Read BORANA BIBLE – KITAABA WAAQA Mika 5 Bible Online

Mika 5 - BORANA BIBLE – KITAABA WAAQA bible

Mika 5

¹Isani worri Yerusalemu, duula keesani wolti baasa! Ya marsani nu had'ani! Hayyu Israelile ya d'abanaasani!

² AABBO Waaqi waan jed'u, Bethlehemu Efrata, atini dira gosa Yuda ch'ufa keesa dira diqa, ammo si keesaa anini nama Israeli fidu, ka d'alooti isaa uumama duri iraa bahe, tolcha.

³Tanaafi AABBO Waaqi gumi ufii harka nyaapa worraati lakisa, haga isiini dau geete ilma deetuuti. Jennaani worra gosa isaa ka boojiani worra isaani ka Israeliti deebisani.

⁴Inni gaafa d'ufu jabeenna AABBO Waaqatifi guddinna isaatiini gumi ufii tissa. Gumiini isaaleeni nagayaani teeti, waan nami lafa keesa jiru ch'ufti guddinna isaa beekhuufi;

⁵ammalle inni nagaya lafatini d'ufa. Hojja worri gosa Ashuru lafa teenna d'ufe had'e naabo teenna ch'ach'abse nuu dabsatu, nu jara nuu mataa jajanna had'iisaa worrati ergina.

⁶Irre woraanatiini worri worra Ashuru suni dabsate, worri suni gaafa worri kaani d'ufe lafa teenna had'u duraa nu baasa.

⁷Worri Israeli ka hafe fit'eesa AABBO Waaqi gosa hedduti ergu yokhaani ebele mid'aaniti roobdu fakaata. Ammalle worri suni Waaqa male nama inheregatu.

⁸Ammalle worri gosa taani keesati hafe nyeench'a sagale raasa keesa yokhaani fulla reeni ooltu keesa barbaadu fakaata: inni ree keesa seene iti ch'ee qabe nyaate fit'a — nami tokoleeni ka dandae iraa baasu injiru.

⁹Ammalle worri Israeli nyaapa ufii ch'ufa dabsate had'e balleesa.

¹⁰AABBO Waaqi waan jed'u, Gaafasi anini fardoole teesani isani iraa fuud'e gaari keesani ka fardi hirkisu balleesa.

¹¹Anini dira keesani balleese waan isani nyaapani ufiraa d'owartani jaartani ch'ufa ch'ach'absa.

¹²Anini qud'aama keesani ka falfalaa isani iraa fuud'e worra keesani ka wo himule balleesa.

¹³Anini akheekha isani kad'attanifi d'akha keesani ka woyyumale lafa teesani keesaa balleesa; isani deebitani gajettani waan harka keesaniini mid'aasitani inkad'atani.

¹⁴Anini akheekha waaqa Ashera jed'ani, ka lafa teesani keesa jiru, ch'ach'abse dira keesani balleesa.

¹⁵Ammalle dallansu tiyya guddo keesa gosa na ch'aqasu dide ch'ufa haalo fuud'a.