Read BORANA BIBLE – KITAABA WAAQA 1 Makabayo 3 Bible Online

1 Makabayo 3 - BORANA BIBLE – KITAABA WAAQA bible

1 Makabayo 3

¹Yuda Makabayo akuma abba isaa Matathia worra isaaniti abba duula tahe.

²Oboleyaani isatifi worri duri abba isaa d'ugefate gula yae kaani goli isaa tahe isa qarqaare gammadaani nyaapa Israeli had'e.

³Yudani ulfinna gudda gosa isaati dare. Inni yo miha isaa ka lola keeyatu haga arba gaha; inni woraana ufi ch'ufa fud'ate duula d'aqe; goraade ufitini inni duula ufi nyaapa ira d'owe.

⁴Inni nyeench'a dallane d'anga d'au fakaata.

⁵Inni worra Seera ch'absu ch'ufa had'e, nama gosa isaa dabse ch'ufa ibidaani balleese.

⁶Worri seera imbeenne soda isaati jed'e wolti ririfate waan tau wollaale. Inni harka ufitini nama baase.

⁷Inni hayyoota heddu jireenna yake, ammo gammadani worra Israeliti d'ufe, nu haga jiru jireenna huji isaatifi isa faarsina.

⁸Inni dira Yudea keesa deeme nama Waaqa imbeenne ch'ufa balleese. Inni worra Israeli gaargala hama keesa baase.

⁹Inni worra hobauti jiru wolti guure, akasini haga muumme lafa gurra baafate.

¹⁰Duuba Apolonioni duula isaa ka nami gosa Samarialeni keesa jiru aka worra Israeli had'u wolti baase.

¹¹Yudani dubbi suni d'ageennaani d'aqe duula worraa had'e Apolonionile ijeese. Askartini worra suni guddo hobaate ta haftelleeni kaate baqate.

¹²Biyyiti miha lola ka boojiani wolti guurte jennaani Yudani goraade Apolonioni fud'ate haga jiru ch'ufa sunini duule.

¹³Seronini ka gudda worra Shamu aka Yudani askarti guddo isa d'ugefate, hojja ch'ufa isa gula duultu hubate.

¹⁴Seronini waan ufiini jed'e, Anini Yudafi jara isaa kana ka seera hayyu womatu indarre d'aqe had'e lafa hayyuuni fidu keesati gurra baafad'a.

¹⁵Duuba inni jara Waaqa imbeenne jajaba toko ka guddo worra Israeli had'e haalo baafachu fed'u goli tolfate Yuda had'u d'aqe.

¹⁶Inni kaarra Beth-Horoni geennaani Yudani nama diqa duula fud'ate fuula keesa deeme.

¹⁷Jari Yuda duula fuula worra keesa d'ufu arginaani, duuli keenna diqaani kunini akami dandae duula gudda suni had'a. Tana malele ya beelti nu gagabsite jed'e?

¹⁸Yudani waan worraani jed'e, Aki duuli diqaani duula gudda dabsatu laafa; wonti akanatiifi fuula Waaqa durati yo duuli guddaani nama baasefi diqaani nama baasele wonti sunini haguma taka.

¹⁹Duula gudda qabeenni ch'allaani nyaapa nama indabsachiisu, ammo Waaqumati nama dabsachiisa.

²⁰Nyaapi kunini irre guddooni nuti d'ufuti jira aka waan keenna soqate nad'eenifi ilmaani teenna balleesu.

²¹Ammo nu lubbu teennafi aada teennafi had'uti jira.

²²Hojja nu worra haanu Aabbo Waaqati worra daara baasa tanaafi worra insodatina.

²³Akuma Yudani dubbi buufateeni isaafi jari isaa maro tokotu Seronifi duula isaa had'e daara baase.

²⁴Worri worra reebu kaarra Beth-Horonitini gabuuse lafa diidati baase nama haga d'ibba saddeeti keesa gate. Worri fiigelleeni lafa Filistiati baqate.

²⁵Eegi suni asi worri gosa d'ibii kaani ch'ufti Yudafi oboleyaani isaa sodaate, fulla ch'ufati.

²⁶Gurri isaa hayyu Antioko gahe, nami gosa ch'ufa waan Yudatifi aka inni nyaapa dabsate odeese.

²⁷Antiokoni waan tahe d'ageennaani aka male dallane askarti lafa isaa keesa jirtu ch'ufa wolti baase fulla tokoti wolti deebise.

²⁸Inni fulla beese iti olkeeyatu bane beese worri gannati argatu ch'ufa kenneefi, waan qabdani ch'ufa kurfefad'a jed'e.

²⁹Ammo eegi suni inni aka beeseni fulla iti olkayani hobaate hubate. Beeseni sila damoosa ira argatani ya diqaate; wonti isi diqeese gaargalafi woraana inni aada haguma duriiti lafa jirtu balleese lafatini d'ufe.

³⁰Antiokoni qara hayyoota ch'ufa ira arjoomani wo namaa qooda, ammo amma tana aka haga duri kaani dandae wo namaa inkenine ya ufi arge yokhaani aka dandae lafa isaale inbulchine. Wonti akana kunini qara maro tokofi lamale isati d'ufte.

³¹Ammo inni qara guddo worere; ammo eege aka lafa Ajemi deeme damoosa arda lafa suni keesa jiru ch'ufa wolti guure beese muumme inqamne guure galuni heregate.

³²Inni namicha jaba toko ka Lisia jed'ani ka lafa suni keesa fiit'a hayyu jed'ani guddinna kenneefi aka inni lafa galaana Fratitifi seera lafa Misiri jirtu ch'ufa gudda iti tahu.

³³Inni ammalle Lisia nama ilma isaa Antioko shaneeso haga inni galuti qorqoratu tolche.

³⁴Inni arbaafi askarti isaa haga toko harka Lisiati kenne, ammalle ato inni ingalle waan inni tolchu male iti hime, keesuma waan worra Yudatifi ka Yerusalemu tolchu malani.

³⁵Ammalle inni waan Lisiani jed'e, duuli baasi lafa Yahuditi ergi, keesuma Yahudi Yerusalemu jirtuti ergi irre worraa ch'absi fiigu d'owi balleesi.

³⁶Ammalle lafa worraa worra iraa fuud'i nama gosa d'ibi ka lafa worra suni keesa qubatuti kenni.

³⁷Hayyichi ufi askarti isaa ta hafte fud'ate, dira gudda Antiokia jed'ani keesa kae galaana Frati taake lafa Mesopotamia keesa dabre ganna 147.

³⁸Lisiani Nikanofi Gorgiafi Tolemayo ilma Dorimene fohate gudda askarti ufi tolche; jara kana sadeenu jaallani hayyu jed'ani yaamani.

³⁹Inni askarti miilaani yaatu ta kuma afurtamatifi ta fardaani yaatu ta kuma torba harka worraati kenne, waan jed'eeni, Beena lafa Yudea had'a akuma hayyuuni qara jed'e balleesa.

⁴⁰Jari gugurdaani kunini duula ufi ch'ufa fud'ate lafa diida ta d'aatu Emau qubate.

⁴¹Askartini lafa Filistiatifi ta Idumealeni d'ufte worrati daramte. Jari dilaaltu ka arda suni keesa jiru aka askartini guddooni muumme inqamne d'ufte d'ageennaani aka tisse Yahudi bitatu beese guddoofi sansalata guurate d'ufe.

⁴²Yudafi oboleyaani isaa aka duuli nyaapa d'ufe lafa isaani keesa qubate, akasini lafti hammate argani. Ammalle aka hayyuuni nama gosa Yahudi ch'ufa balleesa jed'ele d'agayani.

⁴³Duuba worri waan woliini jed'e, Koota gosa teenna ta badde badii keesa baamne lafa teennafi Mana Waaqa keennati jenne nyaapa haana.

⁴⁴Jennaani gumiini ch'ufti wolti d'ufte, lola kurfefate, naasu Waaqa kad'ate.

⁴⁵Yerusalemuni bade ona taate lafa aloo fakaate; nami tokoleeni ka isa keesa bahe yokhaani seenu injiru. Mana Waaqa qulqullo nyaapi t'ureese, gochiti d'ibiini maneeni isaa jajabdu keesa qubate. Akanani gammadi worra Israeli ira bade qonqo kiraritifi ta fulludo lafa keesa d'abani.

⁴⁶Jennaani Yudafi jari isaa wolti baani Mispa ta d'aatu Yerusalemu jirtu d'aqani, wonti akanatiifi worri Israeli qara achiti Waaqa kad'ata.

⁴⁷Worri guddo laalefate bohe guyya suni ch'ufa ufi agabse daara matati naqate woyale ufira tatarsase.

⁴⁸Gochiti d'ibiini sila fulla akasiti waaqa ufi ka d'araa wo gaafati, ammo worri Israeli kitaaba Seera bane gorsa Waaqa barbaada.

⁴⁹Worri woya qaaloleetifi mid'aani qara ka Waaqa baasanifi qooda Waaqa baasanini d'ufe, ammalle worra aada Naziri keesa jiru ka kakhu ufi guutelleni d'ufe.

⁵⁰Gumiini ch'ufti Waaqa kad'ate, waan jette, Ee Aabbo waan kana amma akami tolchina nu eesa geesina?

⁵¹Mana kanke qulqullo ya gochiti d'ibiini ira sirbite t'ureesite. Ammalle qaaloleeni tante ya ch'eerte boote.

⁵²Worri gosa d'ibi yayu had'e nu balleesu d'ufe. Waan worri nuti malatu atini imbeeta!

⁵³Yo atini nu qarqaaru baate nu akami dandeenne ufira d'owara?

⁵⁴Jennaani magalata d'aani iyyani lafa gargalchani.

⁵⁵Duuba eege Yudani askarti isaa kud'ani kud'anini shantama shantamaani d'ibba d'ibbaani kuma kumaani gargari qoode, qooda ch'ufa nama mataa iti tolche.

⁵⁶ Jennaani Seera Waaqa gula inni nama d'io dubra fuud'eefi ka d'io mana jaarateefi ka d'io zabibu oobratefi nama daafana ch'ufa ufira galche.

⁵⁷Duuba eege duuli kae Emauni bita qubate.

⁵⁸Jennaani Yudani waan worraani jed'e, Garaa jabaad'a had'iisa kurfefad'a! Bori diirama kurfefad'a aka duula worra gosa d'ibi ka wolti bahe nuufi Mana Waaqa keenna balleesu fed'u kana haatani.

⁵⁹Fulla ufuma teteenne badii gosa teennatifi ta Mana Waaqa keenna arginu yo woraana keesati raawannu ira jirti.

⁶⁰Ammo Aabbo Waaqi waan fed'u tolcha.