Read BORANA BIBLE – KITAABA WAAQA 1 Makabayo 16 Bible Online

1 Makabayo 16 - BORANA BIBLE – KITAABA WAAQA bible

1 Makabayo 16

¹Ilmi Simioni ka Yohana jed'ani Kazari kae waan Kendebayoni tae abbaati himu d'aqe.

²Simionini waan ilmaani isa gugurdo Yohanafi Yudani jed'e, Anaafi worra kiyyafi oboleyaani tiyyaleeni haguma d'alanne haga arra, gosa Israeliti jenne nyaapa haane. Duuba maro heddu nu nyaapa dabsanne, gosa Israeli lubbu baamne.

³Anini amma ya jaare, ammo galata Waaqa isani kaima irre qabu. Isani fulla tiyyaafi ta oboleyaani tiyya fud'atani, gosa teenna jettani nyaapa had'u maltani, Waaqi isani qarqaarinna.

⁴Duuba Yohanani nama d'iira ka Israeli nama kuma diddama ka qara askarti ka hagi gari fardaani yau, fud'ate Kendebayo had'u d'aqe, worri Modini bule

⁵boriyyaate, diidati gabae. Achiti duuli guddaani miilafi fardaani yau fuula keesa d'ufe, ammo jiddu worraa gaalanati jira.

⁶Yohanafi duuli isaa lola kurfefate fuula nyaapati deefate. Ammo Yohanani aka askartini isaa galaana taaku sodaate arginaani worra dura taake, askartini isaleeni faana isaa d'ufte.

⁷Yohanani duula isaa gargari baase askarti isaa ta fardaani yaatu jiddu askarti miilaani yaatu kaye, wonti akasitifi askartini nyaapa ta fardaani yaatu guddo.

⁸Jennaani magalata d'aani wolhad'ani, Kendebayofi duula isaa dabsatani nama heddu keesa fit'ani, nami hafe baqate maneeni jajabdu Kedroniti gale.

⁹Yuda woraana keesati madeesani ammo oboleesi isaa Yohanani nyaapa reebe Kedroni dira Kendebayoni jaareeni baase.

¹⁰Askartini baqate taani doofi d'aatu dira Ashdoditi baqate, Yohananileeni dira suni gube guyya suni askarti nyaapa nama kuma lama fit'ani Yohananileeni nagayaani lafa Yudeati deebie.

¹¹Qaallichi guddaani Simioni jed'aani Tolomayo ilma Abubo gudda lafa diida Yeriko tolche. Tolomayoni kunini guddo dureesa,

¹²ammalle inni sodda Simioni.

¹³Ammo inni guddo kiyyibe lafa ch'ufa gudda iti tau fed'e, aka Simionifi ilmaani isaa fit'u malate.

¹⁴Simionini ilmaani isaa Matathiafi Yuda dira lafa suni d'aqani, aka finni isaa jiru laalani, jia kud'ani toko ka Shebati jed'ani ganna 177 Yeriko d'ufani.

¹⁵Tolomayoni ka mala Simionifi ilmaani isaatini fit'u harka qabu mana jabeesani jaarani ka Doki jed'ani ka inni jaare tokoti galche, sagale guddo baase gololche, ammo nama worra fit'u mana suni keesati d'osse.

¹⁶Simionifi ilmaani isaa farso d'ugaani machaani jennaani, Tolomayofi jari isaa goraade guurate fulla iti goloftaniti gabae, Tolomayofi Simionifi ilmaani isaa lamaanifi hojatu isaa ta gari fit'e.

¹⁷Kara hama kanaani Tolomayoni ch'ubbame galata waan dansaa hameennaani deebise.

¹⁸Jennaani Tolomayoni waan tolche kana ch'ufa t'aafe hayyuti erge. Tatabe t'aafe suni keesati inni waan jed'e Askarti naa ergi lafafi dira isii ch'ufa ha naa kennaani.

¹⁹Ammalle inni tatabe jara gugurda askartiti t'aafe waan jed'eeni koota, worqifi qarsifi waan d'ibile isanii kenna. Jennaani jara isaa ka garile Yohana ijeesa jed'eeni dira Gazarati erge.

²⁰Ka d'ibileeni beena Yerusalemufi gaara Mani Waaqa gubba jirulee qaba jed'e.

²¹Ammo nami tokooko jara Tolomayo dura utaale Gazara d'aqe, waan Yohanani jed'e, Abbeetifi oboleyaani tante ya fit'ani. Ammalle Tolomayoni nama si ijeesu siti erguti jira.

²²Dubbi tana d'ageennaani Yohanani, aka male rifate laalefate, ammo waan mala kana durati beekateefi jara ijeecha isaati ergani kaani qaqabe fit'e.

²³Waan Yohanani haga abba isaa d'aale qaallu gudda tahe tolche ch'ufa: lola inni loleefi, waan inni jannoomani taefi, aka inni naabo ch'ach'abt'e jaareefi, waan d'ibi inni tolchele ch'ufa

²⁴kitaaba odu waan qaalluma lafa suni ch'ufa keesati t'aafaniti t'aafani.