Read BORANA BIBLE – KITAABA WAAQA 1 Makabayo 12 Bible Online

1 Makabayo 12 - BORANA BIBLE – KITAABA WAAQA bible

1 Makabayo 12

¹Yonathanini aka wonti ch'ufti isaa tolte arginaani, nama fohate Rumiti erge, aka worra Rumi suni ka qara wolbeekhaani wolbeekiti suni jabeesani.

²Ammalle inni tatabe qonqo akasi suni qabdu worra Spartatifi worra d'ibile erge.

³Jari ergani suni Rumi d'aqe, mana kora olduude waan jed'e, Qaallichi guddaani Yonathani jed'anifi gosa Yahuditi nu erge, aka wold'ageeti teenna ta qara taani jabeesine goli woli taanu.

⁴Worri Rumi tatabe worraa kenne aka lafa worri keesa dabru ch'ufa keesa jari lafa suni mohatu nagayaani worra dabarse lafa Yudati galchu.

⁵Tatabeeni waan isii arma jalati t'aafani tunini tatabuma qara Yonathani worra Spartati t'aafe; inni waan jed'e:

⁶Anini qaallichi guddaani Yonathanini jaarole Yahuditifi gumi lafa Yuda woliini oboleyaani teenna ta Sparta nagaya fuud'a.

⁷Duri hayyichi keesani ka Ariusi jed'ani tatabe gara hayyicha gudda keenna ka Onia jed'ani erga, aka tatabeeni tatabe tanati mat'ansani tunini garsiiftu, gochiti teenna lamaani woli fiit'a.

⁸Oniani nama isani ergitani suni ulfeese fud'ate, tatabe isani ergitani suni ta aka nu jaalafi goli woli taanu garsiiftu ya argad'e jed'e hime.

⁹Amma tana ato goli akasi fed'u bannelle, waan nu irre teenna kitaaba keenna qulqullo keesaa argannufi.

¹⁰Nu tatabe tana isaniti t'aamna aka wold'ageeti teenna jabeesinu, nu gargari baane nyaapa wolitau infeenu, ammalle haga nu tatabe woli t'aamne asi ganni hedduuni ya dabre.

¹¹Ganna ch'ufa nu hojja qoomni fakaatu argannu, guyya jilaatifi guyya gudda d'ibile layu isani qaabanne, Waaqa isanii kad'anne, akuma oboleyaani woli tolchu malte.

¹²Nu ammalle waan isani gurra baafatanifi gammanna.

¹³Ammo nu maro heddu gaargale nyaapani woli haane wonti akanatiifi gochiti d'aatu teenna jirtu maro heddu nu haate.

¹⁴Bara woraana suni nu isanifi golifi jaallowani teenna d'ibile gaargalchu infeene.

¹⁵Wonti akanatiifi nu qarqaarsa Waaqa ka gubba qamna, inni nyaapa keenna nu dabsachiise harka worra keesa nu baase.

¹⁶Tanaafi nu Numeno ilma Antiokotifi Antipateri ilma Yasoni fohanne, d'aamsaani lafa Rumiti ergine, aka wold'ageeti teennafi goli nu worra Rumiti taane jabeesinu.

¹⁷Nu ammalle worra isaniti ergine aka worri d'ufe nagaya keenna isaniti hime tatabe waan wold'ageeti teenna jabeesitu tanale isaniti kennu.

¹⁸Amma yo tatabe tana argatani qonqo isii nu deebisa.

¹⁹Dubbini armati t'aafani tunini dubbi duri tatabe qara taani keesati t'aafani.

²⁰Anini hayyu Arioni qaallicha gudda Onia jed'ani nagaya fuud'a.

²¹Nu waan worra Spartatifi ka Yahudi ka duri t'aafani ya agarre, duri worri Spartatifi ka Yahudi Abrahamu ira bahe tanaafi nu woli fiit'a.

²²Nu amma waan kana ya hubanne tanaafi isani waan keesa jirtani nu beesisu maltani.

²³Nu gama keennaani tatabe isanii t'aamne, aka horini keennafi wonti nu qamnu ch'ufti teesani taate teesanileeni teenna taatu jenna. Tanaafi nu nama isaniti ergine kaanini, dubbi tana worrati hima jenne.

²⁴Yonathanini aka jari abbooti duula ka Demetrio askarti haga duri ira fud'ate deebie isa had'u d'ufe d'agaye.

²⁵Yonathanini qoomni worri lafa isaatini seenu kennufi infeene tanaafi inni Yerusalemu keesa kae arda Hamathiti fuula keesa deeme.

²⁶Yonathanini dooya bulto duula nyaapati erge, dooyaani taani dachaate waan jetteeni, duuli nyaapa kurfefate halkani Yahudi had'u fed'a.

²⁷Aduuni d'ite jennaani Yonathanini askarti isaatini woraana keesani guurad'a kurfefad'a hegeri halkani fa nu had'ani jed'e. Ammalle inni d'aatu bulto suni nama eegu iti tolche.

²⁸Askartini nyaapa aka Yonathanifi duuli isaa kurfo worra eegatu hubannaani lubbuuni d'ufte ibada bulto akanumati lakifte kaate baqate.

²⁹Yonathanifi askartini isaa taani ibida bulto suni argani, ammo waan nyaapa kaani tahe bori asi hubachu dad'abani,

³⁰jennaani Yonathanini reebu worraa iti d'aabate ammo d'aqabu dad'abe, wonti akanatiifi worri yayu galaana Eleuthero taake.

³¹Jennaani Yonathanini gore gosa Arafti ta Zabadini jed'ani toko had'e, dabsate soqate.

³²Duuba kae godaane dira Damaski d'aqe lafa suni ch'ufa keesa mare.

³³Simionileeni duula ufi fud'ate, Ashkeloonifi lafa jajabeesani jaarani ta lafa suni keesa jirtuni bahe. Duuba inni Yafati gore,

³⁴dabsate askarti isaa achiti lakise, wonti akanatiifi aka biyyiti maneeni jajabdu dira Yafa harka askarti Demetrioti kennitu d'agaye.

³⁵Yonathanini deebinaani kora jaarole wolti yaame, aka maneeni jabdu dira Yudea keesati jaarani,

³⁶naabo Yerusalemule old'eerinna isii iti darani naabo d'ibile jaarani akasini maneeni jajabdu gargari baasanile wolmalatani. Naaboni tunini diraafi maneeni jajabdu gargari koba baafte, aka nyaapi arti keesa jiru wo bitate yokhaani wo gurguru d'owarti.

³⁷Biyyiti wolti baate woliini hojatte, naabo dira ta gama ila boru ta afaani bale Kidroni baatufi gama Kafenatha ka qara ch'ach'abe jaarte jabeesite.

³⁸Simionileeni dira Aidida ka golba gaara ka qara ch'ach'abe jaare jabeese fullo sibiilaani ch'ufanille iti tolche.

³⁹Jennaani Trifoni hayyu Antioko jed'aniti gargale hayyu Shamu ufi tolchu fed'e.

⁴⁰Ammo inni aka Yonathanini dubbi suni dide duula baase isa hayyu tau d'owu sodaate. Duuba Trifoni duula ufi baase Beth-Shani d'aqe aka Adasini Yonathani qabe ijeesu.

⁴¹Ammo Yonathanileeni isa fuula keesa deeme askarti kuma afurtama ta filatani woliini Beth-Shani d'ufe.

⁴²Trifoni duula gudda Yonathanini d'ufeeni arginaani woma tau sodaate.

⁴³Tanaafi inni Yonathani ulfeese, nama mala isaa d'au ch'ufaatini d'ufe waan heddu kenneefi waan askarti isaatifi nama mala isaa d'auni jed'e, Akuma naa saalfatani isalee saalfad'a.

⁴⁴Jennaani waan Yonathanini jed'e, Atini maafi askarti tana akana gaargalchita ka nu woraana woli ira inqamne?

⁴⁵Worra kana galchite ho? Nama sii wahelchu diqa toko filad'i, na gula Tolomasi koota. Anini diraafi maneeni jajabdu ch'ufafi askartifi jara gugurda ch'ufa harka keetiti keenna. Duuba anini kae si biraa deema wonti anini d'ufefi suni.

⁴⁶Yonathani isa d'ugefate, dubbi isaa gula deeme askarti ufi Yudeati galche.

⁴⁷Inni nama kuma sadi fud'ate, ammo nama kuma lama keesa Galilayati lakise, kuma tokocha hafe kaani fud'ate itini d'aabate.

⁴⁸Ammo Yonathanini Tolomasi d'umnaani, nami dira suni balbala dira iti ch'ufate, isa qabe, jara isa woliini jiru ch'ufa fit'e.

⁴⁹Jennaani Trifoni askarti miilaani yaatufi ta fardaani yaatu, Galilayafi bale Yezreeliti erge, aka askarti Yonathani ta hafte taani hobaasu.

⁵⁰Duuli Yahudi waan Yonathani jara isaa woliini jiru kaani woliini qabani ijeesani sehe, duuba garaa woljabeesani kurfefatani lola d'aqani.

⁵¹Duuli nyaapa aka Yahudini lubbu ufi jibbaate lola kurfefate arginaani gargale kae baqate.

⁵²Jennaani duuli Yahudi nagayaani lafa Yudeati gale ammo guddo mudame. Gochiti Yahudi ch'ufti waan Yonathanifi jara isaa ch'ufa fit'ani seete guddo boote.

⁵³Gochiti d'aatu jirtu ch'ufti amatana Yahudi balleesu feete waan jette, Gochiti tunini amma nama worraani deemu yokhaani ka worra qarqaaru inqabdu, amma koota worra haane, maqa worra lafa keesa balleesina.