Read BORANA BIBLE – KITAABA WAAQA Henna 11 Bible Online

Henna 11 - BORANA BIBLE – KITAABA WAAQA bible

Henna 11

¹Gumiini gaargala ufiiti AABBO Waaqati gungumte, jennaani inni d'agaye dallane, ibida gubbaa worrati erge.

²Ibidi suni jiddu worrati wogube moga olla toko balleese. Jennaani gumiini Musati boote, inni AABBO Waaqa kad'ate, ibidi d'aame.

³Duuba fulla suni maqa Tabera baasani, wonti akanatiifi ibidi AABBO Waaqaa artiti nama gube.

⁴Worra seseega yau, ka worra Israeli intahiniti ka, worra gula godaanu, jira. Duuba worri sunini guddo fooni jaalate sabdaeni, worri Israelileeni gungume waan jed'e, Ato sila fooni nyaannu qabaanne akami dansa!

⁵Gaafa Misiri keesa jirru nu qurt'umi haguma feenu nyaanne gaafi male, mee mid'aani aka bododafa, qulubi fa, sagale miooftu d'ibi ta duri nu nyaanne qaabad'a.

⁶Ammo nu amma yayu gogonne hobaane, wonti tokoleeni ka nu soorannu injirtu sagale manna jed'ani tana male!

⁷ (Mannani tunini mid'aani didiqo hahad'icha adadi aka haampe jira.

⁸Isiini halkani fit'eesa keesa olaati gabuuti. Boriyyaate nami kae guurate, daakhe d'aabate, qit'a tolfata. Hojja nyaatani aka qit'a d'ad'ani d'aabani mioofti.)

¹⁰Musani aka gumiini wolwoldeete balbala waaro ufi durati gugungumte d'agaye laalefate, wonti akanatiifi AABBO Waaqati worraati dallane.

¹¹Jennaani waan AABBO Waaqaani jed'e, Atini maanifi waan hamtu kana na tolchita? Atini maanifi na dabsite, ulfinna worra kana ch'ufa nara keete, akana na tolchita?

¹²Worra kana ch'ufa nati garaachae d'ale? Atini maanifi akko worraa na tolchita, anini worra kana aka daima hampaare, lafa atini ababoota worrati kakhateeni d'ufa?

¹³Anini eesa fooni worra kana nyaachisu arga? Worri kunini guyya ch'ufa aka saree gururie fooni nyaatu nara barbaada.

¹⁴Anini worra kana ufiti indandau, baani worraa ya nati ulfaate!

¹⁵Yo atini ka akana na tolchitu taate na nahi, na ijeesi, aka anini deebie gaargala akana siraa inarganne.

¹⁶AABBO Waaqi waan Musani jed'e, Jaarole torbatama, ta gurra qabdu, ta gumi keesa mataa fakaatu, wolti yaami, fulla balbala Waaro Woyyumati natiini kooti, worri ka arti sibira ejaanjuti.

¹⁷Duuba anini gabue, artiti siini dubbad'a, ammalle jabeenna lubbuu ka qara si kennele haga gari siraa fuud'e worraa kenna. Akanaani worri si qarqaare, baani worraa siti sablate, wahela argatta.

¹⁸Amma tana waan biyyaani jettu, Guyya boriti jed'a, ufi qulqulleesa, fooni nyaatani inargattani. AABBO Waaqi ya gururisu teesani, ta isani, Eentu fooni nu nyaannu nuu kenna? Gaafa nu lafa Misiri keesa jirru hagana ira jira jettani d'agaye.

¹⁹Amma tana AABBO Waaqi fooni isani nyaatani isanii kenna. Guyya tokofa, lamafa, shanifa, kud'anifa yokhaani diddamafa ch'alla inyaatani,

²⁰ammo bulti addeesafi dukana ch'ufa nyaatani, haga fooni suni isani ira dabrani funnaaniini isani keesa dachaaniti. Wonti kunini ch'ufti, woni isiini taatufi, waan isaani, AABBO Waaqa ka jiddu teesani keesa jiru kana diddani, Maanifi lafa Misiri keesa baane? jettani gungumtanifi.

²¹Musani waan AABBO Waaqaani jed'e, Gumiini anini deemuni tunini nama kunki d'ibba jaati, atini duuba d'uguma haga jia toko fooni worraa kenna jetta?

²²Loonifi ree worra quubsitu dandaani inqalani? Qurt'umini galaana ch'ufti yo guurani worra ingeeti?

²³AABBO Waaqi waan Musani jed'e, Harka kiyya gababa seeta? Duuba atini amuma tana aka dubbini guutamte yokhaani inguutamne agarta!

²⁴Jennaani Musani gabahe waan AABBO Waaqi isaani jed'e biyyati hime. Inni jaarole nama torbatama yaame, Waaro Woyyuma d'aatuni d'ufe.

²⁵Jennaani AABBO Waaqi dumansa keesa gabue isaani dubbate, jabeenna lubbu qara isaa kenne haga toko iraa fuud'e, jaarole torbatama taani qoode. Lubbuuni ira bute jennaani worri haga gababa toko aka raaga iyye.

²⁶Jaarole torbatama suni keesa, nami lama, ka Heldadifi Medadi jed'ani, fulla Waaro suni d'ufu dide worrati hafe. Achi olla keesati, worrale lubbuuni ira bute, worrileeni aka raaga iyye.

²⁷Namichi kaimtichi toko utaale, waan Heldadifi Medadini tahani Musati hime.

²⁸Jennaani Yoshuani, ilmi Nuni, ka haga kaimoma isaati Musa jala hojatu, waan Musani jed'e, Worra kana ch'allisisi, Aabbo!

²⁹Musani waan jed'eeni, Atini waan worri kunini tahe ira hameenna agarta? Yo sila taate anini aka AABBO Waaqi lubbu isaa nama ch'ufa ira buuse aka raaga iyyisisu fed'a!

³⁰Jennaani Musafi jaaroleeni Israeli torbatami taani waaro ufiti dachaate.

³¹AABBO Waaqi bubbe erge gara galaanati simpirreeni gosa toko ta lafati gad'iaate d'und'uma lama lafa hanqate bariftu, d'ufeeni. Simpirreeni sunini olla worra gama ch'ufaani marsite, lafa qabatte, fageenna lafa haga deema guyya toko ch'ufa guute.

³²Tanaafi guyyaafi halkani sunifi boriyyaatele simpirre suni guuratani; nami tokoleeni ka kilo kuma toko inguuratini injiru. Duuba aka goffatani, d'aatu waaro ufiti lafati afaani.

³³Ato worri fooni afaani qabu, AABBO Waaqi worrati dallane, ch'iisa d'ukuba hama worratiini d'ufe.

³⁴Fulla suni Kibroth-Hataava jed'ani, akasi jechuuni Awaala worra sabdicha, wonti akanatiifi achiti worra jaalate fooniini sabdae awaalani.

³⁵Gumiini achi kaate Haserothi qubate achi teete.