Read BORANA BIBLE – KITAABA WAAQA Zekaria 14 Bible Online

Zekaria 14 - BORANA BIBLE – KITAABA WAAQA bible

Zekaria 14

¹Guyyaani AABBO Waaqi tae nama qoru ya d'iaate. Gaafasi Yerusalemu saamani, waan saamani suni ila teesani durati qoodatani.

²AABBO Waaqi gosa ch'ufa woltiini d'ufe Yerusalemu haasisa. Dira qabani, maneeni saamani, nad'eeni buufatani. Gumi suni wod'akumati gargari kutani boojiani ta hafte woma intolchani dira keesati lakisani.

³Duuba AABBO Waaqi kae, gosa suni ch'ufa aka inni duri had'e had'a.

⁴Gaafasi inni Gaara Ejersa, ka Yerusalemu ilaboru, gubba eja. Duuba gaara suni ilaboruti fuud'ani, ila galchuti d'aabani, gargari tarsaasani, bale jiddu baasani, aka gaari sunini gami toko mirga deeme, gami kaani bita deemu.

⁵Duuba isani bale gaara kana gargari kutu keesa baqattani. Isani akuma ababooti teesani duri, gaafa hayyuuni Yuda, ka Uzia jed'ani, lafa fide, lafti chochoote baqatte, baqattani. Duuba AABBO Waaqi kiyya, malaika ch'ufa woliini, gad'ufa.

⁶Hojja guyyaani sunini gahe, qabbanafi yokhaani maganule deebiani inargani,

⁷yokhaani dukanale. Hojja ch'ufa ato halkanile taate ifsaati jira. Gaafa wonti kunini taatu nami beekhu AABBO Waaqa ch'alla.

⁸ Hojja guyyaani sunini gahe, bisaani ch'ulkiini Yerusalemu keesaa yaani, hagi toko galaana ilaboruti yaani, hagi tokoleeni baariini ila galchuti yaani. Bisaani suni hojja roobatiifi hojja bonale ch'ufa yaani.

⁹Duuba AABBO Waaqi hayyu lafa ch'ufaa tahe, nami ch'ufti aka Waaqa isa guddise maqa isaa ka AABBOTIINI isa beekha.

¹⁰Lafa ch'ufa Geba ta mirga jirtu fuud'ani Renoni ta bita Yerusalemu jirtu d'aabani diideesani woliini d'aqani. Ammo Yerusalemuni lafa d'aatu jirtu taani ch'ufa keesaa olbaate, haga fullo Benjaminitifi fullo Moga, ta duri fullo d'ibi qabdu geete, ammalle haga Doofi Hananeliti baate haga fulla daad'i hayyu iti mid'aasanileti ejiti.

¹¹ Nami arti isa keesa nagayaani taa, deebiani dira suni imballeesani.

¹²AABBO Waaqi ch'iisa jaba gosa worra Yerusalemu haatuti buusa. Nafi worraa, ato worri jirjiru shame ch'ich'ite, ilaafi arabi worraleeni akanumati fulla jiruti shama.

¹³Guyya gaafasi AABBO Waaqi nama ch'ufa mudamsiise, nami waan tahu wollaale nama wahela isa, ka isa d'aatu jiru, qabe balleesa.

¹⁴Worri Yudaleeni woraana suni seene Yerusalemu kalcha. Ammalle waan gochiti d'aatu jirtu ch'ufti qabdu, worqi taanaani, qarsi taanaani, woya muumme inqamnele taanaani, saamani.

¹⁵D'ukubi hamaani akasi ammalle fardofi gaangefi gaalafi harrele qabata — hori nyaapa suni ch'ufa.

¹⁶ Jennaani nami gosa Yerusalemu haate ka iraa hafe, ganna ch'ufa achi yae AABBO Waaqa Gudda aka hayyu kad'ate jila Hoosa tolfata.

¹⁷Yo gochiti tokoleeni AABBO Waaqa Gudda aka hayyu yaate kad'achu didde, lafa worraa bokayi irroobu.

¹⁸Hojja worri Misirileeni jila Hoosa tolfachu dide, worrale d'ukubuma AABBO Waaqi gosa ch'ufa ta yau didde iti erguti qabata.

¹⁹Gaargali worra Misiritiifi gosa d'ibi ch'ufa, ta jila Hoosa tolfachu didde qabatu, kana.

²⁰Guyya gaafasi agalo fardale dubbi tana irati qorani: Waan qulqulleesani AABBO Waaqaa olkayani. Okoteeni Mana Waaqaa keesa jirtu, akuma qorini ta fulla sorio Waaqaa baasani dura kayani qulqullo, qulqullo taati.

²¹Okoteeni Yerusalemufi Yudea keesa jirtu ch'ufa qulqullo jed'ani olkayani, aka huji kad'acha AABBO Waaqa Guddatini hojatani. Ammalle nami sorio Waaqaa baasu qori suniini fooni sorio d'aaba. Hojja guyyaani sunini gahe, dilaaltuni tokoleeni Mana AABBO Waaqaa keesati inhaftu.