Read BORANA BIBLE – KITAABA WAAQA Ezekieli 33 Bible Online

Ezekieli 33 - BORANA BIBLE – KITAABA WAAQA bible

Ezekieli 33

¹AABBO Waaqi na yaame waan nani jed'e,

²Namicha, waan atini gosa teetiini jettu, yo anini woraana lafatini d'ufe, worri lafa suni nama lafa eegu tolfata.

³Nami suni yoyu nyaapa gad'ufu argu, iyye aka nyaapi d'ufu namati hima. Inni magalaata d'ae, aka nyaapi d'ufu nama ch'ufa beesisa.

⁴Yo nami magalaata suni d'agaye ch'aqasu dide nyaapi sunini d'ufe isa ijeese, inni ufuma haalata.

⁵Wonti inni ufi haalatufi waan inni iyyanna d'ufiisa nyaapa himtu odu kaasu dideefi. Inni ato sila waan suni odu kaase duraa fa baha.

⁶Ammo yo namichi nyaapa eegu kaani nyaapa d'ufu arginaani magalaata d'au dide, nyaapi d'ufe worra ch'ubbu suni hobaase anini namicha lafa eegu suni qabad'a.

⁷Namicha, amma tana anini nama gosa Israeli eegu si tolcha. Gorsa anini siti himu kana jabeesi worrati himi.

⁸Yo anini ch'ubbicha yaame, atini indoota jed'eeni, ka atini isa yaamte, kara kanke hama kana iraa deebii, hegeri indoota jette ingorsini, inni dabuma suni keesa dua, duuba duisa isaa suni si qabad'a.

⁹Ammo yo atini ch'ubbicha suni gorsite, inni daba lakisu dide, inni dabuma suni keesati dua, ammo atini lubbu tante imbaafta.

¹⁰AABBO Waaqi na yaane waan nani jed'e, Namicha waan atini worra Israelitini jettu, wonti isani jettani tana: Wollaali keennafi ch'ubbuuni teennaleeni yayu ulfinna nuti taate nyaate nu fit'e. Amma akamiini jireenna arganna?

¹¹Duuba waan jettuuni, AABBO Waaqi guddaani waan jed'u, Anini inkakhad'a, aka hojja ch'ubbichi duu ingammanne. Anini sila fulla suni aka inni ch'ubbu lakise jiraatu fed'a. Worra Israeli, ch'ubbu teesani iraa deebia. Isani maafi duu feetani?

¹²Namicha, amma tana waan atini worra Israelitini jettu, Hojja nami d'uga ch'ubbu tolche, d'ugaani duri inni tolche taani isa imbaaftu. Ch'ubbichale yo inni ch'ubbu iraa deebie, diqole imballeesani; ammalle yo nami d'ugaa qajeelani ch'ubbu tolche inni lubbu imbahu.

¹³Yo anini nama d'ugaatini, Atini injiraata jed'e, ammo inni, wonti dansaani duri ani tolche taani ya naa geete jed'e, garagale ch'ubbu tolche, anini waan dansa duri inni tolche tokole inhereguufi. Inni maruma ch'ubbu ufitifi dua.

¹⁴Yo anini nama ch'ubbichani, Atini indoota jed'e, ammo inni ch'ubbu suni iraa deebie waan d'ugaa ka qajeela tolche —

¹⁵dubbi jenne, yo inni qabdo duri nami isa ira woi liqeefate isati kenne galche, yokhaani waan hatele deebise — yo inni daba lakise aada jireenna namaa kennitu gula deeme, inni induu injiraata.

¹⁶Anini ch'ubbu inni tolche inaraaramafi, innileeni maro waan d'ugaa ka qajeela tolcheefi injiraata.

¹⁷Duuba worri keesani kama waan kana argu, karaani AABBO Waaqa qajeelaniti jed'a! Ammo akasiiniti, karaani qajeela intahini kamu worrati.

¹⁸Hojja nami d'ugaa qajeelani d'ugaafi qajeeluma isa suni lakise waan hamtu tolche, inni inuma dua.

¹⁹Ammalle hojja ch'ubbichi ch'ubbu ufi lakise waan d'ugaa ka qajeela tolchu, inni lubbu ufi baasa.

²⁰Ammo isani worri Israeli, karaani AABBO Waaqa qajeelaniti jettani. Tanaafi anini isani namu woma inni taheeni qora.

²¹Guyya shaneeso, ka jia kud'anneeso, ka ganna kud'ani lameeso, ka nu haga nu boojiani teenne, nami toko ka dira Yerusalemu keesaa baqate nati d'ufe waan nani jed'e, Dira kenna ya nyaapi balleese.

²²Galgala inni d'ufe suni aka kaleeti, harki AABBO Waaqa na tuqe jennaani afaani na duudani. Boriyyaate namichi kaani d'ufnaani AABBO Waaqi afaani na bane.

²³AABBO Waaqi na yaame waan nani jed'e,

²⁴Namicha, worri dira Israeli ka bade ona tae suni keesati galu, waan jed'u, Abrahamuuni nama toko ch'alla, ammo lafa ch'ufa isaa kennani; nu nama heddu, tanaafi lafti teennuma.

²⁵Duuba waan atini worraani jettu, AABBO Waaqi guddaani waan jed'u, Isani fooni ato d'iiga keesaa imbaasini nyaattani, waaqa d'ara ka harkaani boch'ani kad'attani, namale ijeeftani. Ka isani ufiftu akasi taatani, lafti maanini teesani taati re?

²⁶Isani ammalle goraaduma teesani d'aabbattani, waan hamtu taatani, nad'eeni biyyale barattani, ka isani ufiftu waan akana kana taatani, lafti maanini teesani taati re?

²⁷Waan atini worra kanani jettuuni; wonti AABBO Waaqi guddaani jed'u tana, Anini inkakhad'a, aka nami dira balleesani ona tolchani suni keesa tau hobae, nami nama dira intahini, ka badiale, bineensi ala nyaate fit'u.

²⁸Anini lafa tana balleese ona tolche irre worraa ta worri d'aabatule hobaasa. Gaareeni lafa Israelileeni baate duude danqara nami tokoleeni dandae keesa imbaane taate.

²⁹Yo anini ch'ubbu worrati jed'e, lafa balleese ona tolche, akanaani worri aka anini AABBO Waaqa beekha.

³⁰AABBO Waaqi waan jed'e, Namicha, biyyiti yo wolwoldeete naabo keesati wolti baate afaani ch'icha mana worraa ejaanjatule woma kanke dubbate waan woliini jettu, me koota, waan AABBO Waaqi jed'e d'ageenna.

³¹Duuba gumiini tiyya wolti baate, waan atini jettu ch'aqasu d'ufti, ammo dubbi tante suni tokole gula iyyaatu; isiini akuma sirba worrati jirti, worri tanaleeni iraa deebie sabdooma ufi illakisu.

³²Atini worraa namuma kirari d'ae nad'eeni faarsu fakaata. Worri dubbi tante ch'ufa inch'aqasa, ammo diqole gula iyyaau.

³³Ammo ya dubbini tante ch'ufti guutamtu — isiini inuma guutamtile, hojja suni worri aka raagi d'ufe worraa woi fage beekha.