Read BORANA BIBLE – KITAABA WAAQA 1 Makabayo 6 Bible Online

1 Makabayo 6 - BORANA BIBLE – KITAABA WAAQA bible

1 Makabayo 6

¹Gaafa toko ka Antiokoni lafa Mesopotamia keesa dabruti jiru, inni odu dira Elimaisi jed'ani toko ka lafa Ajemi keesa jiru ka worqifi qarsiini gurra baafate d'agaye.

²Mani waaqa worraa guddo, wonte worqitifi woraanafi miha lola ka Eskandani ilmi hayyu Makedonia ka Filipo jed'ani achiti lakise qaba. Filipo sunini nama qara lafa Griki ch'ufa fide.

³Antiokoni dira suni had'e saamachu d'ufe ammo indad'abe. Wonti akanatiifi worri dira suni mala isaa beekate,

⁴askarti ufi wolti baase isa ufira had'e. Inni ka ch'eeri ijeese askarti fud'ate kae lafa Babiloniti deebie.

⁵Lafa Ajemiti nami ergaa iti d'ufe, waan jed'eeni duula atini lafa Yudeati ergite ya dabsatani.

⁶Lisiafi duuli isaa guddaani yayu worra Yahudi baqate, worri Yahudi sunini miha lola d'ibifi woregaafi waan nyaapa dabsatani ira saamatanini guddo haga qarale ira irre horate.

⁷ Ammalle waan Yahudini waan jibbani ka nama rifachisa jettuni ka hayyu Antiokoni waan sorio irati baasani ka Yerusalemu irati jaare, Yahudini ch'absite. Ammalle worri Mana Waaqa naabo d'akhatini marse jaare akuma qara kaaniti deebise. Dira Beth-Suri ka dira hayyu toko fud'ate jabeese jaare.

⁸Hayyichi qonqo tana d'ageennaani aka hama rifate nahe, fayya d'abe kae gach'iise, wonti akanatiifi aka inni heregate wonti ch'ufti intaane.

⁹Inni aka male laalefate bulti heddu ch'iise, eege aka duu ufi arge.

¹⁰Duuba inni jara jaallowani hayyu jed'anini ch'ufa wolti yaame waan jed'eeni, Anini ya gaargale yaadae hiriiba d'abe.

¹¹Anini waan ufiini jed'e, D'ibi guddaani na gaargalche oolma bulti na d'owe kunini ch'ufti maafi nati d'ufa? Anini gaafa lafa mohad'e guddo namaa nahe namileeni na jaalata.

¹²Ammo anini wollaala Yerusalemu keesati tolche ya qaabad'e gaafa miha qarsifi worqi Mana Waaqa keesa guure fayyuma tana worra Yudea balleese.

¹³Anini imbeekha aka gaargali kunini maro waan sunitifi na qabate, aninileeni lafa nyaapa keesati ufi jibbaad'e duu jiru.

¹⁴Jennaani inni Filipo namicha inni guddo d'ugefatu toko yaame, finna lafa isaa ch'ufa iti kenne.

¹⁵Inni rufafi woyaafi qube hayyuma ta beesisa kenneefi ammalle aka inni ilma isaa Antioko shaneeso wobarsise haga inni guddate hayyuma qabatuti jabeese iti d'aamate.

¹⁶Hayyu Antiokoni achiti ganna 149 due.

¹⁷Lisiani lubbu hayyu d'ageennaani, gurba Antioko jed'ani ka ilma hayyu fulla abbe isaa hayyu tolche. Inni gurba suni haguma gaafa inni daimati guddise, amma tana maqa Eupatori iti baase.

¹⁸Duuba nyaapi maneeni jajabdu Yerusalemu keesa jiru kaani, worra Israeli ka d'aatu Mana Waaqa jiru suni bau d'owe, hojja ch'ufa gaargalche worra gosa d'ibii qarqaare.

¹⁹Duuba Yudani duula baase aka worra suni marse balleesu malate.

²⁰Worri wolti bahe ganna 150 keesa maneeni jajabdu taani marse doofi ira ejaanjani diraani had'anifi waan naabo diraatini ch'absani mid'aafate.

²¹Ammo worri marsani kaani ka gari baqate worra Yahudi ka aada ufi lakise kaani woliini hayyu d'aqani waan jed'anini,

²²Atini yoomini eedafi worra gosa teenna ka gaargalchani haalo imbaamne?

²³Nu aka abba keeti saalfanne seera isaa ch'ufa guunne jecha isaa ch'ufa gula deemnu qara ee jenne.

²⁴Ammo wonti sunini maani nuu baate? Isuma amma tana worri keennaleeni ya nyaapa nuti tahe. worri haga dandau yayu nama keenna fit'e waan nu qamnule saamate.

²⁵Ammo nami worri had'e nu ch'allaniti, nama d'aatu worra qubatu ch'ufa ya had'ani.

²⁶Amma tana worri yayu mana jabeesani jaarani ka Yerusalemu kaani marse aka fud'atu malate. Ammalle worri yayu Mana Waaqatifi dira Beth-Surulle jabeese jaare.

²⁷Amma yo atini hurrifte wo intolchini worri hagasi ira nu balleesa duuba atini yo suni ind'owartu.

²⁸Hayyuuni dubbi suni d'ageennaani guddo dallane, inni jara abbooti duulatifi jara askarti fardati matatifi jara inni guddo d'ugefatu ka mala isaa d'aulle wolti baase.

²⁹Inni ammalle lafa bisaani jiddu ta Grikitifi lafa d'ibile askarti bitate.

³⁰Askartini isaa ta miilaani yaatu kuma d'ibba tokoti ta fardaani yaatu kuma diddamati ammalle inni arba sodomi lama ka waan lola beekhu qaba.

³¹Hayyufi askartini isaa lafa Idumea keesa dabrani dira Beth-Suri marsani guyya heddu had'ani worri waan diraani ch'absanifi doofi ira ejaanjani dira had'anile mid'aafate, ammo worri dira keesa bahe doofi taani gube balleese.

³²Jennaani Yudani askarti isaa fulla maneeni jajabdu Yerusalemu suni fuud'e Bethzekariati qubate, duula hayyu kara bau d'owe.

³³Boriyyaate ganama hayyichafi askartini isaa kara Bethzekaria gula hariifatani yaani. Achiti askartini isaa lola kurfefate magalata d'oofte,

³⁴duuba bisaani zabibutifi bisaani mid'aani d'ibi diimo arba agarsiisani akasini lola kurfeesani.

³⁵Bineensa haga woi gagau kaani askarti miilaani yaatu iti qoodani, nama kuma toko ka woya sibiilatifi kofia sibiila diima naqatu arba kaani kamu birati lakisani. Ammalle arba kaani ch'ufa toko tokooni askarti fardaani yaatu

³⁶nama d'ibba shani birati lakisani, ta hojja ch'ufa arba kana eedu.

³⁷Arba kaani ch'ufa doofi mukhaani jaarani jabeesani haadani iti hid'ani. Arba kaani ch'ufa nama isa gussu male nama saditi yaabata.

³⁸Lisiani askarti taani ta farda yaabatu moga moga duula isaa kaaye, aka askartini miilaani yaatu ato nyaapa haatu dandeete qorqoratu.

³⁹Kayyoni aduu ta wonte sibiila diimatifi ta worqii ira bilit'u gaareeniti ifsite, bobaa ifse fakaate.

⁴⁰Askartini hayyu hagi toko lape gaara ch'iifte ta garileeni gaara jala ch'iifte, ammo worri ch'ufti fulla taka durati yae.

⁴¹Biyyiti ch'ufti qileesa woraanatifi girreesa hirba duula gudda kana d'ageennaani guddo rifate mudamte.

⁴²Yudafi askartini isaa lola dabarte hojuma suni askarti d'ibba jaa ta hayyu fit'e.

⁴³Eleazari Hafaranini aka arbi toko arba ch'ufa ira gudda ammalle aka inni miha hayyu ka lola baatu arginaani waan hayyuuni isa yaabatu sehe.

⁴⁴Duuba Eleazari gosa ufiti jed'e lubbu ufi baase aka akasini haga jiru jireenna gurra argatu, garaa jabaate arba toko ka askarti miilaani yaatu jiddu jiruti utaale, nama mirgaa bita jiru ch'ufa fit'e,

⁴⁵akasini askartini nyaapa gama lachuti isa dura baqate.

⁴⁶Inni arba kaani jala seene tumate ijeese arbi kaanileeni isa irati qaarie isa ijeese.

⁴⁷Ammo Yahudini aka askartini hayyu sunini garaa jabaate worra had'u feete hubannaani dudda duuba deebite.

⁴⁸Hayyichafi duuli isaa durati hiiqe, aka Yahudi Yerusalemu keesa jirtufi ta Yudea keesa jirtule marsu.

⁴⁹Inni Yahudi dira Beth-Suri jirtu nagaya wolti buufatani isiini duuba dira suni keesa baate. Sagaleeni worri haga marsani sooratu injirtu, wonti akanatiifi aada gula ganni suni ganna Sabatoti woma infach'aasani.

⁵⁰Hayyichi dira Beth-Suri seene, askarti dira suni eedu iti tolche.

⁵¹Inni Mana Waaqa marse haga guyya heddu had'e, inni doofi ira ejaanjani dira had'ani jaare, waan naabo diraatini ch'absanifi guluba d'akhaafi ibidaani darbani mid'aase, miha lola d'ibile ka woraanafi d'akhaani darbani mid'aase.

⁵²Jari Mana Waaqa nyaapa ira d'owuleeni miha lola ka miha nyaapa kaanitini ufira d'owule mid'aafate, akanani haga guyya heddu woli had'ani.

⁵³Ammo sagaleeni tokoleeni fulla Mana Waaqa ta keesati olkayani taani keesati inhamne, wonti akanatiifi ganni sunini ganna Sabatoti; ammalle jari nyaapa kaani d'eete lafa Yudeati baqateleni sagale qara olkayani ch'ufa nyaate fit'e.

⁵⁴Sagale lafa keesa d'abani jennaani nami hedduuni kae gargari bitinae namu worra ufiti gale, duuba nami diqaani toko mana keesati hafe.

⁵⁵Gaafa namichi Filipo jed'ani ka hayyu Antiokoni ato induini ilma kiyya naa barsiise jed'e iti d'aamate,

⁵⁶lafa Ajemitifi ta Midia keesa deebie, inni askarti hayyu woliini deebie ammalle aka finna lafa ch'ufa harka ufiti deefatu malate,

⁵⁷Lisiani dubbi tana d'ageennaani, aka hurrise keesa deebiu kurfefate, waan hayyufi jara askarti isaati matatifi askarti isaatini jed'e, Akuma bulle kanuni humniti teenna guyya ch'ufa gadi deemti,

⁵⁸woreegilleeni amma ya nuti diqaate fullaani nu marsinu tunileeni guddo irre qabi. Tana malele huji jabduti jira ta finna lafa ta nura fed'ani. Koota gosa Yahudi tana woldubanne nagaya wolti buufanna.

⁵⁹Worri ha akuma duri kaani aadafi seera ufi gula yauti, d'ibi kunini ch'ufti nu aadafi seera worra balleesine worri dallane jennaani d'ufe.

⁶⁰Dubbi tana hayyichafi jari askarti isaati matalleeni quufe, akanani Lisiani qonqo nagaya Yahuditi erge, worrileeni quufe nagaya wolti buufatani.

⁶¹Hayyichafi jari gugurda askarti isaa dubbi tanati kakhatani jennaani Yahudini mana isaani jajaba kaani keesa yaate,

⁶²ammo hayyuuni naabo Mana Waaqa ta gaara Sionitini marsani jaarani taani seene aka jabeesani jaarani arginaani, waan qara iti kakhate kaani lakise, naabo Mana Waaqatini marsani ch'absa jed'e.

⁶³Duuba inni hurrise Antiokiati deebie achiti Filipo ka dira suni fud'ateeni bahe, duuba hayyichi dira suni had'e irreeni fud'ate.