Read BORANA BIBLE – KITAABA WAAQA 1 Makabayo 2 Bible Online

1 Makabayo 2 - BORANA BIBLE – KITAABA WAAQA bible

1 Makabayo 2

¹Bara suni qaallichi worra Yoaribu toko ka Matathia jed'ani, ka Yohana ka ilma Simioni Yerusalemu keesa godaane Modini qubate.

²Inni ilmaani d'iira shani qaba: Yohana (ka maqaani isaa d'ibiini Gadi),

³Simioni (ka maqaani isaa d'ibiini Thasi),

⁴Yuda (ka maqaani isaa d'ibiini Makabayo),

⁵Eleazari (ka maqaani isaa d'ibiini Afarani), Yonathani (ka maqaani isaa d'ibiini Afusi).

⁶Matathiani ch'ubbu lafa Yudeatifi ta Yerusalemu keesati tolchani agaraani,

⁷waan jed'e, Anini maanifi d'alad'e waan hamtu kaanafi badii gosa tiyyaatifi ta dira qulqullo ila tiyyaani arga? Anini ka diri kunini harka nyaapati booju kennate, Mani Waaqaleeni harka nyaapa seene maafi ufuma taa?

⁸Mani Waaqa aka nama ulfinna inqamne jira.

⁹Mihi isaa dadansale yayu boojiani itini d'aabatani. Ijoolle teenna kara keesati fit'ani kaima keenna goraade nyaapatini hobaasani.

¹⁰Gochiti lafa keesa jirtu ch'ufti dira kanati qubate waan isaa ch'ufa iraa saamate.

¹¹Faaya isaa ch'ufa ya ira yafatani; inni amma tisse, balchooma inqabu.

¹²Mana Waaqa keenna ka nami gosa d'ibi t'ureese, miha isaa dadansa ch'ufa iraa saame me laala!

¹³Wonti nu jiraanne gubba ira yaanufi maani?

¹⁴Matathiafi ilmaani isaa laalefatani woya ufi tatarsasani ch'arqi naqatani aka male bohani.

¹⁵Jennaani hojattuni hayyu ta irreeni aada Waaqa ira nama gorsitu taani dira Modini d'ufte aka biyya irreeni sorio waaqa d'araati baasisiftu.

¹⁶Nami Israeli hedduuni Matathiafi ilmaani isaale woliini fulla worraa d'ufe.

¹⁷Jari hayyuuni erge kaani waan Matathiani jed'e, Atini dira kana keesa guddo gurra qabda, ammalle ijoolleefi fiit'ani teetileeni sii kalchiti,

¹⁸maafi nama qara ka jecha hayyu guutu intaane? Nama gosa d'ibitifi worri Yudatifi nami dira Yerusalemu keesati hafe ch'uftileeni ya akasi tahe, atinileeni yo akasi taate siifi ilmaani teetileeni jaallani hayyu isanini jed'ani, qarsifi worqifi waan d'ibi hedule isanii kennani.

¹⁹Matathiani lalabe waan jed'e, Anini ato nami gosa d'ibi ka lafa hayyuuni fidu tana keesa jiru, isaa saalfate jecha isaa gula bahe aada keesati d'alatele lakise, anini woma ira inqabu.

²⁰Anaafi ilmaani tiyyaafi fiit'ani tiyyaleeni wold'aqisa Waaqi duri ababoota tiyyaani woliini tolfate guunnu male inteennu.

²¹Nu haguma jiru yo Waaqi nu qarqaare Seera isaa lakimne jecha isaa iraa ingoru.

²²Nu jecha hayyu gula iyaanu, aada teenna diquma haganale iraa ingoru.

²³Akuma inni dubbi buufateeni namichi dira Modini toko jecha hayyu inguuta jed'e, nama ch'ufa durati ufi gabaase waaqoota d'araa kaani waan mesa fakaata irati sorio baase.

²⁴Matathiani waan suni arginaani, aka male dallane garaa hammate, roqome namicha kaaniti ch'ee namicha kaani waan sorio baasani suni irati ijeese.

²⁵Ammalle namicha hayyuuni erge kaani ka biyya irreeni sorio baasisu kaani ijeese, waan sorio irati baasani kaanile ch'ach'abse.

²⁶ Kara kanaani Matathiani aka Seera Waaqa guddo jaalate jabeesu agarsiise, akuma Finehasini duri gaafa Zimri ilma Saluu ijeese tolche.

²⁷Jennaani Matathiani dira keesa deeme lalabe waan jed'e, Nami wold'aqisa Waaqa jabeese Seera isaa jaalate guutu ch'ufti na gula koota!

²⁸Duuba akanani isaafi ilmaani isaa ch'ufti waan qabani ch'ufa lakifte lafa gaareeniti baqatani.

²⁹Gaafasi nami Israeli hedduuni ka d'uga jaalate gula deemu ilmaafi nad'eenifi hori ufi fud'ate maro gaargala lafa keesa jirutifi lafa alooti gale.

³⁰

³¹Hojattu hayyutifi askartini Yerusalemu jirtu aka nami gari ka jechu hayyu dide baqate lafa alooti godaane odu d'agayani.

³² Askartini hedduuni worra reebde, d'aatu worraati bulte aka guyya Sabato worra haatu kurfefate.

³³Askartini lalabde waan worra Yahudi sunini jette, waan taatani kana lakisa, jecha hayyu guuta koota ga baa lubbu ufi baasa.

³⁴Worri waan jed'eeni nu ind'umnu yokhaani jecha hayyule inguunnu, yokhaani guyya Sabatole int'ureesinu.

³⁵Askartini hojuma suni worra haate,

³⁶ammo Yahudini ufira ind'oware, d'akhaaleeni inhaane yokhaani goda keesati d'okhatule afaani inch'umne.

³⁷Worri waan jed'e, Nuni ch'ufti ha d'uga irati raawannu, lafafi gubbaleeni aka isani fayyuma tana nu fit'ani ha d'uga nuu taatu.

³⁸Duuba akanani nyaapi suni worra guyya Sabato had'e d'iiraafi nad'eenifi ijoolleefi horile ch'ufa fit'e. Nami gaafasi raawate nama kuma toko.

³⁹Matathiafi jaallowani isaa odu suni d'ageennaani guddo laalefatani bohanifi waan woliini jed'ani,

⁴⁰yo nuni ch'ufti akuma Yahudi gosa teenna tana worra gosa d'ibi kana ufira haane lubbu teennafi aada teenna kalchufi dinne, yoosu lafa tana ira nu sossani.

⁴¹Guyya suni worri aka yo nami tokoleeni guyya Sabato worra had'e, aka worra Yuda ka goda keesati hobaasani kaani ufiti inlakimne ammo ufi ira had'u buufate.

⁴²Jennaani worri toko ka Hasidimu jed'ani ka aada Yahudi guute gosa ufiti kalchu ka Israeli keesa worri guddo jajanna, ammalle ka worri ch'ufti ufi baase Seera Waaqa badii d'owina jed'e, Matathiafi jaallowani isaati daramani.

⁴³Suni malele nami ch'ufti ka qara gargale baqate worrati darame irre worraa tahe.

⁴⁴Worri duula baase worra Yahudi ka aada ufi lakise nyaapati gale kaaniti dallane had'e.

⁴⁵Nami worra duraa bahe baqate worra gosa d'ibiti gale. Matathiafi jaallowani isaa taani gara ch'ufa yaani, mesa waaqoota d'araa kaani irati sorio baasani ch'ach'absani

⁴⁶irumaani ijoolle d'iira ta qabanqaba inqabatini ta lafa Israeli keesati argani ch'ufaa qabani.

⁴⁷Ammalle worri hojattu hayyu ta gosa d'ibii taani ch'ufa ta guddo kikiyyibdu gaade hobaase.

⁴⁸Worri harka gosa d'ibitifi hayyoota worraa keesa Seera Musa baase, irre hayyu dabdicha Antioko jed'ani kaani ch'abse.

⁴⁹Matathiani duu gae jennaani ilmaani isaati d'aamate waan jed'e, Bari kunini bara woraana ka gaargala, worri kiyyibaani lafa fidu yayu waan nami goyeesu nu tolche.

⁵⁰Ammo ilmaani tiyya isani Seera Waaqa jabeesitani wold'aqisa Waaqi duri ababoota teennaani woliini tolfate kalchitani irati duu maltani.

⁵¹Waan ababooti teenna duri tolchiteefi waan worri bara ufi keesati tahe qaabad'a. Akheekha worra gula yaa duuba guddinna argatani gurra haga jiru imbanne horatani.

⁵² Aka Abrahamuuni gaafa isa ilaalatani Aabbo Waaqa d'ugefate, Aabbo Waaqileeni isa d'ugefate isa maache qaabad'a.

⁵³ Yusufuni gaafa gaargalchani kaani jecha Waaqa gula deeme gudda lafa Misiri tahe.

⁵⁴Ababooni keenna Finehasini waan inni ato Waaqa jaalatefi, d'aloota isaa ch'ufa kakhu Waaqa gula qaalole tolchani.

⁵⁵ Yoshua waan inni jecha Musa guuteefi jaallaba Israeli tolchani,

⁵⁶Kalebu waan inni odu dansa gumiti himeefi, qooda lafa kennanifi.

⁵⁷Daudi waan inni guddo kara Waaqa jabeesefi isaafi d'aloota isaale ch'ufa haga jiru jireenna hayyu tolchani.

⁵⁸ Eliya waan inni guddo Seera Waaqa jabeesefi jiraa gubbati olfuud'ani.

⁵⁹Hananiafi Asariafi Mishaeli maro d'ugefacha worraatifi ibida jalaa bahani.

⁶⁰ Danielini nama d'ugaati tanaafi Aabbo Waaqi afaani nyeench'a jalaa baase.

⁶¹Me jara ababoota teenna kana ch'ufa laala aka nami Aabbo Waaqa d'ugefatu guyya tokole jabeenna ind'amne hubad'a.

⁶²Dubbi ch'ubbicha insodatini silaaftu yo inni due mid'aagumti isaa badde nafi isaa shame raamooni nyaati beekha.

⁶³Arra isa guddisa, ammo bori lafati inargani. Nafi isaa biyyeti deebie mali isaaleeni muumme baa.

⁶⁴Ammo ilmaani tiyya jabaad'a Seera Waaqa jabeesa, wonti akanatiifi Seeruma sunini gurra argatani.

⁶⁵Oboleesi keesani Simionini qaroo tanaafi akuma na ch'aqaftani isa ch'aqasa.

⁶⁶Yuda Makabayoni haguma d'alate janna, inni abba duula isaniti tahe isanini duula.

⁶⁷Nama Seera Waaqa guutu ch'ufa ufiti yaama, nyaapa keesani balleesa worra keesani haalo baasa.

⁶⁸Gosa d'ibi waan hamtu isani tolchite haalo baafad'a.

⁶⁹Jennaani Matathiani worraa eebise ira deebinaani ch'iche.

⁷⁰Duuba awaala worra isaani ka Modini jirtu isa awaalani, jennaani gochiti Israeli guddo isaa boote ganni gaafa inni due ganna 146.