Read BORANA BIBLE – KITAABA WAAQA Ezekieli 38 Bible Online

Ezekieli 38 - BORANA BIBLE – KITAABA WAAQA bible

Ezekieli 38

¹AABBO Waaqi na yaame waan nani jed'e,

²Namicha, hayyicha gudda gosa Meeshekitifi ta Tubali, ta lafa Magogu jirtu, mohatu, ka Gogu jed'ani, abaari

³waan jettuuni; wonti AABBO Waaqi guddaani jed'u tana: Anini ya siti nyaape.

⁴Anini qabe, gara si galche, hooko boqoti si d'ae, siifi askarti teetile alati hirkisa — fardoole tante nama isi yaabatu woliini, ammalle gumi muumme inqamne ta wonte didiqofi gugurdo qabdu, ta goraadele qabdu.

⁵Nami lafa Ajemitifi ka Kushitifi ka Putuleni, ka wonteefi kofia sibiilale qabu ch'ufti worra woliini jira.

⁶Duuli lafa Gomeritifi ka Beth-Togarma ka mirga d'ufefi nami gosa d'ibi keesaa d'ufeleeni si woliini jira.

⁷Kurfefad'i, askarti qabdu ch'ufaani kurfo tai.

⁸Eegi ganna heddu anini si yaame duuba atini gosa qara lafa isaani keesaa baasani, ta lafa hedduti gargari firfirfamte, ammo amma wolti deebite nagayaani lafa keesa teetu, haata. Atini gaareeni Israeli ta qara badde danqara taate ta amma nami iti deebie nagayaani keesa tau, haata.

⁹Siifi duula kanke ch'ufafi gochiti hedduuni ta goli teetileeni d'uftani, aka bubbe lafa suni d'ooftani aka hurri d'ossitani.

¹⁰Wonti AABBO Waaqi guddaani Goguni jed'u tana: Hojja guyyaani sunini gahu, atini mala hama d'aate

¹¹waan jettu, Anini lafa nagaya ta nami isii dagu jiru, ka diri worraleeni naabofi fullo inqamne, had'a.

¹²Anini worra duri boojiani lafa heddu geesani amma wolti deebisani dira isaani ka duri bade ona tae keesati galu, ka hori qeench'atifi waan heddu d'ibi qabu, ka jiddu lafa keesa tau, had'e saama jetta.

¹³Worri Shebatifi ka Dedanitifi daldaltu dira Tarshishitifi ollowaani isaaleeni waan sini jed'u, Atini duula baafte nu haate nu saamu feeta? Qarsifi worqi teennafi hori qeench'atifi miha keennale ch'ufa guuratte boojiu feeta?

¹⁴Tanaafi, Namicha, fagi, waan Goguni jettu, AABBO Waaqi guddaani waan jed'u, Amma, ato gumiini tiyya ta Israeli ufumaa nagayaani teetu, atini

¹⁵duula muumme inqamne ka farda qabu, gosa ch'ufa keesaa baafte lafa tante ta fago ta mirgaati d'uftani.

¹⁶Atini gumi tiyya ta Israeli aka hurri iti lafa qabate haata. Hojja guyyaani sunini gahe anini lafa tiyya had'iisaa iti si erga, aka akasiini gochiti ch'ufti na beete, qulqullooma kiyya, waan anini si hojachisuni, argitu.

¹⁷Nami anini duri, gaafa hojattu tiyya raagoota Israelitini dubbad'e,

¹⁸Takaa tana nama Israeli had'uni d'ufa jed'e waan isaa hime kaani si. Nami dubbi tana jed'e ana, AABBO Waaqa gudda.

¹⁹Anini owa dallansu tiyya keesa inkakhad'a aka guyya suni lafti Israeli ch'ufti guddo chochootu.

²⁰Qurt'umifi simpirreefi bineensa didiqafi gugurdafi nami lafa tana gubba jiruleeni ch'ufti, na sodaate holata. Gaareeni qaqarite, d'akhayeni raraato ch'ufti lafati jidde, naaboni diraleni ch'ufti ch'ach'abt'i.

²¹Gogule gaargala lafa keesa jiru, ka aka heddu ch'ufa, isatini d'ufe mudamsiisa nami dubbi tana jed'e ana, AABBO Waaqa gudda. Ammalle nami ch'ufti wolti kae, goraadeeni wolballeesa.

²²Anini d'ukuba ch'iisa hamani iti d'ufe, woraanaleeni d'iiga isa jissa. Bokaya tamna d'akhaani roobufi ch'ile ibidatiifi ibida bobau woliini roobe, isaafi askarti isaatiifi gosa heddu goli isaa taani ch'ufa balleesa.

²³Kara kanaani aka anini guddinnaafi qulqullooma qabu gosa ch'ufa garsiisa. Duuba akanaani gochiti ch'ufti aka anini AABBO Waaqa beeti.