Read BORANA BIBLE – KITAABA WAAQA Malaki 1 Bible Online

Malaki 1 - BORANA BIBLE – KITAABA WAAQA bible

Malaki 1

¹Tunini dubbi AABBO Waaqi Malakiini, Worra Israeliti himi jed'e.

² AABBO Waaqi waan gumi isaatiini jed'u, Anini ya isani jaalad'e. Ammo isani waan naani jettani, Atini jaalala maani nuu baate? Esauuni oboleesa Yakobotiniti? Ammo yo akasile taate, anini Yakobo jaalad'e

³Esau jibbe. Anini layu lafa isaa ta gaareeni balleese waan inni qabu ch'ufa bineensa alati lakise.

⁴Yo worri Edomu, Ya nu balleesani, ammo nu dira keenna injaaranna jed'e, AABBO Waaqi Guddaani waan jed'u, Worri ha jaaratu, ammo anini ammalle inch'absa, haga nami ch'ufti worraani, Isani worra hama AABBO Waaqi injaalanne jed'uuti.

⁵Waan kana ch'ufa isani iluma teesaniini inagartani, duuba AABBO Waaqi, lafa Israeli malele, lafa d'ibileti gudda jettani.

⁶AABBO Waaqi waan qaaloleeni jed'u, Ilmi abba ufiti saalfata, ammalle tisseleeni nama hojattufi saalfatti. Yo anini abba keesani taate, isani maafi naa insaalfanne? Yo anini gudda keesani taate, isani maafi na insodaanne? Isani na tufattani ammo, Nu akami si tufanne? jettani.

⁷Aki isani na tufattaniini, aka sagale imfakaanne fulla sorio iti baasaniti naa baaftani. Duuba isani waan naani jettani, Nu akami ch'eera sii d'amne? jettani. Anini isaniti hima, ch'aqasa; isani sagale imfakaanne naa baaftani.

⁸ Yo isani hori ballaafi naafa, yokhaani ka fayya inqamne, sorio naa d'uftaniini, isani waan suni dansaa seetani? Yo isani hori akasi gudda lafa teesaniti kennitani, inni ingammada? Yokhaani inni waan isani feetani isanii intolcha?

⁹Amma isani qaalole, aka Waaqi nuu eebisu, nuu kad'ad'a. Eegi isani waan akana kana baaftanifi, inni kad'a teesani isanii d'agaya?

¹⁰AABBO Waaqi Guddaani waan jed'u, Ato tiyya, isani nami toko balbala Mana Waaqaa ch'ufa, aka ibida woma isani imbaane fulla sorio iti naa baasaniti imbobeesine. Anini isani iraa gammade waan isani naa baaftani imfud'ad'u.

¹¹Maqaani kiyya, gosa ch'ufa durati, ka haga muumme lafa tana eje taaniti eju, inguddata. Ammalle fulla ch'ufa maqa kiyyafi hit'aana aarsani sorio qulqullo baasani. Wonti akanatiifi maqaani kiyya gosa ch'ufa durati gudda.

¹²Ammo isani yo, mesaani AABBO Waaqaa t'uri qaba jettani, sagale isani tufattani irati baaftani, maqa kiyya yakitani.

¹³Isani na tufattani, Wonti kunini ch'ufti ya nu dad'absiifte jettani. Isani hori hatanifa, naafafa, yokhaani ka fayya inqamnefa, sorio naa baaftani. Isani duuba waan anini hori akana harka keesani ira fud'ad'u seetani?

¹⁴Dabdichi ka hori dansa sorio suni male ree ufii keesa qabu, ka hori sorio himmalle naa baase, ha abaaramu. Wonti akanatiifi anini hayyu gudda, ka lafafi nami ch'ufti d'eetu.