Read BORANA BIBLE – KITAABA WAAQA Henna 14 Bible Online

Henna 14 - BORANA BIBLE – KITAABA WAAQA bible

Henna 14

¹Halkani suni ch'ufa biyyiti iyyite boote

²Musafi Haruni gungumte waan jette, Sila guddo ira nuu dansa yo lafa Misiri keesati doone yokhaani ato lafa aloo tana keesati doonele!

³AABBO Waaqi maanifi lafa suniti nu geesa? Achiti hegeri lola keesati nu ijeesani, nad'eenifi ijoolle teenna boojiani. Yo lafa Misiriti deebine ira nu jirtiniti?

⁴Duuba waan woliini jed'ani. Nama toko fohanna, ka nuni deeme lafa Misiriti nu deebisu.

⁵Duuba Musafi Harunini worra Israeli durati gajejed'ani.

⁶Jennaani Yoshua ilma Nunitifi Kalebuni ilmi Yefune, ka worri lachu worra dooya d'aqe keesa jiru, laalefatani woya ufi tarsaasani,

⁷waan gumiini jed'ani, lafa nu keesa yaane dooyanne, lafti haga isii dansa lafa keesa injirtu.

⁸Hojja AABBO Waaqi nuraa gammade, inni achi nu geese, lafa aananifi dammi aka lola yau suni nuu kenna.

⁹AABBO Waaqa diddani iraa ingorina, worra lafa suni insodaatina, worri womaa keesa nu injiru, hure dabsanna. AABBO Waaqi nu woliini jira, Waaqa worra, ka worra qorqoratu, yayu dabsate irre d'owe, tanaafi insodaatina.

¹⁰Jennaani gumiini ch'ufti worra suni d'akhaani haate ijeesu feete, ammo maro tokotu worri guddinna Waaqa ka bibiliqa Waaro Woyyuma ira tau arge.

¹¹AABBO Waaqi waan Musani jed'e, Worri kunini yoomi na tufachu lakisa? Ammalle yoomi na d'aarefachu lakisa, ato anini akheekha waan mama heddu worra durati tolchele?

¹²Anini ch'iisa d'ukuba hama worrati buuse worra balleese, ammo anini sii abba gosa guddo worra ira irre qabdu si tolcha!

¹³Ammo Musani waan AABBO Waaqaani jed'e, Atini irre teetiini worra kana lafa Misiri keesa baafte. Hojja worri Misiri waan atini gumi tante tolchite d'agaye,

¹⁴worri nama lafa tana keesa tauti hima. Worri kunini qara yayu d'agaye, ee AABBO, aka atini nu woliini jirtu, ammalle aka dansaa hojja dumansi kanke nura tau, ammalle aka atini baaldo dumansa keesa guyya nu dura deemte, goola ibida keesa halkani nu dura deemtu si arga.

¹⁵Amma hojja atini gumi tante ch'ufa hobaafte, gochiti gurra kanke jaba d'ageete waan jettu,

¹⁶wonti AABBO Waaqi gumi ufi lafa aloo ta gamooji keesati hobaasefi, waan inni lafa inni worra kakhate taanini d'ufu dad'abeefi.

¹⁷Tanaafi anini amma, AABBO Waaqa si kad'ad'a irre tante nu agarsiisi, waan atini nu kakhatte guuti. Atini duri waan jette,

¹⁸Anini AABBO Waaqa, hureti indallanu, jaalalti tiyyaleeni haga inqabdu, anini dabafi ch'ubbu ch'ufa namaa araarama. Ammo ha taatuti, anini maro dabafi ch'ubbu worra isaanitifi ijoolle worra gaargalchu illakisu, haga d'aloota sadeesotifi ka afreesole.

¹⁹Amma si kad'ad'a, ee AABBO Waaqa guddinna jaalala tante ta haga inqamne keesa, daba worraa kana araaramifi, akuma atini worra araaramte haga worri lafa Misiri keesaa bahe asi.

²⁰AABBO Waaqi waan jed'eeni, Anini yayu worra araarame, kad'a tante gula.

²¹Ammo ha taatuti, d'uguma haga anini jiru yokhaani d'uguma haga lafti ch'ufti guddinna kiyyaani guutamtu,

²²worri kunini nami tokoleeni ka iraa hafe lafa tana seenu injiru. Worri guddinna kiyya ka bibiliqufi akheekha waan mama ka anini lafa Misiritiifi lafa aloo keesati tolche ya arge. Ammo worri maro heddu na ilaalate na ch'aqasu dide.

²³Tanaafi worri na dide kuni tokoleeni, ka lafa anini ababoota worraati kakhad'e seenu, injiru.

²⁴Ammo waan hojatuni tiyya Kalebuni herega d'ibi qabaate garaa tokooni na gula deemefi, anini isa lafa inni dooyate sunitini d'ufe, ilmaani isaaleeni lafa

²⁵amma bale isii keesa worri Amalekitifi worri kanaani tau fud'atti. Bori deebia, lafa qajeela galaana Diimati godaana.

²⁶AABBO Waaqi waan Musafi Harunini jed'e,

²⁷Gumiini dabdoleeni tunini yoomi nati gungumu lakifti? Gungumsuni worraa tunini ya naa geete!

²⁸Amma waan atini worraani jettu: AABBO Waaqi waan jed'u, D'uguma, haga anini jiru waan isani kad'attani kana anini isanumaa tolcha.

²⁹Isani raawattani, reefa keesani lafa aloo tana keesati firfirsani. Maro isani nati gungumtanifi isani nami ganna diddamati oli tokoleeni, ka lafa tana seenu, injiru.

³⁰Anini qara yayu kakhad'e, Isani achi teetani jed'e, ammo amma tana Yoshuafi Kelebu male nami lafa suni keesa tau injiru.

³¹Isani waan jettani, ijoolle teenna boojiani, ammo anini ijoolle suni lafa isani diddanitini d'ufe, isiini duuba achi qubati.

³²Ammo isani lafuma aloo tana keesati hobaatani.

³³Ijoolleeni teesani lafa aloo tana keesa ganna afurtama marte, maro gaargala keesanitifi gaargalti, haga isani nami ch'ufti duuti.

³⁴Maro isani bulti afurtama dooyaa d'at'ani galtanifi, ganna afurtama ka isani lafa tana teetani, gati wollaala keesani argatani, ganna toko bulti toko gula. Isani waan nami anini nyaapa iti tahe tahu inagartani!

³⁵Anini inkakhad'a, aka anini isani worri ch'ubbu, ka wolti bahe na dide, waan kana tolchu. Lafa aloo tana keesati, isani ch'ufti indootani. Nami dubbi tana jed'e ana, AABBO Waaqa.

³⁶Jari Musani dooya erge kaani dubbi d'araatiini biyyati gale. Jennaani dubbi d'ara suni gula biyyiti AABBO Waaqati gungumte. Duuba AABBO Waaqi ch'iisa d'ukuba hama iti buuse nama hobaase.

³⁸Worra dooya kud'ani lamaani kaani keesa Yoshuafi, Kalebu ch'allati iraa hafe.

³⁹Musani dubbi AABBO Waaqa tana worra Israeliti hima jennaani worri guddo iyye bohe.

⁴⁰Boriyya ganama worri duula iti d'aabate, waan jed'e, Nu amma kurfo jira, aka lafa AABBO Waaqi d'aqa nuni jed'e d'annu; wollaala keenna yayu fud'anne.

⁴¹Ammo Musani waan worrani jed'e, Isani maanifi amma dubbi Waaqa d'agayu diddani? Worra suni indandeetani,

⁴²iyyaaiina! AABBO Waaqi isani woliini injiru, nyaapi keesani isani dabsata.

⁴³Worri Amalekitifi ka kanaani isani dura jira, woraana worratiini dootani; waan isani AABBO Waaqa gula deemu didanifi inni isanii wahelche isanii inkalchu.

⁴⁴Ammo worri isa ch'aqasu dide Musafi Sanduqa Wold'aqisa AABBO Waaqa lakisani akanumati kaani lafa gaareeniti iti d'aabatani.

⁴⁵Jennaani worri Amalekitifi ka Kanaani, ka gaareeni suni keesa tau, worra had'e dabsate haga Horma gusse.