dira Yerusalemu marse had'u jira.

³Gumi mata jajabdu, ta na diddu tana mammaasa kana iti himi waan jettuuni, wonti AABBO Waaqi guddaani jed'u tana: Okote bisaani guuti, ibida ira d'aabi.

⁴Fooni fulla dansa — baleensufi lukhale okote keesa buusi, fooni lafe dadansale iti dari.

⁵Fooni hooliye dadansale fuud'i; qoraani okote jalati tuuli, bisaani ha danfani lafefi fooni suni d'aabani.

⁶Wonti AABBO Waaqi guddaani jed'u tana: Diri worra harka d'iiga ya bade! Inni okote dandoofte, ta taka ind'iqini fakaata. Fooni kaani toko tokooni keesaa fuud'ani, okote taani gossani.

⁷Dira keesati nama fit'ani, ammo d'iigi worraa lafa fulla awarti d'ossituti injinne, qarsa d'akha gubbati jige male.

⁸Anini d'iiga suni fulla nami ch'ufa arguti lakisa, aka akasiini nami garaani hammaate haalo baafatu.

⁹Wonti AABBO Waaqi guddaani jed'u tana: Diri worra harka d'iigaa ya bade! Anumati qoraani wolti tuula.

¹⁰Qoraani d'ibiini kooti! Ibida jalati gooli! Fooni aka dansaa d'aabi! Fuuto jalaa gossi, lafele gubi.

¹¹Duuba okote sibiila diima kaani ibida ira d'aabi, ha diimate aka ch'ile ibida taatu, duuba akasiini okote suni dandiini iraa baate qulqulloofti,

¹²ato dandiini sunini ch'ufti ibida keesati iraa badu baatele.

¹³Ee Yerusalemu, hameenni kanke ya si t'ureese ato anini si qulqulleesu fed'ele, t'urini siraa imbaatu, Haga dallansuuni tiyya naraa galtuti, atini deebite qulqullo intaatu.

¹⁴Nami dubbi tana jed'e ana, AABBO Waaqa. Hojaani anini woi tolchu ya geete. Anini ch'ubbu tante yaalaa bahe si illakisu. Waan atini tolchite gula wollaala siti murani. Nami dubbi tana jed'e ana, AABBO Waaqa gudda.

¹⁵AABBO Waaqi na yaame waan nani jed'e,

¹⁶Namicha, anini d'aicha tokooni nama atini nama ch'ufa ira jaalatu si duraa fuud'a. Atini gungumte boote imimaani imbuisini.

¹⁷Nami si ind'agayini, Boha tante d'ofad'i aka nama nami iraa due taate sureefi miila duwa indeemini; yokhaani fuula d'ofate, sagale nami boha nyaatu inyaatini.

¹⁸Anini diirama biyyaani haasae, lafti galgalomnaani niitiini naraa doote. Boriyyaate anini akuma nani jed'ani kaani tolche.

¹⁹Biyyiti waan nani jette, Isi abbo, wonti atini taatu kunini maani?

²⁰Jennaani anini waan worraani jed'e, AABBO Waaqi na yaame waan nani jed'e,

²¹Waan atini worra Israelitini jettu, wonti AABBO Waaqi guddaani jed'u tana: Isani ijaarsa jajaba Mana Waaqa kanani guddo kortani. Isani mid'aaguma isaa laaltani jaalattani maro ch'ufa iti yaatani. Ammo anini t'ureese balleesa.

²²Duuba isani woma anini tae kana taatani. Isani mata inhagogatani yokhaani sagale nami bohaa nyaatule inyaatani.

²³Isani matafi miila duwa yaatani yokhaani laalefatani imbootani. Maro ch'ubbu teesanitifi d'umatani wolti bootani.

²⁴Duuba anini akheekha isanii taha, isani waan anini tae kana ch'ufa intaatani. AABBO Waaqi waan jed'u, yo wonti kunini taate, aka anini AABBO Waaqaa gudda beetani.

²⁵AABBO Waaqi waan jed'e, Namicha, anini Mana kiyya ka jabeesani jaarani, ka worri jaalate koreeni, mid'aaguma isaa jaalate maro ch'ufa iti yau kana, worra biraa fuud'a. Ammalle anini ilmaani worra ta d'iiratifi ta dubrale iraa fuud'a.

²⁶Guyya anini waan kana tolchu, nama baqa deemuti d'ufe siti hima.

²⁷Duuba guyyuma suni afaani qara si duude kaani si banamani, isaani dubbata. Kara kanani atini akheekha worra kanaa taate, worrileeni aka anini AABBO Waaqaa beekha.