Read BORANA BIBLE – KITAABA WAAQA Henna 24 Bible Online

Henna 24 - BORANA BIBLE – KITAABA WAAQA bible

Henna 24

¹Amma Balamuni aka AABBO Waaqi isaa, gumi Israeli eebisu fed'u ya beekhe, tanaafi inni deeme, akheekha woini himani ka aka qara kaani barbaadu dide.

²Inni gara lafa aloo millate; gosa Israeli ta gosa gosani qubattu arge. Lubbuuni Waaqaa isa fuute,

³Inni dubbi tana fage waan jed'e: Tunini dubbuma Balamu, ilma Beori, dubbi nama waan ch'ufa aka dansaa arge,

⁴waan Waaqi jed'e d'agayuti. Anini millu tokooni daayya Waaqa iraa d'ufte arge.

⁵Waaroni Israeli, ta worri iti galu, akami dadansa

⁶aka meet'ii woli gula d'ad'abani yokhaani oobru d'aatu galaana, aka mukha qumbi, ka AABBO Waaqi oobre, yokhaani aka hind'eesa bisaani d'aatuti bahe fakaatti.

⁷Worri bokaya haga inqamne argate, lafa bisaani quufte keesati mid'aani oobrata. Hayyuuni worraa Agagi ira gudda, lafti inni fidu guddo taati.

⁸Waaqi lafa Misiri keesaa worra baase; inni aka kotte gafarsa worraa kalche, worri nyaapa ufi fit'e hobaase, lafe isaani ch'ach'abse, t'iya worra bulleesa.

⁹Worri janna nyeench'a ka wa gaadu fakaata; hojja inni rafu eentu dandae kaasa? Nama Israeli eebisu ineebisanifi, ka abaaru inabaarani.

¹⁰Balakini guddo dallane, harka kontofate, Balamu d'aanu fed'e waan jed'eeni, Anini nyaapa kiyya naraa abaarifi si yaame, ammo atini garagalte maro sadi worra eebifte.

¹¹Amma armaa deemi, worra keetiti gali! Anini qara waan guddo sii kennu fed'e, ammo AABBO Waaqi ya si d'owe.

¹²Balamuni waan jed'eeni, Anini qara ergattu teeti inhimee?

¹³Aka ato atini qarsifi worqi mana kanke keesa jirtule ch'ufa naa kennitele anini dandae dubbi Waaqa dabre, mata kiyyaani woma intolchine. Anini woma AABBO Waaqi jed'i nani jed'u ch'alla jed'a.

¹⁴Ammalle Balamuni waan Balakini jed'e, Anini amma worra kiyyati deebia, ammo ato indeemne waan worri Israeli worra kanke taka tana tolchu siti hima.

¹⁵Jennaani inni dubbi tana fage waan jed'e: Tunini dubbuma Balamu ilma Beori, dubbi nama waan ch'ufa aka dansaa argu;

¹⁶ka waan Waaqi jed'u d'agaye. Beekhuma Waaqa gudda iraa bahe argate. Anini millu tokooni daayya Waaqa gudda iraa d'ufte arge.

¹⁷Anini waan taka tana laale gosa Israeli arga. Hayyu bakalcha fakaatuti gosa Yakobo keesa bahe, aka urji deemtu Israeli keesaa d'ufa. Inni worra Moabu gugurda d'ae, worra Sethi ch'ufa d'aana.

¹⁸Inni nyaapa isaa ka Edomu dabsate, lafa worraa fud'ata ka Israeliini dabsachuma dabsatu,

¹⁹Yakobooni worra d'id'ite worra eegeti hafele hobaasa.

²⁰Jennaani daayya ufi keesa Balamuni worra Amaleki arge waan jed'e: Amalekini qara gosa ch'ufa ira jabdu, ammo amma muummeeni worraa baddi taati.

²¹Inni daayya ufi keesa worra Keni arge waan jed'e: Fullaani isani teetani aka dansaa qorqorti qabdi, akuma mana simpire ka rarraa bale irati jaarani,

²²ammo isani worra Keni imballeesani, hojja worri Ashuru isani boojie.

²³Ammalle Balamuni dubbi tana fage waan jed'e, Worri mirgati wolti bahe kunini kami?

²⁴Nyaapi hobolooni Kitimu d'ufe, worra Ashurutifi ka Eberi dabsata, ammo worrileeni eege inhobaa.

²⁵Jennaani Balamuni kae gale, Balakileni kara ufi iti d'aabate.