Read BORANA BIBLE – KITAABA WAAQA Ezekieli 30 Bible Online

Ezekieli 30 - BORANA BIBLE – KITAABA WAAQA bible

Ezekieli 30

¹AABBO Waaqi na yaame waan nani jed'e,

²Namicha, fagi waan jettu, wonti AABBO Waaqi guddaani jed'u, tana: Iyyi, lalabi waan jettu, guyyaani badi ya d'ufe!

³Guyyaani AABBO Waaqa ya d'iaate, guyyaani sunini guyya dumansa ka gosa ch'ufa balleesani.

⁴Gaafasi woraani lafa Misiriti kae, badiini lafa Kushi qabati. Nama lafa Misiri heddu fit'ani, lafa worrale saamani balleesani ona tolchani.

⁵Had'iisa suni keesati askarti beeseeni lafa Kushitifi ta Putitiifi ta Luditifi ta Araftitifi ta Kubu iraa bitanifi ammalle ta gumi tiyya keesaa baatele ch'ufa infit'ani.

⁶Wonti AABBO Waaqi guddaani jed'u tana: Haga Migdoli ta mirgaati iti keeyatani, Aswani ta bitaati d'aabani, ch'ibraa lafa Misiri ch'ufa woraanaani hobaasani. Askarti Misiri ta ufi d'aadule imballeesani. Nami waan kana jed'e ana, AABBO Waaqa.

⁷Lafti sunini lafa ch'ufa ira badde qulqullo ona taati. Dira isiile ch'ufa balleesani ona tolchani.

⁸Gaafa anini lafa Misiri ibadaani balleese ch'ibra isii ch'ufa hobaasani, worri gaafasi aka anini AABBO Waaqa beekha.

⁹Hojja guyyaani sunini d'ufe Misiri balleesani, anini ergattu tiyya hobolooni erge, worra lafa Kushi ka dagu jiru naasise hiriba keesaa kaasa. Guyyaani sunini fago injiru ya walgenne!

¹⁰AABBO Waaqi guddaani waan jed'e, Anini harka hayyu Babiloni, ka Nebukadreza jed'aniini waan worri qabu ch'ufa balleesa.

¹¹Isaafi askartini isaa, ta naasu inqamneleeni, d'ufte lafa tana balleesani. Worri lafa Misiri goraadeeni had'e, lafa ch'ufa reefa namaatiini guuta.

¹²Anini galaana Nile gosse, lafa Misiri harka worra ch'ubbu qabuti kenne nami gosa d'ibileeni lafa suni ch'ufa had'e balleesa. Nami dubbi tana jed'e ana, AABBO Waaqa.

¹³AABBO Waaqi guddaani waan jed'u, Anini waan harkaani boch'ani waaqa tolfatanifi waaqa d'ara ka Memfesile imballeesa. Ammalle nama Misiri mohatu deebiani inargani, anini lafa suni ch'ufa keesa nama sodaachise mudamsiisa.

¹⁴Anini lafa Pathrosi ta bita balleese ona tolche, dira Soani ka mirgale gube, daara baasa. Ammalle dira gudda No jed'ani balleese,

¹⁵dira Misiri, ka Sini jed'ani, ka aka jaba jaarani, dallansu tiyyaani balleesa. Anini hori dira Nole balleese,

¹⁶lafa Misiri ch'ufa ibida iti kaye worra sunile aka male lalefachisa. Naabo Soani ch'absani dira suni ch'ufa bisaani iti baafatani.

¹⁷Kaimi dira Onitifi ka Pibesethi woraanaani hobae, jara kaani d'ibile boojiani.

¹⁸Anini humna Misiri, ta isiini d'aabbatte taani ch'absinaani lafti Tapanesi dukanoofti. Ammalle dumansi lafa Misiri d'osse, nama dira isii keesa tau ch'ufale boojiani.

¹⁹Gaafa anini lafa Misiri kara kanani balleesu, worri aka anini AABBO Waaqa beekha.

²⁰Guyya torbeeso, ka jia qara, ka ganna kud'ani tokeeso, ka nu haga nu boojiani teenne, AABBO Waaqi na yaame waan nani jed'e,

²¹Namicha, anini yayu harka hayyu Misiri ch'ach'abse, nami tokoleeni ka ch'aba suni isaa mare hid'e akasiini inni fayye harka sunini deebie goraade qabatu injiru.

²²Amma tana duuba wonti anini, AABBO Waaqi guddaani, jed'u tana: Anini yayu hayyu Misiriti nyaape; anini harka isaa lachu, ka qara ch'abeefi ka inch'abinile, ch'abse goraade harka isaa keesaa buusa.

²³Ammalle anini worra Misiri lafa ch'ufa keesati firfirse, harka hayyu Babiloni jabeese, goraade tiyya harka isaa keesa kaya.

²⁴Ammalle anini harka hayyu Misiri ch'abse, duuba inni aka hama madae, laalefate ooe, nyaapa isaa durati dua.

²⁵Ee, anini isa laafise hayyu Babiloni jabeesa. Hojja anini goraade tiyya harka isaa kenne, inni Misiriti fuula deebisu, nami ch'ufti yo suni aka anini AABBO Waaqa beekha.

²⁶Ammalle anini worra Misiri lafa ch'ufa keesati firfirsa, duuba akanaani worri aka anini AABBO Waaqa beekha.