Read BORANA BIBLE – KITAABA WAAQA Ezekieli 9 Bible Online

Ezekieli 9 - BORANA BIBLE – KITAABA WAAQA bible

Ezekieli 9

¹Jennaani anini qonqo Waaqa ta, Isani nami dira kana balleesu woraana guurad'a koota, jettu d'agaye.

²Hojuma suni nami jaa, ka woraana qabu, balbala mirga ta Mana Waaqa ta alaatini gabahe. Worra suni woliini nama toko, ka waan woini t'aafufi waan irati t'aafule harkaa qabu, ka woya boofta keeyatuti jira. Worri kunini ch'ufti d'ufe d'aatu waan sorio irati qalani, ka sibiila diimani mid'aasani, ejaanje.

³Jennaani ifsaani bibiliqu, ka aka Waaqi Israeli arti jiru garsiisu kaani, waan lubbu qaba ka koola kaani fulla qara jiru taani iraa kae, gara balbala Mana Waaqaa deeme. AABBO Waaqi namicha woya boofta keeyatu kaani yaame waan jed'eeni,

⁴Beeni, dira Yerusalemu kana ch'ufa keesa deemi, nama waan hamtu dira kana keesati tolchani ch'ufaa jed'e laalefate bohu, adda isaani beesisa ira kayi.

⁵Ammalle anini Waaqa, worra suniini, nama kana gula yaa, dira kana keesa fulla ch'ufa baha, nama tokole naataanifi illakisina, ch'ufa hobaasa jed'u d'agaye. Ammalle inni waan jed'e,

⁶Jaaroleefi kaimafi dubrafi haawanifi ijoollele ch'ufa fit'a, ammo nama beesisa adda iraa qabu tokole intuqina. Huji suni manuma kiyya kanani iti keeyad'a. Duuba worri jaaroluma fulla Mana Waaqa jirtu taanini iti keeyate.

⁷Jennaani Waaqi waan worraani jed'e, Mana kiyya kana t'ureesa, ch'icha isale reefani guuta. Amma kaa hojad'a! Duuba akasiini worri kaani kae, nama dira keesa jiru hobaase.

⁸Haga worri tae nama fit'u, anini koba achiti hafe; jennaani lafaani ufi d'ae, iyye waan jed'e, Ee, AABBO Waaqa gudda, atini nama Yerusalemu keesa jiru akana iti dallante, nama Israeli keesa jiru ch'ufa hobaafta?

⁹Waaqi waan nani jed'e, Worri Israelitiifi ka Yuda ya ch'ubbu hamtu tolche. Worri yayu lafa ch'ufa keesati nama fit'e Yerusalemu ch'ubbuuni guute. Worri waan jed'u, AABBO Waaqi ya lafa teenna lakise. Inni amma nu inargu.

¹⁰Ammo anini diqole worraa innahu; woma worri nama tolche aninileeni worra tolcha.

¹¹Jennaani namichi woya boofta keeyatu, ka waan woini t'aafufi waan irati t'aafu harkaa qabu, ga deebie waan AABBO Waaqaani jed'e, waan atini tolchi nani jette ch'ufa anini ya guute.