Read BORANA BIBLE – KITAABA WAAQA Henna 18 Bible Online

Henna 18 - BORANA BIBLE – KITAABA WAAQA bible

Henna 18

¹AABBO Waaqi waan Harunini jed'e, Siifi ilmaani teetifi gochiti Lawi ch'ufti gaargala, wollaala huji Waaro Woyyuma gula d'ufu ch'ufa, fud'achu maltani; ammo siifi ilmaani tante ch'allati gaargala, wollaala huji qaalluma gula d'ufu, fud'ata.

²Fiit'a tante ta gosa Lawi yaami, ha huji si qarqaarani si woliini hojataniti, hojja siifi ilmaani tante huji Waaro Woyyuma hojatani.

³Worri ka si qarqaare huji Waarole qarqaaruti, ammo worri miha woyyuma ka Fulla Qulqullo, yokhaani fulla sorio irati baasani, iti d'iaachu himmalle. Yo iti d'iaattani siifi worrileeni indootani.

⁴Worri ha si qarqaare huji Waaro Woyyuma hojatuti ammo nami d'ibiini tokoleeni siti ind'iaatini.

⁵Siifi ilmaani tante ch'allati huji Fulla Qulqullootifi ta waan sorio irati baasani hojata aka dallansuuni tiyya deebite worra Israeli ira imbune.

⁶Nami fiit'a tante ta gosa Lawi gosa Israeli keesa fohate sii kenne ana. Worra ya eebisani koba na baasani, aka worri huji Waaro Woyyuma hojatu.

⁷Ammo siifi ilmaani tante ch'allati huji qaalluma ta waan sorio irati baasanifi Fulla Fulla Ch'ufa Ira Qulqullo hojata. Wonti kunini huji teesani, waan anini huji qaalluma isani ch'allaa kenneefi. Ammo nama d'ibi tokole, ka miha woyyumati d'iaatu, ha ijeesani.

⁸Jennaani AABBO Waaqi waan Harunini jed'e, Anini waan na baasani ch'ufa, waan gubani naa baasani male, ya si kenne. Anini siifi ilmaani tanteeti kenna, aka bara ch'ufa teesanuma taatu.

⁹Wonti waan ch'ufa ira qulqullo, ka gubani sorio imbanne, teesani: mid'aani baasanifi sorio dabaani ufi iraa baasanifi waan gati baasanile wonti na kennani qulqullooni ch'ufti teetifi ta ilmaani teetiti.

¹⁰Waan kana isani nami d'iira ch'allaani fulla qulqullooti nyaad'a; aka waan qulqullooti herega.

¹¹Tanaani wolti, wonti d'ibiini ta worri Israeli naa baasu ch'ufti teesanuma. Anini waan kana siifi ilmaani tante ta d'iiratifi ta uwale haga bara ch'ufa kenna. Nami worra keeti qulqullooni ch'ufti ha nyaatu.

¹²Anini sagale, sagale ira dansa, ta worri Israeli ganna ch'ufa naa baasu, sii kenna; d'ad'a, daad'i, mid'aani.

¹³Mid'aani qara, ka worri oobru ufi keesa AABBO Waaqaa baasu, ch'ufti keesani. Nami worra keeti qulqullooni ch'ufti ha nyaatuti.

¹⁴ Wonti ch'ufti ka Israeli keesaa fohatani naa baasani kanketi.

¹⁵Wonti qara d'alate, namafi horile taanaani, ka worri Israeli na baasu, kanketi; ammo ilmaani angafa ch'ufafi yokhaani waan horini goroomuma d'ale ch'ufa, ta qulqullo intahini, beese baasa, deefad'a.

¹⁶Ijoolle jia toko beese gaafasi gula, qarsi shani baasani deefachu malani.

¹⁷Ammo waan loonifi, hooliyeefi laleesi goroomuma d'ale indeefatini. Horini sunini kiyya, sorio naa baasu maltani. D'iiga hori suni fulla sorio irati baasaniiti fifit'i, moora isaa gubi naa baasi, aka ch'inch'aani isii na gammachiiftu.

¹⁸Fooni isaani kanketi, akuma handaraafafi lukha mirga ta eebisani AABBO Waaqaa baasani taani.

¹⁹Anini siifi ilmaani tante ta d'iiratifi ta uwale, waan worri Israeli bara ch'ufa na baasu, kenna. Kunini wold'aqisa haguma jiru jireenna, tau ka anini siifi ilmaani tante woliini tolfad'u.

²⁰AABBO Waaqi waan Harunini jed'e, Atini d'aala tokole inargatu, lafa tokole Israeli keesa sii inkennani, d'aalti tante ana AABBO Waaqa.

²¹AABBO Waaqi waan jed'e, Anini qooda worri Israeli naa baasu ch'ufa yayu worra Lawiti kenne, waan worri Waaro Woyyuma keesa na hojatufi.

²²Worri Israeli kaani tokoleeni Waaro Woyyumati ind'iaatini, aka wollaala keesa seenani indoone.

²³Armaa achi worra Lawi ch'allati Waaro Woyyuma qorqorate huji isii ch'ufa fud'ate tolcha. Kunini seera haguma jiru tau ka ilmaani teesanileeni ch'ufti gula yau malte. Worri Lawi Israeli keesa d'aala womatu inqabu.

²⁴Wonti akanatiifi anini qooda worri Israeli na baasu yayu d'aala worraa tolche. Tanaafi anini, worri kunini Israeli keesa d'aala inqabu jed'e.

²⁵AABBO Waaqi waan Musani jed'e,

²⁶Waan atini ammalle worra Lawitini jettu, Hojja isani qooda AABBO Waaqi d'aala isanii kennu worra Israeli iraa fud'attani, qooda suni, kud'ani keesa toko keesa fuud'a, AABBO Waaqaa baasa.

²⁷Waan isani baaftani akuma waan abbaani oobru mid'aanifi daad'i haraa AABBO Waaqaa baasu isanileti heregani.

²⁸Akanaani isanileeni qooda isani Israeli ira argattani keesa wa AABBO Waaqa baaftani. Qooda isani AABBO Waaqa baaftani kana qaallu Haruniti kenna.

²⁹Qooda kana waan waan ch'ufa ira dansa, ka isani argattani keesaa, AABBO Waaqaa baasa.

³⁰Hojja isani waan ira dansa suni baaftani ka hafe olkeyad'a, akuma abbaani oobru, eegi qooda ufi Waaqaa baase, ka hafe olkeyatu.

³¹Isanifi worri keesani waan hafe suni fulla feetaniti nyaad'a wonti akanatiifi wonti suni waan isani huji teesani ta Waaro Woyyumatiifi argattani.

³²Eegi waan ch'ufa ira dansa AABBO Waaqa baaftani, yo taani d'ibi nyaatanile wollaala inqabdani. Ammo eegad'a, aka qooda suni nyaatani, waan qulqullo worri Israeli baasu int'ureesine; yo nyaatani indootani.