Read BORANA BIBLE – KITAABA WAAQA Ezekieli 39 Bible Online

Ezekieli 39 - BORANA BIBLE – KITAABA WAAQA bible

Ezekieli 39

¹AABBO Waaqi waan jed'u, Namicha, hayyu gudda lafa Meshekitifi ka Tubali, ka Gogu jed'ani, abaari waan jettuuni, Anini yayu siti nyaape, jed'iini.

²Anini kara d'ibi si qajeelche, fago lafa mirgaati siini d'ufe gaara Israelitini si baasa.

³Duuba guube tante d'ae, harka kanke bitaacha keesaa buuse t'iyale mirgicha keesaa si buusa.

⁴Siifi duula keetifi golini teetileeni ch'ufti gaareeni Israeli irati hobaatani, reefa keesani allaatiifi bineensi alaa nyaata.

⁵Atini ballina lafaa keesati doota; nami dubbi tana jed'e ana, AABBO Waaqa.

⁶Anini lafa Magogutifi lafa afaani baariini jirtu, ta nami isii nagayaani taule, ibida iti kaye duuba akanaani nami ch'ufti aka anini AABBO Waaqa beekha.

⁷Duuba anini gumi tiyya ta Israeli, aka maqaani kiyya qulqullo garsiisa ammalle nami deebie maqa kiyya qulqullo int'ureesu. Duuba akasiini gochi ch'ufti aka anini AABBO Waaqa, qulqullo Israeli, beeti.

⁸AABBO Waaqi guddaani waan jed'e, Guyyaani anini ind'ufa jed'e kaani d'ufu male inhanqatu.

⁹Worri dira Israeli keesa tau miha lola ka nyaapi iraa raawate kaani guure qoraani ibidaa tolfata. Worri wonteefi guubefi t'iyafi woraanafi boku ch'ufa guure ibidaani bobeese haga ganna torba qorani tolfata.

¹⁰Worri deebie raasa d'aqe qoraani inch'absatu, yokhaani badda d'aqe mukha inch'iru, wonti akanatiifi miha lola ka nyaapi iraa raawate kaani bobefatani. Worri nama duri worra saame balleese iti garagale saame balleesa. Nami dubbi tana jed'e ana, AABBO Waaqa gudda.

¹¹Guyya wonti kunini ch'ufti taate, anini Gogu Bale Ideemtu, ta galaana soda ilaboru jirtu, lafa Israeli keesa fulla iti awaalani tolchaafi. Gogufi duula isaa ch'ufa achiti awaalani, duuba bale sunini Bale Duula Gogu jed'ani.

¹²Worri Israeli ch'ufti haga jia torba reefa suni wolti guure awaale, akasiini lafa qulqulleesa.

¹³Nami lafa suni keesa jiru ch'ufti wolti bahe worra kana awaala. Duuba guyya dabsacha tiyya worri sunileeni gurra argata. Nami waan kana jed'e ana, AABBO Waaqa gudda.

¹⁴Eegi jii torbaani kaani hobaele, nama tolchani, lafa suni ch'ufa keesa ergani, goblola hafe fa barbaada lafa qulqulleesa jed'aniini,

¹⁵Worri ato oli gadi maru yo lafe namaa argu, akheekha woi d'aatu lafe suni kaye, aka yo worri nama awaalu kaani d'ufu arge fuud'e Bale Duula Gogu jed'ani taani keesati awaalu.

¹⁶(D'aatu suni dira maqa duula suni iti baasaniti jira.) Duuba akanaani lafti qulqulloofti.

¹⁷ AABBO Waaqi guddaani waan nani jed'e, Namicha, allaatiifi bineensa gosa ch'ufa yaami waan jettuuni, gara ch'ufaa wolti koota, sorio anini isanii kurfeese tana nyaad'a. Sorioni gaareeni Israeli irati tolchani tunini sorio guddo, ta isani fooni nyaattani d'iiga d'uddani quuftani.

¹⁸Isani fooni askarti nyaattani, d'iiga worra lafa mohatu d'uddani — ka aka elemiyetifi aka ilmaani hoolatifi korbeeyiifi yokhaani koromi looni qaqalani.

¹⁹Yo anini worra kana ch'ufa aka sorio qaqale, allaatiifi bineensileeni, haga dandaani, gabbinna nyaatani quufani, d'iiga d'ugani woliini raraatani.

²⁰Worri fulla mesa sorio tiyya suniti, fooni fardatifi ka nama isa yabatutifi ka askarti aka heddule, haga dandae nyaate quufa. Nami dubbi tana jed'e ana, AABBO Waaqa gudda.

²¹AABBO Waaqi waan jed'e, Anini gosa ch'ufa guddinna kiyyafi humna tiyya, ta waan d'ugaatifi ta qajeelumatini tolchu, garsiisa.

²²Duuba worri Israeli arti achi, aka anini AABBO, Waaqa isaani beekha.

²³Ammalle gochiti d'ibileeni, aka worri Israeli maro ch'ubbu worri nati hojateefi boojiani, beeti. Anini worra iraa garagale, harka nyaapa worraa, ka woraanaani worra fit'eti kenna.

²⁴Anini maro ch'ubbu worraatifi t'uri hamtu worri tolche jed'e, waan worraa male kenneefi dudda iti gale.

²⁵AABBO Waaqi guddaani waan jed'e, Ammo amma tana anini d'aloota Yakobo, ka gumi Israeliti nahe worra horsiise deebanse, maqa kiyya qulqulloole jabeesa.

²⁶Hojja worri nagayaani worra ufi keesa tau, ka nami tokoleeni worra imudamsimne, worri aka gaafa duri nati garagale kaani ch'eera irati hafe, inded'a.

²⁷Anini gumi tiyya ta boojiani lafa heddu geesani galche, akasiini gosa heddu aka anini qulqullo garsiisa.

²⁸Duuba gumiini tiyya aka anini AABBO Waaqa isaani taanaani beeti. Wonti worri waan suni beekhufi, waan anini aka worra boojiani lafa d'ibi geesani iti lakise, ammo amma worra ch'ufa, ka tokole inhambisini, wolti guure lafa isaniti galchefi.

²⁹Anini lubbu tiyya worra Israeliti erga, armaa achi deebie dudda iti ingalu. Nami dubbi tana jed'e ana, AABBO Waaqa gudda.