Read BORANA BIBLE – KITAABA WAAQA 1 Makabayo 11 Bible Online

1 Makabayo 11 - BORANA BIBLE – KITAABA WAAQA bible

1 Makabayo 11

¹Hayyu Misiri ka Tolomayo jaeeso jed'ani askarti muumme inqamne ta maansa afaani baariini ira jirtu wolti baase, hobolo hedule wolti guure, inni Eskanda sobe dabsate lafa inni mohatu ira fud'ate lafa isaati darachu fed'e.

²Duuba inni lafa Shamu d'aqe, dubbi nagaya dubbate worrileeni fullo duraa bane isati gadi bahe nagaya fuud'e. Hayyu Eskandani waan Tolomayoni sodda isaatifi biyyaani isa nagaya fuud'a jed'e.

³Ammo Tolomayoni ato deemu dira baheeni ch'ufa askarti keesati lakise.

⁴Inni Ashdodini bahe jennaani biyyiti mana Dagoni ka gubanifi waan dira suni ka balleesanifi dira d'aatu suni ch'ufa ka balleesanile garsiifte. Lafti ch'ufti ya reefani bade, reefi nama Yonathani lola keesati gube, amma kara Tolomayoni gula d'ufu keesati tuulani.

⁵Biyyiti waan Yonathanini worra tolche isati himate, ammo Tolomayoni woma tokole worraani injenne.

⁶Yonathanini guddinna ufitini kae, Yafati isa argu d'aqe. Worri nagaya wolfuud'e halkani suni achuma bule.

⁷Yonathanini isa haga galaana Eleuthero geegese, duuba Yerusalemuti deebie.

⁸Kara kanaani hayyu Tolomayoni mala Eskandati d'aate dira afaani baariini jiru ch'ufa Selukiale fud'ate.

⁹Arti Tolomayoni d'aamsa kana hayyu Demetrioti erge waan jed'eeni, Koota wold'ageenne nagaya wolti buufanna, intala tiyya ta amma Eskandani qabu ira fuud'e sii keenna, ammalle aka atini lafa abbe duri mohate mohatu si tolcha.

¹⁰Eskandani ya na ijeesu fed'e anini waan duri intala tiyya kenneefi ya gaabe.

¹¹Tolomayoni Eskanda ira lafa fud'achu fed'aafi waan sunini isa himate.

¹²Duuba inni intala isaa Eskanda ira fud'ate Demetrio kenne: ammalle worri wold'abe nyaapa woli tahe.

¹³Jennaani Tolomayoni dira Antiokia seene hayyu lafa Shamu tahe, akanani inni hayyu Misiritifi ka Shamule ufi tolche.

¹⁴Hayyu Eskandani gaafasi lafa Kilikia jira, wonti akasitifi worri arda suni gaafasi isati gargale isa had'uti jira.

¹⁵Ammo waan Tolomayoni tahe d'ageennaani kae isa had'e. Tolomayoni duula gudda muumme inqamneni d'ufe dabsate baqachiise.

¹⁶Tolomayoni hayyu tahe aka male jabaate, jennaani Eskandani baqate lafa Araftiti gale.

¹⁷Ammo Araftichi toko ka Zabdieli jed'ani mata isaa ira kute Tolomayoti erge.

¹⁸Guyya lama teennaani Tolomayoleeni due, askarti isaa ta inni maneeni jajabdu keesati lakisele ch'ufa biyyiti fit'e.

¹⁹Duuba akanani ganna 167 Demetrioni lameeso hayyu tahe.

²⁰Bara suni Yonathanini nama Yudea wolti baase maneeni jajabdu Yerusalemu had'e. Worri waan ira ejaanjani dira had'ani heddu jaare dira suni had'e.

²¹Ammo Yahudini gari ta aada ufi gula iyaane ta ammalle gosa ufi jibbitu, gara hayyu Demetrio lameeso d'at'e aka Yonathanini maneeni jajabdu Yerusalemu had'u fed'u iti himte.

²²Demetrioni dubbi suni d'agaye jennaani hojuma suni Tolomasiti qubate, tatabe Yonathaniti t'aafe, waan jed'eeni, Dira suni imarsini bira deemi, hurrisi inkoranna Tolomasiti nati kooti.

²³Yonathanini d'aamsa suni d'ageennaani, qonqo worra dira marsu kaaniti erge, dira suni inlakisina marsuma marsa jed'eeni. Duuba jaarole Yahuditifi qaalole gari ta isa woliini yaatu fohate, inni lubbu ufi jibbaate,

²⁴hayyicha Tolomasi jiru, woyaafi qarsifi worqifi waan heddule d'ibi fud'ate d'aqe, akasini hayyu gammachiise.

²⁵Ato worri Yahudi ka aada inguunne ka gosa Yonathani ka gari isa himatelle,

²⁶hayyichi akuma hayyooti duri taani isa tolchite isa tolche. Inni jaallowani isaa ch'ufa durati isa ulfeese,

²⁷atini qaallicha gudda huji tante ch'ufa jabeesi jed'eeni, ammalle guddinna inni duri qabu ch'ufa deebiseefi jaala hayyu ka isaa qara tolche.

²⁸Jennaani Yonathanini waan hayyichaani jed'e, Lafa Yudeatifi, arda sadi ka Samaria damoosa ira inguuratina lakisa jed'eeni; yo atini akasi tolchite anini qarsi kilo kuma kud'ani si baasa.

²⁹Hayyichi dubbi suni Ee, jed'e, waan isii ch'ufa tatabeeti gara Yonathani t'aafe waan jed'e:

³⁰Anini hayyu Demetrioni oboleesa kiyya Yonathanifi gosa Yahudi nagaya fuud'a.

³¹Anini tatabe siti erge tana ta waan kanke dubbatu qara namicha fiit'a teenna ka Hasteni jed'aniti erge aka atini waan isiini jettu hubattu.

³²Anini hayyu Demetrioni, abba kiyya Hasteni nagaya fuud'a.

³³Anini gosa Yahudi yayu qarqaaru fed'e, wonti akanatiifi nu woli jaala worrileeni waan nuti kakhate inguuta.

³⁴Anini aka lafti Yudeatifi ardaani sadeeni kunini Efraimufi Lidafi Aramathayoni ka worra ya Ee jed'e; arda sadeeni kana arda d'aatu jiru ch'ufa woliini yayu lafa Samaria ira kutani ta Yudati darani. Wonti kunini nama Yerusalemu d'aqe sorio Waaqa baasu ch'ufa qarqaarsa taati, wonti akanatiifi arma achi damoosa mid'aani oobrutifi ka mukha ka ganna ch'ufa baasani hayyu imbaasani ammo Mana Waaqati baasani.

³⁵Ammalle anini beese qooda waan naa baasanitifi, gibira naa baasanifi, damoosa sooddatifi damoosa waan d'ibi ka naa baasanile, worra iraa infud'ad'u.

³⁶Dubbi tatabe tana keesati t'aafani arma achi haga jirani imballeesani.

³⁷Dubbi tatabe tana keesati t'aafani tana tatabe d'ibiti t'aafi Yonathani kenni, fulla isii arganifi gaara qulqullo irati mat'ansi.

³⁸Hayyu Demetrioni gaafa lafti inni fidu nagaya argate, nama isani morkule d'amnaani askarti isaa ch'ufa huji keesa yaase worra isiiti galche. Askarti inni lafa bisaani jiddu jirtu ta Griki ira bitate male. Wonti kunini askarti duri hayyoota d'ibi isa duraa, jala hojate ch'ufa isa jibbisiifte wonti akanatiifi worri beese sila jiati argatu ch'ufa ya d'abe.

³⁹Namichi toko ka Trifo jed'ani ka duri goli Eskanda tahe, aka askartini ch'ufti waan Demetrio gungumtu d'agaye. Duuba inni Arafticha Imalkue jed'ani toko ka Antioko ilma Eskanda guddisuti jiru, d'aqe.

⁴⁰Trifoni achiti ture guyya ch'ufa Imalkueni gurba suni nati kenni anini fulla abba isaa hayyu isa tolchu fed'a jed'e. Inni ammalle seera Demetrioni baasefi aka askartini isa jibbitu Imalkueti hime.

⁴¹Yonathanini qonqo gara hayyu Demetrio erge waan jed'eeni, Askarti tante ta maneeni jajabdu Yerusalemu keesa jirtufu ta maneeni jajabdu Yudea keesa jirtule keesa yaasi, wonti akanatiifi worri Yahudi gaargalchuti jira.

⁴²Demetrioni waan jed'eeni, Anini waan atini kad'ate ch'ufa ya ee jed'e, ammalle yo qoomni argad'e siifi gosa tante guddo ulfinna kennafi.

⁴³Ammo amma askarti naa ergite na qarqaaru malte wonti akanatiifi askartini tiyya ch'ufti ya nati gargalte na didde.

⁴⁴Duuba akanani Yonathanini askarti jajanna nama kuma sadi Antiokiati erge. Askartini sunini artini banaani hayyichi guddo gammade;

⁴⁵wonti akanatiifi duuli nama kuma d'ibbaafi diddama dira keesati wolti bahe isa ijeesu fed'a.

⁴⁶Ammo inni mana ufiti baqate, ka duuli sunini dira suni ch'ufa qabate lafa gargalchuti jiru.

⁴⁷Jennaani hayyichi askarti Yahuditini na qarqaare jed'e, worri ch'ufti hariifate isa qarqaaru d'ufe dira keesa yae, nama haga kuma d'ibba toko hobaase.

⁴⁸Worri lubbu hayyu baase ammo dira soqate gube balleese.

⁴⁹Biyyiti aka Yahudini dira ch'ufa dabsate arginaani, mumudamte, waan hayyichaani jette.

⁵⁰Yahudi nu had'u d'owi dira keenna nagaya tolchi.

⁵¹Worri kaani woraana ufi lafati d'abbe, booju kad'ate. Hayyichafi nami inni fidu ch'ufti arti asi guddo Yahudi ulfeese. Yahudileeni waan saamate ch'ufa guurate, Yerusalemuti galte.

⁵²Demetrioni hayyuma ufi keesa jabaate, laftileeni jalati nagaya argate.

⁵³Ammo inni waan duri Yonathaniti kakhate guutu dide, iti gargale, fulla sila maro huji isaa dansaafi isa ulfeesu, isa dabse.

⁵⁴Eegi suni Trifoni gurba diqa Antioko jed'ani kaani fuud'e gadi deebie hayyu tolche.

⁵⁵Askartini Demetrioni huji keesa yaase taani ch'ufti d'ufte, hayyicha diqa kaani goli taate. Demetrio dabsate jennaani inni kae baqate.

⁵⁶Trifoni Arba kaani qaqabe dira Antiokialle dabsate qabe.

⁵⁷Hayyichi diqaani Antioko jed'ani kaani, tatabe gara Yonathani t'aafe waan jed'eeni, Anini huji tante ta qaallu guddati jabaad'i sini jed'a. Ammalle arda afrani kaani fidi, duuba anini jaala hayyu si tolcha.

⁵⁸Inni qorifi saani worqi ta iti gololfatani iti erge, ammalle aka inni mudunu worqi keesa wo d'uge woya hayyu keeyate, beesisa worqi ka aka inni fiit'a hayyu garsiisu gurmu irati hod'atu Ee jed'e.

⁵⁹Ammalle inni oboleesa Yonathanini ka Simioni jed'ani lafa afaani Baariini Tiroti ejite seera lafa Misiriti ejitu gudda iti tolche.

⁶⁰Jennaani Yonathanini askarti ufi fud'atte kae lafa Shamu keesaa deeme, askartini Shamu ch'ufti d'ufte goli isaa taate. Inni Ashkelooni d'ufe jennaani biyyiti dira suni gara isaa d'ufte isa guddifte.

⁶¹Inni achi kae Gaza d'aqe ammo biyyiti dira suni fullo iti ch'ufte. Duuba inni dira suni marsa gube balleese lafa d'aatu jirtu ch'ufa soqate.

⁶²Worri Gaza nagaya isa kad'ate, jennaani Yonathanini dubbi suni ee jed'e lafa nagaya tolche. Inni ilmaani jara gugurda dira Gaza boojie Yerusalemuti geese. Ammalle eegi suni dura deeme Damaskini bahe.

⁶³Yonathanini aka jari gugurdaani Demetrio duula gudda fud'ate, waan inni malate d'owu d'ufe d'agaye.

⁶⁴Duuba inni oboleesa ufi Simioni Yudeati lakise worra kaani had'u d'aqe.

⁶⁵Jennaani Simionini dira Beth-Suri marse guyya heddu had'e.

⁶⁶Biyyiti nagaya isa ira barbaannaani inni Ee, jed'e. Duuba inni dira suni qabe fud'ate biyya keesaa gusse askarti dira suni eedu iti tolche.

⁶⁷Yonathanifi duuli isaa d'aatu galaana Galilaya qubate. Boriyyaate ganama inni duula ufi fud'ate diida Hazori d'aqe,

⁶⁸achiti ch'ibraani duula nyaapa guddooni fuula keesa d'ufte, ka Yonathanini quba inqamne. Worri yayu askarti gari d'osse gaareeniti lakise.

⁶⁹Jennaani jari d'okhatu kaani gabae worra hanaani,

⁷⁰duuli Yonathani haguma gaunu gargale baqate, nami tokoleeni inhamne Matathia ilma Absolomotifi Yuda ilma Kalfi male.

⁷¹Yonathanini aka male ch'eere woya ufi tarsaase awaara matati ufi naqe Waaqa kad'ate.

⁷²Duuba inni had'iisa deebie nyaapa dabsate baqachiise.

⁷³Askartini isaa ta baqate taani waan suni arginaani gara isaa dachaate isa woliini nyaapa reebde, bulto worra ta Kedeshitini baafte, bulto worra suni iraa fud'ate iti qubate.

⁷⁴Guyya suni duuli nyaapa ka fit'ani, nama kuma sadii inga, eegi suni Yonathanini Yerusalemuti deebie.