Read BORANA BIBLE – KITAABA WAAQA Amosi 4 Bible Online

Amosi 4 - BORANA BIBLE – KITAABA WAAQA bible

Amosi 4

¹Isani nad'eeni Samaria gagabbo aka haawicha Bashani, ta nama lalaafa dabsite hiyyeeyi gaargalchitu, ta d'iirsoota ufii yaamte, Faarso nuu keenna jettuuni, dubbi tana ch'aqasa.

²AABBO Waaqi Guddaani qulqullooma ufiitini kakhate waan jed'e, Guyyaani ind'ufa, ka isani ch'ufa akuma qurt'umi hookooni hirkisani.

³Fulla naabo ch'ach'absani, ta isani d'aatutiini, isani hirkisani, alati isani jissani.

⁴AABBO Waaqi Guddaani waan jed'u, Nami worra Israeli, gara Betheli d'aqa, daba tolcha! Yo feetani, Gilgali d'aqa, haga dandeetani ch'ubbu tolcha! Diirama ch'ufa sorio qalani kootaani, qooda Waaqaa baaftani ch'ufa guyya sadeeso ch'ufa kootaani.

⁵Qit'a bukho inqamne Waaqaa baasa, galata deebisa, waan isani fed'i teesani gula Waaqaa baaftaniini ufi guddisa! Wonti isani jaalattani tana.

⁶Nami beela jabdu dira keesanifi worra keesaniti buuse anuma.

⁷Anini ammalle bokaya sila mid'aani keesani bilcheesu buu d'owe dira toko bokaya roobe ka d'ibi d'owe. Bokayi oobru tokoti roobe, ammo ta d'aatu bokaya d'abde goddi.

⁸Duuba nami dira gari ch'ufti dira d'ibi bisaani barbaadachu d'aqe, ammo d'eebu bahu dad'abe. Taatule isani nati indeebine.

⁹Anini bubbe owituuni d'ufe mid'aani keesani gube, awaanisi oobru teesani ch'ufa ta zabibutiifi ta odatiifi ta ejersale nyaate. Taatule isani nati indeebine.

¹⁰Anini gaargala aka lafa Misiriti buuse isaniti buuse. Anini kaima keesani lola keesati fit'e, fardoole teesanile isani iraa fuud'e, ammalle fulla isani teetani reefa namatiini ajeese. Taatule isani nati indeebine.

¹¹ Anini isani nama haga gari, akuma anini Sodomafi Gomora balleese, balleese. Isani nami hafe aka qoraani ibidaa, ka ibida keesaa fuud'ani, jirtani. AABBO Waaqi waan jed'e, Taatule isani nati indeebine.

¹²Tanaafi worra Israeli, wonti anini isani tolchu tana: Waan anini waan kana isani tolchufi aka Waaqa keesani dura d'uftani kurfefad'a!

¹³Ka gaara mid'aase bubbe uumeleeni isuma; ka herega ufii nama barsiisu isuma; ka guyya halkani tolche gaareenile ch'ufa gubba deemu — AABBO Waaqa, ka Abba Waan Ch'ufa jed'aniini.