Read BORANA BIBLE – KITAABA WAAQA Ezekieli 31 Bible Online

Ezekieli 31 - BORANA BIBLE – KITAABA WAAQA bible

Ezekieli 31

¹Guyya qara ka jia sadeeso, ka ganna kud'ani tokeeso, ka nu haga nu boojiani teenne, AABBO Waaqi na yaame waan nani jed'e,

²Namicha, waan atini hayyu Misiritiifi gumi isaa ch'ufaani jettu: Atini guddo jabeenna qabda, siifi eenu dandaani woli fakeesani?

³Atini hind'eesa Lebanoni fakaata, ka dameeni isaa galmoofte mid'aade baate, fiit'eeni isaa d'eerate dumansati ejitu.

⁴Bisaanti jira ka isa baase, madda jala yaa ta isa jireesitu. Madditi sunini fulla mukhi eju yaate, mukha badda suni ch'ufa bisaani quubsite.

⁵Inni, maro bisaani aka dansaa argatuufi, mukha ch'ufa ira d'eerate dameeleeni isaaleeni fufurdate d'ed'eerate.

⁶Simpirreeni lafa keesa jirtu ch'ufti dameele isaa irati mana jaarate, bineensi alalleni isa jalati ilmaani d'ale, gochiti lafa ch'ufaleeni gaadisa isaa jala boqotti.

⁷Mukhi sunini akami mid'aaga — old'eerate dameele d'ed'eertu baasa. Hiddi isaaleeni gadi fagaate, madda jala burqitu d'aqaba.

⁸Hind'eesi tokoleeni, ka oobru Waaqa keesa jiru, ka isaani wolfakaati injiru. Mukhi tokoleeni ka dame akasi qabu injiru. Mukhi abratu fakaatu ka akasi galmaleeni injiru. Mukhi oobru Waaqa keesa jiru, ka akasi mid'aagu, tokoleeni injiru.

⁹Anini dame isaa galmeese, akasiini mukhi ch'ufti ka oobru Waaqa ta Edeni keesa jiru, isa halcha.

¹⁰Duuba amma tana anini, AABBO Waaqi guddaani, waan mukhi d'eerate duumansa gahu sunini tahu siti hima. Inni akuma bahe old'eeratuni ufi saada;

¹¹tanaafi anini isa dide, harka hayyu lafa d'ibiti kenna. Inni ch'ubbu mukha suni gula waan isaa male tolcha.

¹²Gochiti d'ibiini, ta naasu inqamne, d'ufte isa murte, qaarifte yaalabaati. Dameeleeni isaa ch'ufti gaara gubbafi bale ch'ufa keesati jidde, gochiti qara isaa jala boqatu taani ch'ufti kaate biraa yaati.

¹³Simpirreeni d'ufte mukha qaarie suni ira teteete, bineensi alalleni d'ufe dameele isaa ira yaa.

¹⁴Tanaafi armaa achi mukhi tokoleeni, ato haga fed'u madda gubba ejele, deebie haga mukha suni ind'eeratu, yokhaani old'eerate fiit'eeni isaaleeni dumansa intut'u. Mukhi ch'ufti, akuma namaa due boola ekhera d'aqa.

¹⁵Wonti AABBO Waaqi guddaani jed'u tana: Guyya mukhi sunini due boola ekhera d'aqu, anini bisaani madda iti fach'aasa, aka wonti sunini akheekha boha taatufi. Ammalle anini yaasuma galaana kute, madda heddule yau d'owa. Waan mukhi kunini duefi, anini gaareeni Lebanoni ch'ufa dukaneese mukha badda isiile ch'ufa gogosa.

¹⁶Hojja anini mukha suni boola ekhera keesa buusu, dibbeesi lafa d'aicha isaa gosa ch'ufa chochoosa. Qaariitini isaa suni mukha Edeni ch'ufafi mukeeni Lebanoni ta bisaani burqa gubba ejaanjitu ch'ufa ta boola ekhera d'at'e, guddo gammachiifti.

¹⁷Mukeeni sunini ch'ufti, mukha suni woliini, gara mukeeni duru qaqarite, ta boola ekhera keesa jirtu taani, d'at'i. Ammalle nama gaadisa mukha suni jala boqotu kaani ch'ufa gosa ch'ufa keesati firfirsani.

¹⁸Mukhi sunini hayyu Misiritiifi nama isaa ch'ufa. Mukhi tokoleeni ka Edeni keesa jiru, ka akasi d'eerate mid'aagu, tokoleeni injiru. Ammo amma tana akuma mukeeni Edeni taani, mukhi suni boola ekhera d'aqe, worra Waaqa imbeenneefi ka woraanaani d'umeti darama. Nami waan kana jed'u ana, AABBO Waaqa gudda.